Mla Adimulam Case,ఎమ్మెల్యే ఆదిమూలంపై ఆరోపణలు చేసిన మహిళ ఆస్పత్రి నుంచి డిశ్చార్జి.. కేసు అప్‌డేట్స్.. – satyavedu mla koneti adimulam case victim medical tests completed in tirupati hospital

చిత్తూరు జిల్లా సత్యవేడు ఎమ్మెల్యే కోనేటి ఆదిమూలంపై మహిళ చేసిన ఆరోపణల వ్యవహారంలో పోలీసుల విచారణ కొనసాగుతోంది. దర్యాప్తులో భాగంగా.. బాధితురాలికి వైద్య పరీక్షలు నిర్వహించారు డాక్టర్లు. బుధవారం (సెప్టెంబర్ 11) మధ్యాహ్నం తిరుపతిలోని ప్రసూతి ఆసుపత్రిలో బాధితురాలు అడ్మిట్ అయ్యారు. లైంగిక ఆరోపణలు నేపథ్యంలో రక్త పరీక్షలతో పాటు వివిధ వైద్య పరీక్షలు పూర్తి చేశారు వైద్యులు. ఆరు విభాగాల అధిపతులతో వైద్య పరీక్షలు నిర్వహించారు. రక్త నమూనాలతో పాటు, ప్రెగ్నెన్సీ, నెయిల్స్, హెయిర్ నమూనాలు సేకరించారు. స్కానింగ్ పరీక్షలు కూడా నిర్వహించారు. కొన్ని నమూనాలను రీజినల్ ఫోరెన్సిక్ ల్యాబ్‌కు పంపించినట్లు వైద్యులు తెలిపారు.వైద్య పరీక్షలు పూర్తైన అయిన అనంతరం బాధితురాలు ఆస్పత్రి నుంచి డిశ్చార్జ్ అయ్యారు. మీడియాతో మాట్లాడేందుకు నిరాకరించారు.

బాధితురాలు తొలుత వైద్య పరీక్షలకు అంగీకరించలేదు. కేసు దర్యాప్తులో భాగంగా పరీక్షలు చేయించుకోవాలని పోలీసులు సూచించగా.. ఆమె తిరస్కరించి వెళ్లిపోయారు. పోలీసులు ఆమెకు కౌన్సిలింగ్ ఇవ్వడంతో టెస్టులు చేయించుకునేందుకు అంగీకరించారు. అయితే, వైద్య పరీక్షలను తిరుపతి రుయా ఆస్పత్రిలో కాకుండా ప్రసూతి ఆస్పత్రిలో చేయించుకుంటానని కోరడంతో పోలీసులు అందుకు ఏర్పాట్లు చేశారు.

పోలీసుల సహకారంతో బాధితురాలు బుధవారం మెటర్నిటీ ఆస్పత్రిలో వైద్య పరీక్షల కోసం జాయిన్ అయ్యారు. రెండు రోజుల పాటు ఆస్పత్రిలోనే ఉండి వైద్య పరీక్షలు చేయించుకునేందుకు సిద్ధపడి వచ్చిన బాధితురాలు.. ఆ మేరకు టెస్టులన్నీ చేయించుకున్నారు.

మరోవైపు.. చెన్నై అపోలో ఆస్పత్రిలో చికిత్స పొందుతున్న ఎమ్మెల్యే ఆదిమూలం కూడా డిశ్చార్జ్ అయ్యారు. అనంతరం చెన్నై నుంచి పుత్తూరులోని తన నివాసానికి చేరుకున్నారు. ఎమ్మెల్యే నివాసం వద్ద పోలీసులు బారీకేడ్లను ఏర్పాటు చేశారు. సెక్యూరిటీ సిబ్బంది ఎమ్మెల్యే నివాసం వద్దకు ఇతరులెవరినీ అనుమతించలేదు.

సత్యవేడు ఎమ్మెల్యే కోనేటి ఆదిమూలం తిరుపతి నగరంలోని బీమాస్ హోటల్‌ గదిలో తనపై లైంగిక దాడి చేశాడని తెలుగుదేశం పార్టీకి చెందిన మహిళ చేసిన ఆరోపణలు ఆంధ్రప్రదేశ్ రాజకీయాల్లో సంచలనం సృష్టించిన సంగతి తెలిసిందే.