Andhra Pradesh Brothers Suicide In Varanasi,ఏపీకి చెందిన బ్రదర్స్ వారణాసిలో ఆత్మహత్య.. ఏప్రిల్‌లోనే మిస్సింగ్, సెల్ఫీ వీడియోతో! – two brothers from andhra pradesh were found dead in varanasi ashram

ఆంధ్రప్రదేశ్‌‌కు చెందిన ఇద్దరు యువకులు ఉత్తరప్రదేశ్‌లోని వారణాసిలో ఆత్మహత్య చేసుకున్నారు. ఏలూరు జిల్లా నారాయణపురానికి చెందిన అన్నదమ్ములు లక్ష్మీనారాయణ, వినోద్ ఏప్రిల్‌లో ఇల్లు వదిలి వెళ్లిపోయారు. వీరు మే 12న తాము ఆత్మహత్య చేసుకుని చనిపోతున్నట్లు వీడియోను రికార్డ్ చేసి స్నేహితులకు పంపించారు. అప్పటి నుంచి లక్ష్మీనారాయణ, వినోద్ కోసం గాలిస్తున్నారు. అయితే రాజేష్ అనే వ్యక్తి ఫిర్యాదుతో మే 16న చేబ్రోలు పోలీస్టేషన్‌లో మిస్సింగ్‌ కేసు కూడా నమోదు చేశారు.ఈ క్రమంలో వారణాసి ప్రాంతంలోని భేల్‌పూర్‌ పోలీస్‌స్టేషన్‌ పరిధిలో.. మానసరోవర్‌ ప్రాంతంలో ఉన్న రామ్‌తారక్‌ ఆంధ్రా ఆశ్రమంలో వీరి గది నుంచి దుర్వాసన వచ్చింది. వెంటనే ఆశ్రమం సిబ్బంది పోలీసులకు సమాచారం ఇచ్చారు. గది తలుపులు తీయగా.. ఇద్దరు ఉరి వేసుకుని వేలాడుతున్నారు. ఘటనాస్థలానికి చేరుకున్న పోలీసులు మృతదేహాలను స్వాధీనం చేసుకుని.. కుటుంబ సభ్యులకు సమాచారం అందించారు.

లక్ష్మీనారాయణ, వినోద్ ఆగస్టు 28 నుంచి ఆశ్రమంలోని ఉన్నారని, తీర్థయాత్రల కోసం వచ్చినట్లు చెప్పారని ఆశ్రమం నిర్వాహకులు తెలిపారు. వీరు రెండు రోజుల క్రితం ఆత్మహత్య చేసుకుని ఉంటారని చెబుతున్నారు. అన్నదమ్ముల ఆత్మహత్యకు సంబంధించి ఓ సెల్ఫీ వీడియో కూడా బయటపడింది.క్రికెట్ బుకీ వేధింపుల వల్లనే ప్రాణాలు తీసుకున్నట్లు తెలుస్తోంది. కొందరు వ్యక్తుల కారణంగా తాము ఆత్మహత్యకు పాల్పడ్డామంటూ వారి పేర్లతో సహా వీడియోలో చెప్పుకొచ్చాడు. ఈ వీడియో ఆధారంగా పోలీసులు పూర్తి స్థాయిలో దర్యాప్తు చేస్తున్నారు.

పోలీసుల నుంచి సమాచారం అందడతో.. మృతదేహాలను తీసుకొచ్చేందుకు బంధువులు వారణాసి వెళ్లారు. అంతేకాదు అన్నదమ్ములిద్దరు రియల్ ఎస్టేట్, ఫైనాన్స్ వ్యాపారం చేసేవారని.. ఇంటి నుంచి వెళ్లిపోయిన సమయంలో ఆర్థిక లావాదేవీల విషయంలో కొందరు బెదిరిస్తున్నట్లు చెప్పారనే ప్రచారం కూడా జరుగుతోంది. ఈ ఘటనకు సంబంధించి పూర్తి వివరాలు తెలియాల్సి ఉంది. ఈ కేసును ఏపీకి బదిలీ చేసే అవకాశం ఉంది.. ఇప్పటికే మిస్సింగ్ కేసు నమోదు కావడంతో పాటుగా కొందరిపై వీరు ఆరోపణలు చేయడంతో.. వారణాసి నుంచి చేబ్రోలు పోలీసులకు కేసును బదిలీ చేసే అవకాశం ఉందంటున్నారు.