అతిపెద్ద ఆధ్యాత్మిక సమ్మేళనం మహాకుంభమేళాకు భక్తులు పోటెత్తుతున్నారు. త్రివేణి సంగమంలో పవిత్ర స్నానాలు ఆచరిస్తున్నారు. మనదేశంలోని వివిధ రాష్ట్రాల నుంచి మాత్రమే కాకుండా విదేశాల నుంచి కూడా భక్తులు తరలివస్తున్నారు. ఈ నేపథ్యంలో ఏపీ నుంచి కుంభమేళాకు వెళ్లేవారి కోసం ఏపీఎస్ఆర్టీసీ ప్రత్యేక ప్యాకేజీ ప్రకటించింది. ప్రత్యేక బస్సును ఏర్పాటు చేసింది. కొవ్వూరు డిపో నుంచి ప్రయాగ్రాజ్ మహాకుంభమేళాకు బస్సును ఏర్పాటు చేశారు. ఏడు రోజుల పాటు ఈ యాత్ర జరుగుతుందని తెలిపారు. అవకాశాన్ని సద్వినియోగం చేసుకోవాలని సూచించారు.
తూర్పుగోదావరి జిల్లా కొవ్వూరు ఏపీఎస్ఆర్టీసీ డిపో అధికారులు మహాకుంభమేళాకు వెళ్లే వారి కోసం ప్రత్యేక బస్సు ఏర్పాటు చేశారు. ఈ విషయాన్ని కొవ్వూరు డిపో అధికారులు ఓ ప్రకటనలో తెలియజేశారు. కొవ్వూరు డిపో నుంచి బయల్దేరనున్న బస్సు.. వివిధ పుణ్యక్షేత్రాల మీదుగా ప్రయాగ్రాజ్ చేరుకుంటుంది. ఆ తర్వాత తిరిగి కొవ్వూరు వస్తుందని.. మొత్తం ఏడు రోజుల పాటు యాత్ర జరుగుతుందని అధికారులు చెప్పారు.
ఫిబ్రవరి ఒకటో తేదీ మధ్యాహ్నం 2 గంటలకు కొవ్వూరు డిపో నుంచి బస్సు బయల్దేరుతుందని డిపో అధికారులు తెలిపారు. భువనేశ్వర్, పూరి, కోణార్క్, ప్రయాగ్రాజ్ కుంభమేళాకు చేరుకుంటుంది. ఆ తర్వాత వారణాసి, గయ, బుద్ధ గయ, అరసవల్లి, శ్రీకూర్మం మీదుగా కొవ్వూరు చేరుకుంటుందని ఆర్టీసీ అధికారులు తెలిపారు. మొత్తం 7 రోజుల పాటు ఈ యాత్ర జరుగుతుందని వివరించారు.
ప్యాకేజీలో భాగంగా ప్రయాగ్రాజ్, కాశీలలో ఒక రోజు బస ఉంటుందని.. అలాగే ఉదయం అల్పాహారం, మధ్యాహ్న భోజనం, రాత్రిపూట అల్పాహారం అందిస్తామని తెలిపారు. యాత్ర సమయంలో ప్రయాణికులకు అనుకూలంగా ఉండేదుకు యాప్ కూడా రూపొందించారు. ఈ యాప్ సాయంతో ప్రయాణికులు ఎక్కడ ఉన్నా కూడా బస్సు వద్దకు చేరుకోవచ్చు. ఈ ప్యాకేజీలో భాగంగా ఒక్కరికి రూ.10 వేలు చొప్పున టికెట్ రేటు నిర్ణయించారు. ఇక ప్రయాణికుల కోసం సూపర్ లగ్జరీ వీడియో కోచ్ బస్సును ఏర్పాటుచేశారు. ఆసక్తి ఉన్న వారు తమను సంప్రందించి పేర్లు నమోదు చేసుకోవాలని విజ్ఞప్తి చేశారు.
రచయిత గురించివంకం వెంకటరమణవంకం వెంకటరమణ సమయం తెలుగులో డిజిటల్ కంటెంట్ ప్రొడ్యూసర్గా పని చేస్తున్నారు. ఇక్కడ క్రీడావార్తలతో పాటు జాతీయ, అంతర్జాతీయ వ్యవహారాలకు సంబంధించిన తాజా వార్తలు, ప్రత్యేక కథనాలు అందిస్తుంటారు. ఆయనకు జర్నలిజంలో 6 సంవత్సరాల అనుభవం ఉంది. గతంలో ప్రముఖ మీడియా సంస్థల్లో స్పోర్ట్స్, పొలిటికల్ న్యూస్, ఇతర రంగాలకు సంబంధించి వార్తలు రాశారు.… ఇంకా చదవండి
