విజయవాడ కలెక్టరేట్లో బ్యాంకర్లు, బీమా కంపెనీల ప్రతినిధులతో ముఖ్యమంత్రి చంద్రబాబు నాయుడు భేటీ అయ్యారు. వరదలతో ప్రజలు తీవ్రంగా నష్టపోయిన పరిస్థితుల్లో సాయం చేసేందుకు బ్యాంకర్లు, ఇన్సూరెన్స్ ఏజెన్సీలతో సీఎం సమావేశమయ్యారు.వరదల్లో దెబ్బతిన్న వాహనాలకు త్వరితగతిన బీమా ఇచ్చే విషయంపై బీమా కంపెనీ ప్రతినిధులతో చంద్రబాబు చర్చించారు. వాహనదారుల ఇన్సూరెన్స్ క్లెయిమ్స్ పదిరోజుల్లోగా పూర్తి చేయాలని బీమా కంపెనీలకు సీఎం చంద్రబాబు సూచించారు.
ఈ సందర్భంగా ఎన్నడూ చూడని విపత్తును విజయవాడ ప్రజలు ఎదుర్కొంటున్నారని చంద్రబాబు అభిప్రాయపడ్డారు. తుఫాన్లు, వరదలు గతంలో వచ్చినప్పటికీ నేటి పరిస్థితి పూర్తి భిన్నమని అన్నారు. ఆకస్మిక వరదల కారణంగా తాగునీరు కూడా దొరకని పరిస్థితి ఉందని ఆవేదన వ్యక్తం చేశారు. ప్రభుత్వం నుంచి సర్వశక్తులు ఒడ్డుతున్నామనీ, ప్రజలకు సహాయక కార్యక్రమాలు అందిస్తున్నామని వివరించారు. వరదల కారణంగా.. బైక్లు, కార్లు నీటమునిగాయని.. పలుచోట్ల దెబ్బతిన్నాయని చంద్రబాబు అన్నారు. ఇళ్లల్లోని టీవీలు, ఫ్రిజ్లు, ఏసీలు కూడా పాడైపోయాయన్న చంద్రబాబు.. ఇలాంటి పరిస్థితుల్లో బ్యాంకర్లు నిబంధనలు సరళతరం చేసి ప్రజలకు రుణాలు ఇవ్వాలని సూచించారు. అలాగే ఇన్సూరెన్స్ కంపెనీలు 10 రోజుల్లో వాహన, ఇతర బీమాను సెటిల్ చెయ్యాలని సూచించారు.
ఇక వాహనదారుల క్లెయిమ్స్14 రోజుల్లో పరిష్కరించాలన్న చంద్రబాబు.. ఆన్లైన్ విధానం ద్వారా త్వరతగతిన అవసరమైన ప్రక్రియ పూర్తిచెయ్యాలని బీమా కంపెనీలకు సూచించారు. వరద బాధిత ప్రాంత ప్రజల రుణాలు కాల పరిమితిని రీ షెడ్యూల్ చెయ్యాలని బ్యాంకర్లను కోరారు. యుద్ధ ప్రాతిపదికన రుణాలు మంజూరు చేయాలన్నారు. ప్రభుత్వం, బ్యాంకులు, బీమా కంపెనీలు అందరం కలిసి ప్రజలకు ధైర్యాన్ని ఇవ్వాలన్న చంద్రబాబు..వరద బాధితులకు వీలైనంత ఎక్కువగా సహాయం చేసేందుకు కేంద్ర ప్రభుత్వం, ఆర్.బి.ఐతో సంప్రదింపులు జరుపుతున్నట్లు చెప్పారు.
అలాగే గ్రామ, వార్డు సచివాలయాల్లో బాధితులు క్లెయిమ్ల కోసం దరఖాస్తు చేసుకునే అవకాశం కల్పిస్తామని వెల్లడించారు. వినియోగదారుల వద్ద ఉన్న డేటాతో పాటు మునిసిపల్ శాఖ, రవాణా శాఖల వద్ద ఉన్న డేటా సహాయంతో క్లెయిమ్ లకు దరఖాస్తు చేయాలని చంద్రబాబు సూచించారు. లోన్లు రీషెడ్యూల్, 10 రోజుల్లో క్లెయిమ్స్ పూర్తి చెయ్యాలనే ప్రభుత్వం ప్రతిపాదనలపై చర్చించుకుని రావాలని బ్యాంకర్లకు, బీమా కంపెనీలకు సూచించారు.
