Samayam Telugu•
కోనసీమ జిల్లా మలికిపురం బ్లో అవుట్ బాధిత కుటుంబాలకు ఓఎన్జీసీ ఆర్థిక సాయం ప్రకటించింది. ఇరుసమండ బ్లో అవుట్ ఘటనలో బాధిత కుటుంబాలకు ఒక్కో కుటుంబానికి 10 వేలు చొప్పున అందించనుంది. శనివారం కలెక్టరేట్లో జరిగిన సమావేశంలో ఈ వివరాలు వెల్లడించారు. మొత్తం 6300 కుటుంబాలకు ఫిబ్రవరి నెల మొదటి వారంలో ఆర్థిక సాయం అందించనున్నారు. అలాగే రైతులకు కూడా ఆర్థిక సాయం అందిస్తామని అధికారులు తెలిపారు.
ఇరుసుమండతో పాటుగా లక్కవరం, గుబ్బల పాలెం, చింతలపల్లి గ్రామాలలోని 6,300 కుటుంబాలకు ఆర్థిక సాయం అందించనున్నారు. బాధిత కుటుంబాలకు ఫిబ్రవరి మొదటి వారంలో ఆర్థిక సహాయం అందుతుందని అధికారులు వెల్లడించారు. సీఎం నారా చంద్రబాబు నాయుడు ఆదేశాల మేరకు ఈ ఆర్థిక సాయం అందిస్తున్నట్టు అధికారులు, ఓఎన్జీసీ ప్రతినిధులు వెల్లడించారు. మరోవైపు మలికిపురం బ్లోఅవుట్ కారణంగా పలువురు రైతులు పంటలు కూడా నష్టపోయారు. ఈ రైతులకు కూడా ఆర్థిక సాయం అందించనున్నారు.
కోనసీమలో భారీగా గ్యాస్ లీక్.. భయాందోళనలో జనం
మరోవైపు ఇరుసమండలోని మోరి-5 డ్రిల్లింగ్ సైట్లో ఉన్న బావిలో జనవరి 5న బ్లో అవుట్ సంభవించిన సంగతి తెలిసిందే. అధికారులు ఐదురోజుల పాటు శ్రమించి మంటలను నియంత్రించారు. ఇందుకోసం ఓఎన్జీసీకి చెందిన నిపుణుల బృందం తీవ్రంగా శ్రమించింది. గూడపల్లి పంట కాల్వ నుంచి నీటిని తీసుకువచ్చి మంటలను నియంత్రించారు. భారీ పైపులతో మంటలపై నీళ్లు చల్లి.. అగ్ని కీలలను నియంత్రించారు.
బ్లో అవుట్ కారణంగా భారీ యంత్రాలు కూడా కాలిపోయాయి. ఈ శకలాలనుభారీ క్రేనుల సహాయంతో తరలించారు. ఇరుసమండ బ్లో అవుట్ కారణంగా 3 లక్షల క్యూబిక్ మీటర్ల గ్యాస్ దగ్ధమైనట్లు అధికారులు అంచనా వేశారు. బ్లో అవుట్ జరిగిన ప్రదేశానికి కిలోమీటర్ పరిధి వరకూ అధికారులు ఇంటింటా సర్వే జరిపారు. పంట నష్టం వివరాలను అంచనా వేశారు.
