అనంతపురం కలెక్టర్ వినోద్ కుమార్ కీలక నిర్ణయం తీసుకున్నారు. అధికారిక సమావేశాల్లో సెల్ ఫోన్ వినియోగంపై నిషేధం విధించారు. అధికారిక సమావేశాలకు వచ్చే ముందు ఫోన్లు స్విఛాఫ్ చేయాలని.. కుదరని పక్షంలో సైలెంట్లో ఉంచాలని సూచించారు. అలా కాకుండా సమావేశం మధ్యలో సెల్ ఫోన్ వాడితే శాఖపరమైన చర్యలు తీసుకుంటామని వార్నింగ్ ఇచ్చారు. ఈ మేరకు అనంతపురం జిల్లా కలెక్టర్ ప్రత్యేక ఉత్తర్వులు జారీ చేశారు. ఇటీవల జరిగిన ఓ సమావేశంలో డీఆర్వో మలోల ఆన్ లైన్ రమ్మీ ఆడుతూ దొరికిన ఘటన తెలిసిందే. ఈ నేపథ్యంలో కలెక్టర్ ఈ నిర్ణయం తీసుకున్నారు.
అయితే అనంతపురం జిల్లా కలెక్టర్ వినోద్ కుమార్ ఇంతటి కీలక నిర్ణయం తీసుకోవడం కూడా ఓ కారణముంది. ఇటీవల అనంతపురం జిల్లా కలెక్టరేట్లోని రెవెన్యూ భవన్లో ఓ సమీక్షా సమావేశం నిర్వహించారు. ఎస్సీ ఉప వర్గీకరణ కమిషన్ ఛైర్మన్ రాజీవ్ రంజన్ మిశ్రా సమావేశంలో ఈ సమావేశం జరిగింది. అయితే ఈ సమావేశంలో డీఆర్వో మలోల ఆన్లైన్లో జూదం ఆడటం సంచలనం రేపింది. అధికారిక సమావేశంలో జిల్లా స్థాయి ఉన్నతాధికారి ఇలా నిర్లక్ష్యంగా వ్యవహరించడం సంచలనం రేపింది. దీనికి సంబంధించిన వీడియో నెట్టింట వైరల్ కావటంతో సర్వత్రా విమర్శలు వ్యక్తమయ్యాయి. కలెక్టర్ సహా అధికారులు అందరూ ఓ పక్కన సమావేశంలో లీనమై ఉంటే.. డీఆర్వో మాత్రం ఆన్లైన్ రమ్మీ ఆడటంపై నెటిజన్ల నుంచి కూడా విమర్శలు వచ్చాయి.
సోషల్ మీడియాలో ఈ వీడియో వైరల్ కావటంతో డీఆర్వో మలోల తీరుపై రాష్ట్రవ్యాప్తంగా చర్చ జరిగింది. ఈ నేపథ్యంలో ఈ వ్యవహారంపై అనంతపురం జిల్లా కలెక్టర్ వినోద్ కుమార్ విచారణకు ఆదేశించారు. డీఆర్వో మలోలను విచారించాల్సిందిగా జాయింట్ కలెక్టర్ను కలెక్టర్ వినోద్ కుమార్ ఆదేశింఛారు. డీఆర్వో మలోల ఎపిసోడ్ నేపథ్యంలో అధికారులు ఎవరూ మరోసారి ఇలా ప్రవర్తించకుండా ఉండేందుకు జిల్లా కలెక్టర్ వినోద్ కుమార్.. తాజాగా ఈ మొబైల్ ఫోన్ నిషేధం ఆదేశాలు జారీ చేసినట్లు తెలిసింది. ఆదేశాలను అతిక్రమించి అధికారిక సమావేశంలో సెల్ ఫోన్ వాడితే కఠిన చర్యలు ఉంటాయని జిల్లా కలెక్టర్ హెచ్చరిస్తున్నారు.
రచయిత గురించివంకం వెంకటరమణవంకం వెంకటరమణ సమయం తెలుగులో డిజిటల్ కంటెంట్ ప్రొడ్యూసర్గా పని చేస్తున్నారు. ఇక్కడ క్రీడావార్తలతో పాటు జాతీయ, అంతర్జాతీయ వ్యవహారాలకు సంబంధించిన తాజా వార్తలు, ప్రత్యేక కథనాలు అందిస్తుంటారు. ఆయనకు జర్నలిజంలో 6 సంవత్సరాల అనుభవం ఉంది. గతంలో ప్రముఖ మీడియా సంస్థల్లో స్పోర్ట్స్, పొలిటికల్ న్యూస్, ఇతర రంగాలకు సంబంధించి వార్తలు రాశారు.… ఇంకా చదవండి
