Tirumala Bangalore Devotee Rs 10 Lakhs Donation,తిరుమల శ్రీవారి బెంగళూరు భక్తుడిది ఎంత గొప్ప మనసు.. వారి ప్రాణాలు నిలబెట్టేందుకు – tirumala banglore devotee mahesh yadav donated rs 10 lakh to ttd sri balaji arogya varaprasadini scheme

తాజాగా మరో భక్తుడు తిరుమల శ్రీవారికి భారీగా విరాళం అందించారు. టీటీడీ ఆధ్వర్యంలో నడుస్తున్న శ్రీ బాలాజీ ఆరోగ్య వరప్రసాదిని స్కీంకు రూ.10 లక్షలు విరాళం అందజేశారు. బెంగళూరుకు చెందిన అలెన్ కోచింగ్ ఇనిస్టిట్యూట్ వైస్ ప్రెసిడెంట్ మహేష్ యాదవ్ టీటీడీ శ్రీ బాలాజీ ఆరోగ్య వరప్రసాదిని పథకానికి రూ.10 లక్షలు విరాళాన్ని ఇచ్చారు. ఈ విరాళానికి చెందిన డీడీని తిరుమల అన్నమయ్య భవన్‌లోని సమావేశ మందిరంలో అడిషనల్ ఈవో సీహెచ్ వెంకయ్య చౌదరికి దాత అందజేశారు. ఈ సందర్భంగా దాతను టీటీడీ అడిషనల్ ఈవో అభినందించారు. శ్రీ బాలాజీ ఆరోగ్య వరప్రసాదిని పథకం ద్వారా కార్పొరేట్ వైద్యం అందించి పేదల ప్రాణాలను నిలబెడుతున్నారు.

మరోవైపు శుక్రవారం కూడా తిరుమల శ్రీవారికి భారీ విరాళం అందింది. హైదరాబాద్‌కు చెందిన ప‌వ‌ర్ మెక్ ప్రాజెక్ట్స్ లిమిటెడ్ ఎండీ సత్య రోహిత్ ఎస్వీ అన్న ప్రసాదం ట్రస్టుకు విరాళం ఇచ్చారు. ఆయన తిరుమల శ్రీ‌వారి ఆల‌యంలోని రంగ‌నాయ‌కుల మండ‌పంలో టీటీడీ అదనపు ఈవో సీహెచ్ వెంకయ్య చౌదరికి రూ.17 లక్షలు విరాళం డీడీని అందజేశారు. మాతృశ్రీ తరిగొండ వెంగమాంబ అన్న ప్రసాద భవనంలో ఒక పూట మధ్యాహ్నం భోజనం వడ్డించేందుకు ఈ విరాళాన్ని భక్తులకు ఉపయోగించాలని దాత కోరారు.. ఈ సందర్భంగా దాతను టీటీడీ అడిషనల్ ఈవో అభినందించారు. తిరుమల శ్రీవారికి ఇటీవల కాలంలో భారీగా విరాళాలు అందుతున్నాయి.. టీటీడీ ట్రస్టులకు భక్తులు కొందరు రూ.కోట్లలో కూడా విరాళాలను అందించారు. ఈ విషయాన్ని టీటీడీ ఛైర్మన్ బీఆర్ నాయుడు స్వయంగా తెలియజేశారు.