Amaravati Statutory Status,ఢిల్లీలో చంద్రబాబు.. అమిత్ షాకు స్పెషల్ రిక్వెస్ట్, అమరావతికి కేంద్రం నుంచి శుభవార్త! – ap cm chandrababu naidu meet union minister amit shah and request on amaravati statutory status

కేంద్ర ప్రభుత్వం అమలు చేస్తున్న పథకాలలో రాష్ట్రానికి రావాల్సిన వాటాను పెంచాలని చంద్రబాబు కోరారు. ముఖ్యంగా గృహ నిర్మాణం, రహదారులు, రైల్వే ప్రాజెక్టుల వంటి కీలక రంగాలకు ప్రాధాన్యత ఇవ్వాలన్నారు. రాష్ట్ర ఆర్థిక పరిస్థితిని మెరుగుపరచడానికి, రెవెన్యూలోటును పూడ్చడానికి కేంద్రం చర్యలు తీసుకోవాలని కోరారు. అంతేకాకుండా, రాష్ట్రంలోని వెనుకబడిన ప్రాంతాల అభివృద్ధికి మరిన్ని నిధులు కేటాయించాలని ఆయన విజ్ఞప్తి చేశారు. ప్రత్యేకించి, రాయలసీమ ప్రాంతాన్ని హార్టికల్చర్‌ (ఉద్యానవన) కేంద్రంగా తీర్చిదిద్దడానికి బడ్జెట్‌లో తగినన్ని నిధులు కేటాయించాలని చంద్రబాబు కేంద్ర ప్రభుత్వాన్ని కోరారు. ఈ ప్రతిపాదనలు రాష్ట్ర అభివృద్ధికి దోహదపడతాయని ఆయన అభిప్రాయపడ్డారు. పూర్వోదయ పథకం కింద రాష్ట్రం పంపిన ప్రతిపాదనలకు ఆమోదం తెలిపి, నిధులు విడుదల చేయాలని చంద్రబాబు అమిత్ షాను కోరారు. రాష్ట్రంలో దెబ్బతిన్న రోడ్లు, భవనాలు వంటి మౌలిక సదుపాయాలను బాగుచేయడానికి ఆర్థిక సాయం కోరారు. రాష్ట్రంలో పెద్ద పెద్ద పరిశ్రమలు పెట్టడానికి కేంద్రం నుంచి ఆర్థిక సహాయం అందాలని, అనుమతులు కూడా త్వరగా ఇవ్వాలని విజ్ఞప్తి చేశారు.

గిరిజన ప్రాంతమైన రంపచోడవరం కేంద్రంగా పోలవరం జిల్లాను ఏర్పాటు చేశామని, ఆ ప్రాంతం అభివృద్ధి చెందడానికి హోంశాఖ నుంచి తగినన్ని నిధులు ఇవ్వాలని చంద్రబాబు కోరారు. పోలవరం, అమరావతి ప్రాజెక్టులను అనుకున్న సమయానికి పూర్తి చేయడానికి కేంద్రం చేయూతనివ్వాలని విజ్ఞప్తి చేశారు. విశాఖపట్నంలో జరిగిన పెట్టుబడుల సదస్సులో చేసుకున్న ఒప్పందాల ప్రకారం పరిశ్రమలు ఏర్పాటు చేయడానికి రాష్ట్ర ప్రభుత్వం తీసుకుంటున్న చర్యలను అమిత్ షాకు వివరించారు. తాను ఈరోజే పోలవరం ప్రాజెక్టును సందర్శించి వచ్చానని, అక్కడి పనుల పురోగతి గురించి కూడా అమిత్ షాకు తెలియజేశారు. మరోవైపు చంద్రబాబు ఎల్జీ ప్రతినిధులతో కూడా సమావేశం అయ్యారు. శ్రీసిటీలో ఏర్పాటు చేసిన కొత్త పరిశ్రమపై చర్చించారు.