Major Malla Rama Gopal Naidu Kirti Chakra Award: తెలుగు ఆర్మీ మేజర్ మల్లా రాంగోపాల్ నాయుడు సాహసానికి దేశం ఫిదా అయింది. 77 ఏళ్ల స్వతంత్ర భారత చరిత్రలో ఆయన కీర్తి చక్ర అందుకున్న తొలి తెలుగు వ్యక్తిగా నిలిచారు. జమ్మూలో ముగ్గురు ఉగ్రవాదులను మట్టుబెట్టి దేశానికి కాపాడిన రాంగోపాల్ ను రాష్ట్రపతి ద్రౌపది ముర్ము పురస్కారంతో సత్కరించారు. ఇంతకీ 2023లో ఏం జరిగింది? రాంగోపాల్ ఎలా పోరాడారు?
కీర్తి చక్ర పురస్కారం అందుకున్న రాంగోపాల్ నాయుడును ముఖ్యమంత్రి చంద్రబాబు నాయుడు అభినందించారు. రాంగోపాల్ తన కుటుంబ సభ్యులతో కలిసి ఢిల్లీలో చంద్రబాబును కలిశారు. జమ్మూ కాశ్మీర్ లోని కుప్వారా జిల్లాలో ముగ్గురు ఉగ్రవాదులను కాల్చి చంపిన రాంగోపాల్ సాహసాన్ని చంద్రబాబు కొనియాడారు. కేంద్ర పౌర విమానయాన శాఖ మంత్రి రామ్మోహన్ నాయుడు కూడా రాంగోపాల్ నాయుడును అభినందించారు. పురస్కార ప్రదానోత్సవానికి హాజరైన రాంగోపాల్ ను కేంద్ర మంత్రి తన ఇంటికి పిలిచి సత్కరించారు.
2023లో ఏం జరిగింది?
2023 అక్టోబరు 2 ఉదయం 10 గంటల సమయంలో.. జమ్మూ కాశ్మీర్ కుప్వారా జిల్లాలో నియంత్రణ రేఖ వద్ద ఉగ్రవాదులు మాటు వేశారని మన సైన్యానికి సమాచారం అందింది. వెంటనే మేజర్ మల్లా రాంగోపాల్ నాయుడు నేతృత్వంలో మరాఠా లైట్ ఇన్ఫాంట్రీ, 56వ బెటాలియన్, రాష్ట్రీయ రైఫిల్స్ సైనికులు రంగంలోకి దిగారు. కుప్వారాలో మాటువేసిన ఐదుగురు ఉగ్రవాదులను గుర్తించి వారిపై దాడి చేశారు. కాల్పులు, ఎదురు కాల్పులతో ఆ ప్రాంతం దద్దరిల్లిపోయింది. రాంగోపాల్ ఒక ఉగ్రవాదిని చంపి, మరొకరిని గాయపరిచారు. ఆ పక్కనే గుహలో దాక్కున్న ఉగ్రవాదులు భారత సైన్యంపై దాడి చేయడానికి ప్రయత్నించారు. దీన్ని గమనించిన రాంగోపాల్ నాయుడు తన ప్రాణాలను లెక్కచేయకుండా సైన్యాన్ని కాపాడి గుహ వైపు పరిగెత్తారు.
అక్కడ దాక్కున్న ఉగ్రవాదులను అంతమొందించే ప్రయత్నం చేశారు. ఒక ఉగ్రవాది గ్రెనేడ్ విసిరినా.. ఆయన మాత్రం తప్పించుకుని పాయింట్ బ్లాంక్ రేంజ్‌లో అతడిని కాల్చి చంపారు. రాంగోపాల్ ముగ్గురు ఉగ్రవాదులను చంపగా.. ఆయన టీమ్ మిగిలిన వారిని మట్టుబెట్టి కుప్వారాలో ఆట కట్టించారు. దేశానికి పొంచి ఉన్న ప్రమాదాన్ని తప్పించారు. మేజర్ రాంగోపాల్ నాయుడు వ్యూహాత్మక ఆలోచన, ధైర్యసాహసాలతో దళాలను కాపాడినందుకు ఆర్మీ అధికారులు కీర్తిచక్ర పురస్కారానికి సిఫార్సు చేశారు. రాష్ట్రపతి ద్రౌపది ముర్ము అవార్డుకు ఆమోదం తెలిపారు.
రాంగోపాల్ నాయుడు శ్రీకాకుళం జిల్లా సంతబొమ్మాళి మండలం నగిరిపెంట.. ఆయన తండ్రి అప్పలనాయుడు రైతు, తల్లి గృహిణి. చిన్నప్పటి నుంచి దేశానికి సేవ చేయాలని, సైన్యంలో చేరాలని లక్ష్యంగా పెట్టుకున్నారు. విజయనగరం జిల్లా కోరుకొండలోని సైనిక స్కూల్ లో చదివారు.. 2012లో NDA (నేషనల్ డిఫెన్స్ అకాడమీ) కు ఎంపికయ్యారు. 2016లో డెహ్రాడూన్ లోని IMA నుండి పట్టభద్రుడయ్యారు.. అక్కడ బంగారు పతకం సాధించారు. ఆ తరువాత లెఫ్టినెంట్‌గా చేరి 2022 నాటికి మేజర్ అయ్యారు.
దేశ రక్షణలో ప్రాణాలకు తెగించి సాహసం.. చరిత్రలో తొలిసారి తెలుగోడికి ‘కీర్తి చక్ర’.. సెల్యూట్ మేజర్ నాయుడు
ఇటీవల భారత్ పాకిస్థాన్ మధ్య సరిహద్దులో ఉద్రిక్త పరిస్థితులు కనిపించాయి. అయితే పాక్ జరిపిన కాల్పుల్లో తెలుగు జవాన్ మురళీ నాయక్ ప్రాణాలు కోల్పోయారు.. ఆయన కుటుంబానికి ఏపీ ప్రభుత్వం అండగా నిలిచింది. మురళీ నాయక్ చేసిన త్యాగాన్ని ప్రతి ఒక్కరూ తలచుకున్నారు.
రచయిత గురించితిరుమల బాబుతిరుమల బాబు సమయం తెలుగులో సీనియర్ డిజిటల్ కంటెంట్ ప్రొడ్యూసర్‌గా పని చేస్తున్నారు. ఇక్కడ ఏపీ, తెలంగాణకు సంబంధించిన తాజా వార్తలు, రాజకీయ వార్తలు, ప్రత్యేక కథనాలు అందిస్తుంటారు. ఆయనకు జర్నలిజంలో 11 సంవత్సరాలకు పైగా అనుభవం ఉంది. గతంలో ప్రముఖ మీడియా సంస్థల్లో పొలిటికల్ న్యూస్, ఇతర రంగాలకు సంబంధించి వార్తలు రాశారు.… ఇంకా చదవండి
