తిరుపతి జిల్లాలో జరిగిన అమానుష ఘటన ఆలస్యంగా వెలుగులోకి వచ్చింది. ఓ తల్లి నిస్సహాయత.. తనకు కొడుకును దూరం చేసింది. కట్టుకున్నవాడు దూరమై.. చేసిన అప్పులు భారమై పరిస్థితులలో విధిలేక ఆమె చేసిన పని.. పేగుబంధాన్ని దూరం చేసింది. చూసిన వారినే కాదు విన్నవారికే కూడా కన్నీళ్లు తెప్పించే ఈ ఘటన తిరుపతి జిల్లా చవటపాలెంలో జరిగింది. దీనికి సంబంధించిన పూర్తి వివరాలు మీ కోసం..
తిరుపతి జిల్లా చవటపాలెం గ్రామం.. చెంచయ్య, అనకమ్మ అనే దంపతులు. సత్యవేడులోని ముత్తు అనే బాతుల పెంపకందారు వద్ద పనికి కుదిరారు. పదేళ్లు దాటిన తమ కొడుకుతో కలిసి ముత్తు వద్ద పని చేసుకుంటూ జీవనం సాగించేవారు. ఇద్దరూ కష్టపడితే మూడుపూటలా వేళ్లు నోట్లోకి వెళ్లే పరిస్థితి. కష్టపడుతూ కలో గంజో తాగుతూ బతుకున్న వారి జీవితం అనుకోని మలుపులు తిరిగింది. చెంచయ్య అనుకోకుండా చనిపోయాడు. కుటుంబపెద్ద చనిపోవటంతో ఆ కుటుంబం రోడ్డుపడింది. ఇదే సందని కాచుకుని కూర్చున్న రాబందులు వారి జీవితంలోకి ప్రవేశించాయి. స్థానికంగా ఉండే ఓ వ్యక్తి చెంచయ్య తన వద్ద రూ.25000 అప్పు తీసుకున్నాడని.. తీర్చకుండానే చనిపోయాడంటూ అనకమ్మతో గొడవకు దిగాడు. దీంతో మొగుడు పోయిన దుఃఖంలో ఉన్న అనకమ్మకు ఏం చేయాలో పాలుపోలేదు. అప్పు తీసుకున్నాడో లేదో చెప్పేందుకు కట్టుకున్నోడు లేడు.. తీర్చడానికి చేతిలో చిల్లిగవ్వ లేదు.. దిక్కుతోచని పరిస్థితి..
*సిట్టింగ్ రూమ్‌లు లేవని నడిరోడ్డుపైనే సిట్టింగ్..
భర్త చనిపోతే.. ఆదుకోవాల్సిన చేతులే, కాటేశాయ్..
అప్పుడే ముత్తు ఆదుకుంటానంటూ ముందుకు వచ్చాడు. అప్పటికే అనకమ్మ దంపతులు ముత్తు వద్ద ఏడాదిగా పనిచేస్తున్నారు. ఈ చొరవతో తాను ఆ డబ్బులు సర్దుబాటు చేస్తానంటూ ముత్తు అనకమ్మకు భరోసా ఇచ్చాడు. అయితే ఓ షరతు పెట్టాడు. అప్పు తీరేవరకూ అనకమ్మ తన వద్దే పనిచేయాలని షరతు విధించాడు. దీంతో విధిలేని పరిస్థితుల్లో అనకమ్మ అందుకు అంగీకరించాల్సి వచ్చింది. అయితే ముత్తు వద్ద పనిచేయడం అనకమ్మకు రోజురోజుకూ కష్టంగా మారిపోయింది. దీనికి తోడు చాలీచాలని జీతం. దీంతో జీతం పెంచాలని కోరింది అనకమ్మ. అందుకు ముత్తు నిరాకరించాడు. అయితే తన వద్ద పనిచేయలేనని, వెళ్లిపోతానని కోరింది అనకమ్మ. అయితే తనకు రూ.45000 చెల్లిస్తే కానీ.. పంపడానికి ఒప్పుకోనని ముత్తు బెదిరించాడు.
*తిరుమలలో అపచారం.. బహిరంగంగా అలాంటి పనా?
అప్పు తీర్చేందుకు కొడుకును తనఖా పెట్టిన తల్లి..
