Flood Relief In Ap,AP Floods: వరద బాధితులకు అలర్ట్.. సాయం ప్రకటనకు ముహూర్తం ఫిక్స్ – ap government to announce flood relief to victims on september 17th

ఏపీలో వరద బాధితులకు అలర్ట్.. వరదల్లో సర్వం కోల్పోయిన వారికి ప్రభుత్వం పరిహారం అందించనుంది. దీనికి ప్రభుత్వం ముహూర్తం ఫిక్స్ చేసింది. వరద బాధితులకు సెప్టెంబర్ 17న సీఎం చంద్రబాబు నాయుడు వరద సాయం ప్రకటించనున్నారు. ఈ విషయాన్ని ఏపీ మంత్రి కొల్లు రవీంద్ర వెల్లడించారు. వరద సాయాన్ని ముఖ్యమంత్రి చంద్రబాబు నాయుడు ప్రకటించిన తర్వాత.. ప్రాంతాల వారీగా బాధితులకు సాయం అందించనున్నట్లు తెలిపారు. ఏపీలో ఇటీవల కురిసిన భారీ వర్షాలు, వరదల కారణంగా విజయవాడ సహా పలు జిల్లాల్లో నష్టం సంభవించింది. ముఖ్యంగా విజయవాడ భారీగా దెబ్బతింది. ప్రాణ నష్టంతో పాటుగా ఆస్తి నష్టం సంభవించింది. వరదల నుంచి ఇప్పడిప్పుడే విజయవాడ కోలుకుంటోంది.

వరదల కారణంగా కట్టుబట్టలతో ఇల్లు వదలి పునరావాస కేంద్రాలకు వెళ్లిన వారు.. తిరిగి ఇళ్లకు చేరుకున్నారు. ఇంటిని శుభ్రం చేసుకుని సాధారణ జీవితాన్ని ప్రారంభించేందుకు సిద్ధమవుతున్నారు. అయితే వరదల కారణంగా ఇంట్లోని సరుకులు, వస్తువులు కొట్టుకుపోయి ఇబ్బందులు పడుతున్నారు. ఈ నేపథ్యంలో వరద బాధితులను ఆదుకునేందుకు సాయం ప్రకటించేందుకు ప్రభుత్వం సిద్ధమైంది. మరోవైపు పదిరోజుల తర్వాత సీఎం చంద్రబాబు నాయుడు.. ఉండవల్లిలోని తన నివాసానికి వెళ్లారు. విజయవాడలో వరదలు సంభవించిన రోజు నుంచి కలెక్టరేట్‌లోనే చంద్రబాబు బస చేస్తున్నారు. సహాయక చర్యలు పూర్తయ్యే వరకూ ఇంటికి వెళ్లనని చెప్పిన చంద్రబాబు.. సహాయక చర్యల పర్యవేక్షణ కోసం ఇన్నిరోజులు కలెక్టరేట్‌లోనే ఉన్నారు. అక్కడి నుంచే బాధ్యతలు నిర్వహిస్తూ వచ్చారు.

విజయవాడ కలెక్టరేట్ నుంచే సహాయక చర్యలు పర్యవేక్షిస్తూనే.. క్షేత్రస్థాయిలో పర్యటించారు. బాధితులకు ఆహారం పంపిణీ చేయించారు. అలాగే జేసీబీ, ట్రాక్టర్ల మీద తిరుగుతూ ముంపు ప్రాంతాలను పరిశీలించిన చంద్రబాబు.. వరద బాధితులకు ధైర్యం చెప్పారు. ఈ క్రమంలోనే వినాయక చవితి, పెళ్లి రోజును కూడా కలెక్టరేట్‌లోనే జరుపుకున్న చంద్రబాబు.. ప్రస్తుతం పరిస్థితులు సాధారణ స్థితికి చేరుకోవటంతో.. తిరిగి ఉండవల్లిలోని నివాసానికి వెళ్లారు. బుడమేరు వాగు గండ్ల పూడ్చివేతను పరిశీలించిన తర్వాత.. ఉండవల్లిలోని ఇంటికి చంద్రబాబు చేరుకున్నారు.