Chandrababu Naidu Flood Package,AP Flood Package: వరద బాధితులకు ఏపీ ప్రభుత్వం ప్రత్యేక ప్యాకేజీ.. ఎవరికి ఎంతంటే? – cm chandrababu naidu announced special package for flood victims in andhra pradesh

AP Govt Special package for Flood Victims: ఏపీలో ఇటీవల వరదలు బీభత్సం సృష్టించిన సంగతి తెలిసిందే. ముఖ్యంగా విజయవాడ అల్లాడిపోయింది. పదుల సంఖ్యలో ప్రజలు చనిపోయారు. భారీగా ఆస్తి, పంట నష్టం జరిగింది. వందల కుటుంబాలు నష్టపోయి.. ఇబ్బందులు పడుతున్నాయి. ఈ నేపథ్యంలో వరద బాధితులకు ఏపీ ప్రభుత్వం ప్రత్యేక ప్యాకేజీ ప్రకటించింది. సచివాలయంలో నిర్వహించిన మీడియా సమావేశంలో సీఎం చంద్రబాబు నాయుడు ఈ వివరాలను వెల్లడించారు. వరదల్లో ఇళ్లు కోల్పోయిన వారికి ఇళ్లు కట్టిస్తామన్న చంద్రబాబు.. వరదల కారణంగా నష్టపోయిన ప్రతి ఇంటికీ రూ.25 వేలు ఆర్థిక సాయం చేస్తున్నామన్నారు. ఈ ఆర్థిక సాయాన్ని కూడా ఎవరికి ఎలా అందిస్తామనే వివరాలను చంద్రబాబు వివరించారు. ఫస్ట్ ఫ్లోర్‌లో ఉండే వారికి రూ.10 వేలు, ఇంట్లోకి వరద నీరు వచ్చినవారికి రూ.10 వేలు ఇస్తామని చంద్రబాబు ప్రకటించారు.

అలాగే వరదల కారణంగా దెబ్బతిన్న ద్విచక్ర వాహనాలకు మూడు వేలు, మూడు చక్రాల వాహనాలకు రూ.10 వేలు, చిరు వ్యాపారులకు 25 వేల రూపాయల చొప్పున పరిహారం అందించనున్నట్లు చంద్రబాబు ప్రకటించారు. వరదల్లో నష్టపోయిన మత్స్యకారులను ఆదుకుంటామన్న చంద్రబాబు.. ఫిషింగ్ బోట్, నెట్ పూర్తిగా దెబ్బతింటే 20 వేల రూపాయలు, పాక్షికంగా దెబ్బతింటే రూ.9 వేలు చెల్లిస్తామన్నారు. వరి సాగు చేసిన రైతులకు ఎకరాకు రూ.10 వేలు, చెరుకుకు ఎకరాకు రూ.25 వేలు చెల్లించనున్నట్లు వెల్లడించారు. పత్తికి హెక్టారుకు రూ.25 వేలు, వేరుశెనగ, మొక్కజొన్న, రాగులు, కొర్ర, సాములకు రూ.15 వేలు చొప్పున, అరటికి రూ.35 వేలు చొప్పున సాయం చేస్తామన్నారు. అలాగే సెరీ కల్చర్‌కు రూ.6 వేల చొప్పున పరిహారం చెల్లి్స్తామని చంద్రబాబు నాయుడు మీడియా సమావేశంలో ప్రకటించారు.

మరోవైపు వరదల్లో నష్టపోయిన సూక్ష్మ చిన్నతరహా పరిశ్రమలకు సైతం సాయం చేస్తామని చంద్రబాబు ప్రకటించారు. 40 లక్షల నుంచి కోటిన్నర వరకూ టర్నోవర్ ఉన్న వాటికి లక్ష రూపాయలు.. కోటిన్నరకు పైగా టర్నోవర్ ఉన్న పరిశ్రమలకు ఒకటిన్నర లక్ష చొప్పున పరిహారం ఇస్తామని తెలిపారు. గొర్రెలకు 7 వేల 500, ఎద్దులకు 40 వేలు, పశువులకు రూ.50 వేలు ఇలా పశువులను కోల్పోయిన రైతులకు కూడా పరిహారం అందిస్తామని చంద్రబాబు ప్రకటించారు. మరోవైపు వరదల కారణంగా ఏపీలో రూ.6880 కోట్లు నష్టం జరిగిందని ఇప్పటికే ప్రభుత్వం కేంద్రానికి ప్రాథమిక నివేదిక సమర్పించింది. వరద సాయంపై కేంద్రం నుంచి కూడా ప్రకటన రావాల్సి ఉంది.