అయితే అంత డబ్బు తన వద్ద లేకపోవటంతో అనకమ్మ.. తన కొడుకును ముత్తు వద్ద తనఖా పెట్టింది. అప్పటి నుంచి ముత్తు వద్ద ఉంటూ వస్తున్న అనకమ్మ కొడుకు.. అతని ఫోన్‌తో రోజూ తల్లికి ఫోన్ చేసేవాడు. రోజూ చాలా సేపు పనిచేయిస్తున్నారని, బాధలు పెడుతున్నారని.. తనను ఇక్కడి నుంచి తీసుకెళ్లాలంటూ బతిమాలుకునేవాడు. కానీ కొడుకును విడిపించడానికి డబ్బులేని ఆ నిస్సహాయ తల్లి.. రేపు, మాపు అంటూ కాలం గడుపుతూ వచ్చింది. అయితే ఏప్రిల్ 15వ తేదీ అదే ఆఖరు.. అనకమ్మకు కొడుకు నుంచి ఫోన్ రాలేదు. ఏమైందోననే భయం. కొడుకును ఎలాగైనా విడిపించుకోవాలనే తపనతో రూపాయి రూపాయి పోగు చేసి రూ.45 వేలు జమ చేసింది అనకమ్మ.
*అరటిపండు ఆశ చూపించి.. ముళ్లపొదల్లోకి తీసుకెళ్లి,
కొడుకును విడిపించుకోవాలని రూపాయి రూపాయి పోగుచేసుకుని వెళ్తే..
కొడుకును విడిపించుకోవాలనే తాపత్రయంతో డబ్బు పోగు చేసుకుని మే నెల మొదట్లో సత్యవేడులోని ముత్తు వద్దకు వెళ్లింది అనకమ్మ. డబ్బులు చెల్లిస్తానని కొడుకును అప్పగించాలని కోరింది. అయితే ముత్తు అనేక కథలు చెప్పాడు. ఓసారి అనకమ్మ కొడుకు అనారోగ్యానికి గురై ఆస్పత్రిలో ఉన్నాడని.. మరోసారి వేరే చోటుకు వెళ్లాడని, ఇంకోసారి పారిపోయాడంటూ ముత్తు కట్టుకథలు చెప్పాడు. దీంతో భయపడిపోయిన అనకమ్మ పోలీసులను ఆశ్రయించింది. తన కొడుకును తనకు అప్పగించేలా చూడాలని వేడుకుంది. అయినప్పటికీ ఆమె ప్రయత్నాలు ఫలించలేదు. దీంతో ఎస్పీ హర్షవర్ధన్ రాజును ఆశ్రయించింది.
ఆయన ఆదేశాల మేరకు పోలీసులు విచారించారు. చివరకు ముత్తును అదుపులోకి తీసుకుని విచారించగా.. అనకమ్మ కొడుకు చనిపోయిన విషయం బయటకు వచ్చింది. అనకమ్మ కొడుకును హత్య చేసిన ముత్తు.. ఎవరికీ తెలియకుండా తమిళనాడులోని కాంచీపురం సమీపంలో పూడ్చిపెట్డాడు. ఈ విషయాన్ని ముత్తు కూడా అంగీకరించాడు. దీంతో కొడుకును విడిపించుకోవాలనే కోటి ఆశలతో డబ్బులతో వచ్చిన అనకమ్మ.. గుండె పగిలే వార్తవని కన్నీరుమున్నీరుగా విలపించింది. ఈ దృశ్యం చూపరులకు కూడా కంటతడి తెప్పించింది.
రచయిత గురించివంకం వెంకటరమణవంకం వెంకటరమణ సమయం తెలుగులో డిజిటల్ కంటెంట్ ప్రొడ్యూసర్‌గా పని చేస్తున్నారు. ఇక్కడ క్రీడావార్తలతో పాటు జాతీయ, అంతర్జాతీయ వ్యవహారాలకు సంబంధించిన తాజా వార్తలు, ప్రత్యేక కథనాలు అందిస్తుంటారు. ఆయనకు జర్నలిజంలో 6 సంవత్సరాల అనుభవం ఉంది. గతంలో ప్రముఖ మీడియా సంస్థల్లో స్పోర్ట్స్, పొలిటికల్ న్యూస్, ఇతర రంగాలకు సంబంధించి వార్తలు రాశారు.… ఇంకా చదవండి
