Tirumala Trains Cancelled Due To Flood,తిరుమల శ్రీవారి భక్తులకు అలర్ట్.. ఈ రైళ్లను రద్దు చేశారు, పూర్తి వివరాలివే – south central railway cancelled several trains run through tirupati due to flood

ఏపీలో రైలు ప్రయాణికులకు ముఖ్యమైన గమనిక.. వరదలు, వర్షాల కారణంగా విజయవాడ డివిజన్‌ పరిధిలో తిరుపతి నుంచి వెళ్లాల్సిన పలు రైళ్లను రద్దు చేసినట్లు రైల్వే అధికారులు తెలిపారు. మంగళవారం తిరుపతి నుంచి బయలుదేరాల్సిన తిరుపతి-విశాఖపట్నం స్పెషల్‌(08584), తిరువనంతపురం-సికింద్రాబాద్‌(17229),బెంగళూరు-హౌరా(12864), బెంగళూరు-హటియా(12836) రైళ్లను రద్దు చేసినట్లు ఓ ప్రకటనలో తెలిపారు. మరికొన్ని రైళ్లను తెనాలి జంక్షన్‌ నుంచి దారి మళ్లించారు అధికారులు.తిరుపతి-సికింద్రాబాద్‌(12763) పద్మావతి ఎక్స్‌ప్రెస్ మంగళవారం సాయంత్రం 16:55 గంటలకు బయలుదేరాల్సి ఉండగా.. 5:35 గంటలు ఆలస్యంతో రాత్రి 22:30 గంటలకు రీ షెడ్యూల్‌ చేశారు. ఈ రైలును విజయవాడ, ఖమ్మం, మహబూబాబాద్ మీదుగా కాకుండా తెనాలి జంక్షన్‌ నుంచి గుంటూరు మీదుగా నేరుగా సికింద్రాబాద్‌కు దారి మళ్లించారు. వర్షాలు, వరదల కారణంగా కాజీపేట – విజయవాడ మార్గంలో భారీగా రైళ్లు రద్దయ్యాయి. ఇవాళ కూడా పదుల సంఖ్యలో రైళ్లను దక్షిణ మధ్య రైల్వే శాఖ రద్దు చేసింది.

మరోవైపు విజయవాడ- కాజీపేట సెక్షన్‌లో వర్షాలకు దెబ్బతిన్న ట్రాక్‌ను పునరుద్ధరించే పనులు ముమ్మరంగా కొనసాగుతున్నాయి. చెరువుల నుంచి నీటి ప్రవాహం వస్తుండడంతో పాటుగా వర్షం కురుస్తుండటంతో పనులు ఆలస్యం అవుతున్నాయి. తాళ్లపూసపల్లి-మహబూబాబాద్‌ మధ్య పునరుద్ధరణ పనులు దాదాపు పూర్తి కావొచ్చాయి. అలాగే ఇంటికన్నె-కె.సముద్రం మధ్య ట్రాక్‌ పనులు కూడా వేగంగా సాగుతున్నాయి. బుధవారం సాయంత్రానికి రైళ్ల రాకపోకల్ని పూర్తిస్థాయిలో పునరుద్ధరించాలనే టార్గెట్‌గా పనిచేస్తున్నారు.

తాళ్లపూసపల్లి-మహబూబాబాద్, ఇంటికన్నె-కేసముద్రం మధ్య రైలు పట్టాల మీదుగా.. శనివారం అర్ధరాత్రి దాటాక భారీగా వరద ప్రవహించింది. ఈ వరద దెబ్బకు రైలు పట్టాల కింద మట్టి, కంకర కొట్టుకుపోగా.. వెంటన మరమ్మత్తుల పనులు చేపట్టారు. ప్రత్యేక మాన్సూన్‌ రైలులో స్లీపర్లు, రెయిల్స్, బండరాళ్లు, కంకరను రైల్వే అధికారులు అక్కడికి తరలించారు. ఆ మార్గంలో పట్టాలు వేలాడుతున్న ప్రాంతంలో కింది భాగాన్ని బండరాళ్లు, కంకర, మొరంతో రైల్వే సిబ్బంది నింపేస్తున్నారు. వర్షం పడుతుండటంతో నీటి ప్రవాహం అడ్డంకిగా మారగా.. పెద్దపెద్ద బండరాళ్లతో అడ్డుకట్టలా వేస్తున్నారు. ముదుగా బుధవారం మధ్యాహ్నంలోపు ఒక లైన్‌ని పునరుద్ధరించి రైళ్ల రాకపోకల్ని ప్రారంభించాలని భావిస్తున్నారు. సాయంత్రానికి రెండో లైన్‌నూ అందుబాటులోకి తీసుకురావాలని భావిస్తున్నారు.