Vijayawada Thefts In Flood Affected Areas,విజయవాడ వరదల్లో కక్కుర్తిగాళ్లు.. రాత్రిళ్లు గుట్టుచప్పుడు కాకుండా.. సిగ్గు లేకుండా ఇవేం పనులు! – thefts in flood affected area locked houses at vijayawada

విజయవాడ, చుట్టు పక్కల ప్రాంతాల ప్రజలు.. ఇళ్లు, వాహనాలు, ఇతర విలువైన వస్తువులు నీళ్లలో మునిగిపోవడంతో తీవ్రంగా నష్టపోయారు. ఇళ్లను ఖాళీ చేసి, తాళాలు వేసి సురక్షిత ప్రాంతాలకు, బంధువుల ఇళ్లకు వెళ్లిపోయారు. ఇదే అదునుగా భావించి కొందరు కక్కుర్తిగాళ్లు దొంగతనాలకు పాల్పడుతున్నారు. వరుసగా చోరీలతో జనాలు ఆందోళనలో ఉన్నారు.. అర్ధరాత్రి దాటిన తర్వాత జనాలు లేని సమయంలో దొంగలు షాపులు, ఇళ్లలో చోరీలు చేస్తున్నారు. విజయవాడతో పాటుగా చుట్టు పక్కల ప్రాంతాల్లో రెండు, మూడు ఘటనలు జరిగాయి.విజయవాడకు సమీపంలో ఉన్న నున్న పోలీస్‌స్టేషన్‌ పరిధిలోని ఓ మొబైల్ షాపులో చోరీ జరిగింది. అదే ప్రాంతంలో ఉన్న మరో మద్యం షాపులో కూడా దొంగలు చోరీ చేశఆరు.. షాపు తలుపులు పగలగొట్టి మద్యం బాటిళ్లు ఎత్తుకుపోయారు. విజయవాడలో వరదతో కార్లు, బైకులు రోడ్లపైనే వదిలేసిన పరిస్థితి.. వారం రోజులుగా వాహనాలు రోడ్లపైనే ఉన్నాయి. వరద కాస్త తగ్గుముఖం పట్టడంతో కొందరు వాహనాల్లో ఉన్న పెట్రోల్, టైర్లను ఎత్తుకెళుతున్నారు. పాయకాపురంలో అయితే ఒక అడుగు ముందుకేసి మూడు బైకుల్ని ఎత్తుకెళ్లారు. వీటని తీసుకెళ్లి తుక్కు షాపుల్లో అమ్మేసి క్యాష్ చేసుకుంటున్నారు.

విజయవాడలోని అజిత్‌సింగ్‌నగర్, నున్నలో జనాలు ఇళ్లకు తాళాలు వేసి వెళ్లిపోగా.. ఈ విషయాన్ని గమనించిన కొందరు కేటుగాళ్లు.. తాళాలు పగులగొట్టి లోపల ఉన్న విలువైన వస్తువుల్ని ఎత్తుకెళుతున్నారు. వాంబేకాలనీ, న్యూ రాజరాజేశ్వరిపేట ప్రాంతాల్లో కూడా చోరీలు జరిగాయి. రాత్రి వేళల్లో ఈ దొంగతనాలు చేస్తున్నారు. కొన్ని ప్రాంతాలు ఇంకా వరదలోనే ఉండటంతో దొంగలు చోరీలకు తెగబడతున్నారు. ఇలా వరుసగా చోరీలతో జనాలు బెంబేలెత్తిపోతున్నారు. రాత్రి సమయంలో దొంగతనాలు జరుగుతుండగా.. పగటి సమయంలో ఇళ్లకు వచ్చిన యజమానులు చోరీలతో కన్నీటిపర్యంతం అవుతున్నారు.

వరదలో జనాలు అల్లాడిపోతుంటే.. వాళ్ల ఇళ్లలో చోరీలు చేయడం మరీ దారుణంగా ఉంది. ఇలాంటి కష్ట సమయంలో సాయం చేయాల్సిందిపోయి.. దొంగతనాలు ఎలా చేస్తారంటూ ఆవేదన వ్యక్తం చేస్తున్నారు. వరద ప్రభావిత ప్రాంతాల్లో చోరీలు జరుగుతుండటంతో.. అక్కడ పోలీసులు గస్తీని కూడా ఏర్పాటు చేయలేని పరిస్థితి ఏర్పడింది. విజయవాడ, ఆ చుట్టుపక్కల ప్రాంతాల్లో జరుగుతున్న వరుస దొంగతనాలు వరద బాధితులకు కొత్త కష్టాల్లోకి నెట్టేస్తున్నాయి. మరోవైపు వరదలో మునిగి వాహనాలు, విలువైన వస్తువులకు సంబంధించి ప్రభుత్వం కీలక నిర్ణయం తీసుకుంది. వాహనాలకు సంబంధించి బీమా, రిపేర్లపై ఫోకస్ పెట్టింది. అలాగే టీవీలు, వాషింగ్ మెషిన్లు, ఏసీలు, ఇతర వస్తువుల రిపేర్లకు సంబంధించి ఆయా కంపెనీలతో మాట్లాడుతున్నారు. మరికొందరు స్థానిక మెకానిక్‌లు కొందరు ఉచితంగానే వరద బాధితులకు సర్వీస్ చేస్తున్నారు.