Vijayawada Durgamma Sri Bala Tripura Sundari Devi,విజయవాడ ఇంద్రకీలాద్రిపై దసరా ఉత్సవాలు.. శ్రీ బాలా త్రిపుర సుందరి దేవిగా దుర్గమ్మ, భక్తుల రద్దీ – vijayawada durgamma as sri bala tripura sundari devi alankaram on dasara navaratri utsavalu day 1

విజయవాడ ఇంద్రకీలాద్రిపై కొలువై ఉన్న దుర్గమ్మ ఆలయంలో దసరా శరన్నవరాత్రి మహోత్సవాలు ఘనంగా ప్రారంభమయ్యాయి. ఇవాళ తొలిరోజు (గురువారం) అమ్మవారికి అర్చకులు స్నాపనాభిషేకం నిర్వహించి.. అనంతరం 9 గంటలకు భక్తులకు దర్శనం కల్పించారు. అమ్మవారు ఇవాళ శ్రీ బాలా త్రిపుర సుందరి దేవిగా అమ్మవారి దర్శనం ఇస్తున్నారు. అమ్మవారి దర్శనం కోసం గురువారం తెల్లవారుజాము నాలుగు గంటల నుంచి వినాయకుని గుడి దగ్గర క్యూ లైన్‌లో భక్తులు వేచి ఉన్నారు. దసరా శరన్నవరాత్రుల్లో అమ్మవారు రోజుకోక అలంకరణలో భక్తులకు దర్శనం ఇస్తారు. విజయవాడ దుర్గా ఘాట్ దగ్గర నవ హారతులను కూడా ప్రారంభించారు.ఆలయ అధికారులు శరన్నవరాత్రి మహోత్సవాలు సందర్భంగా భక్తులకు భారీ ఏర్పాట్లు చేశారు. సాధారణ భక్తులు వినాయకుడి ఆలయం నుంచి ఉన్న మూడు క్యూల్లో ఘాట్‌రోడ్డు మీదుగా కొండపైకి వెళ్లాల్సి ఉంటుంది. ఓం మలుపు దగ్గర ఈ మూడు క్యూలు ఐదుగా మారతాయి.. వీటిలో ఒకటి రూ.500, వీఐపీ కోటాలో వచ్చిన వారికి, మరొకటి రూ.300, ఇంకొకటి రూ.100 భక్తులకు కేటాయించారు. మిగిలిన రెండు క్యూల్లో ఉచిత దర్శనం భక్తులు అమ్మవారి దర్శనానికి వెళతారు. తొలి రోజు మినహా మిగతా రోజుల్లో తెల్లవారుజామున 3 గంటల నుంచి భక్తుల్ని దర్శనానికి అనుమతిస్తారు.

దసరా నవరాత్రి ఉత్సవాల సమయంలో.. ప్రతిరోజు ఉదయం 4 గంటల నుంచి రాత్రి 11 గంటల వరకూ భక్తులను అమ్మవారి దర్శనాలకు అనుమతిస్తారు. తొలిరోజు మాత్రం ఉదయం 9 గంటల తర్వాత నుంచి దర్శనాలు ప్రారంభం అయ్యాయి. ఈసారి దసరా వేడుకలు జరిగే తొమ్మిది రోజులతో పాటుగా ఈనెల 13, 14 వరకూ అంతరాలయం దర్శనాలు పూర్తిగా ఆపేస్తున్నట్లు ఆలయ అధికారులు తెలిపారు. ముఖమండప దర్శనాలకు మాత్రమే అనుమతిస్తారన్నారు.

దుర్గమ్మకు నైవేద్యాలు సమర్పించే సమయాల్లో భక్తుల్ని దర్శనానికి అనుమతించరు. అమ్మవారికి సమర్పించే ప్రతి నైవేద్యానికి 10-15 నిమిషాల సమయం పడుతుంది. మొత్తం మీద అరగంట వరకు దర్శనం నిలిపివేశారు.. ఇక ప్రతి రోజూ సాయంత్రం అమ్మవారికి సమర్పించే మహానివేదన సమయంలో గంటపాటు దర్శనానికి బ్రేక్‌ ఇస్తారు. ప్రతి రోజూ ఆలయం తెరిచిన తర్వాత వేకువజామున 3 గంటలకు అమ్మవారిని మేల్కొలుపుతారు. స్నపన కార్యక్రమాలు నిర్వహించి అభిషేకం చేస్తారు.. నివేదనగా అమ్మవారికి పాలను సమర్పిస్తారు. అనంతరం అమ్మవారిని అలంకరిస్తారు.. ఈ కార్యక్రమాలు 6 గంటల వరకు సాగుతాయి. ఉదయం 7 గంటల వరకు అర్చన.. అమ్మవారికి పులిహోర, లడ్డూ, చక్రపొంగలి, బెల్లపు పొంగలి, శెనగలు నివేదనగా ఇస్తారు. దుర్గమ్మకు నైవేద్యం సమర్పించే సమయంలో భక్తులను దర్శనానికి అనుమతించరు. మళ్లీ ఉదయం 9 గంటలకు.. మధ్యాహ్నం 12 గంటల నుంచి 1 గంట మధ్య.. సాయంత్రం 4 గంటలకు.. సాయంత్రం 6-7 గంటల మధ్య అమ్మవారికి మహానివేదన ఇస్తారు.మహానివేదన అనంతరం పంచహారతులు కూడా ఇస్తారు.