తిరుపతి జిల్లా పోలీసులు సాంకేతికతను ఉపయోగించి నేరాలను అరికడుతున్నారు. డ్రోన్ల ద్వారా నాటుసారా తయారీని, హిజ్రాల ఆగడాలను అడ్డుకున్నారు. తాజాగా, మత్తు ఇంజెక్షన్లు వాడుతున్న యువతను డ్రోన్ కెమెరాల ద్వారా గుర్తించి అరెస్టు చేశారు. స్వర్ణముఖి నది వద్ద కొంతమంది మత్తు పదార్థాలు సేవిస్తూ పోలీసులకు కనిపించారు. డ్రోన్ల సహాయంతో రాత్రి వేళల్లో మద్యం సేవిస్తున్న వారిని కూడా గుర్తించి పోలీసులు చర్యలు తీసుకుంటున్నారు.
తిరుపతి జిల్లా ఎస్పీ హర్షవర్ధన్ రాజు ఆదేశాలతో సైబర్ క్రైం అలాగే డ్రోన్ టీం కలిసి మత్తు ఇంజెక్షన్లు, ట్యాబ్లెట్లు వినియోగిస్తున్న కొంతమంది యువతను అరెస్టు చేశారు. 8 మంది యువత స్వర్ణముఖి నదికి సమీపంలో.. శంకర్ నాయుడు కాలనీకి అనుకుని నిర్మానుష్య ప్రాంతంలో మాటేశారు. ఆ చెట్ల పొదల మధ్య మత్తు ఇంజెక్షన్స్, మత్తు బిల్లలు వినియోగిస్తున్నారు. అయితే, ఈ సమయంలోనే డ్రోన్ కెమెరాతో తిరుపతి పోలీసులు బీట్ నిర్వహిస్తున్నారు. అలా 8 మంది యువత వీరికంట పడ్డారు. ఇంకేముంది వారి కదలికలను డ్రోన్‌తో ట్రాక్ చేయడం మెుదలుపెట్టారు.
వీరి కదలికలను గమనిస్తూ వచ్చిన ఈగల్ టీం, స్పెషల్ పార్టీ పోలీసులు వారు వెళ్లే దారిలో మాటు వేశారు. వారికి తెలియకుండానే వెనుక నుంచి పట్టుకునే ప్రయత్నం చేశారు. ఈ క్రమంలో పోలీసులను గమనించి పారిపోయే ప్రయత్నం చేశారు. కానీ పోలీసులు వెంటాడి మరి ఇద్దరు యువకులను పట్టుకున్నారు. మిగిలిన ఆరుగురి కోసం గాలింపు చర్యలు చేపట్టారు. అరెస్టు చేసిన ఇద్దరు యువకులలో ఓ యువకుడు తిరుచానూరు పోలీస్ స్టేషన్‌లో గంజాయి కేసులో నిందితుడిగా ఉన్నట్టు పోలీసులు గుర్తించారు.
స్వర్ణముఖి నది ఒడ్డున.. చెట్ల పొదల మాటున.. పని కానిచ్చేద్దామనుకున్నారు కానీ..!
ఇదే కాదు.. తాజాగా తిరుపతి రూరల్ పరిధిలోని అవిలాల, తుమ్మలగుంట, గొల్లపల్లి లాంటి చాలా గ్రామాల్లో నైట్ బీట్ నిర్వహిస్తుండగా కొంతమంది యువత తారసపడ్డారు. రోడ్డు పక్కన మద్యం సేవిస్తున్న వారిని గుర్తించిన డ్రోన్ కెమెరాలు సైరన్ వేశాయి. దీంతో పోలీసులకు భయపడి యువత అక్కడి నుంచి పారిపోయారు. పోలీసుల చేస్తున్న పని పట్ల యువత కుటుంబ సభ్యులు కృతజ్ఞతలు చెబుతున్నారు. అలాగే పలుచోట్ల చెట్ల తొర్రల్లో దాచిన అక్రమ మద్యం సైతం డ్రోన్ కెమెరాలు గుర్తించిన సంఘటనలు ఇటీవల చూశాం. ఇలా పగలు, అర్థరాత్రి అనే తేడా లేకుండా పోలీసులు డ్రోన్లు వినియోగిస్తూ నేరాలను అరికడుతున్నారు. ఇందుకోసం ప్రత్యేకంగా తిరుపతి జిల్లా పోలీసులకు డ్రోన్ ఫ్లైయింగ్‌పై ట్రైనింగ్ కూడా ఇచ్చారు.
రచయిత గురించివంకం వెంకటరమణవంకం వెంకటరమణ సమయం తెలుగులో డిజిటల్ కంటెంట్ ప్రొడ్యూసర్‌గా పని చేస్తున్నారు. ఇక్కడ క్రీడావార్తలతో పాటు జాతీయ, అంతర్జాతీయ వ్యవహారాలకు సంబంధించిన తాజా వార్తలు, ప్రత్యేక కథనాలు అందిస్తుంటారు. ఆయనకు జర్నలిజంలో 6 సంవత్సరాల అనుభవం ఉంది. గతంలో ప్రముఖ మీడియా సంస్థల్లో స్పోర్ట్స్, పొలిటికల్ న్యూస్, ఇతర రంగాలకు సంబంధించి వార్తలు రాశారు.… ఇంకా చదవండి
