శ్రీవారి భక్తుల విజ్ఞప్తి మేరకు టీటీడీ స్థానిక ఆలయాలు, సమాచార కేంద్రాలలో కూడా తిరుమల లడ్డూ ప్రసాదాలను విక్రయిస్తున్నట్లు ఈవో శ్యామలరావు చెప్పారు. తిరుచానూరు పద్మావతి అమ్మవారి ఆలయం, తిరుపతిలోని కోదండరామస్వామి ఆలయం, గోవిందరాజస్వామి ఆలయం, శ్రీనివాసమంగాపురంలో ఉండే కళ్యాణ వెంకటేశ్వరస్వామి ఆలయం, అప్పలాయగుంట ప్రసన్న వెంకటేశ్వరస్వామి ఆలయం, ఒంటిమిట్ట కోదండరామస్వామి ఆలయంతో పాటుగా.. దేవుని కడప, హైదరాబాద్లోని హిమాయత్ నగర్, జూబ్లీహిల్స్, అమరావతి, విజయవాడ, రాజమండ్రి, పిఠాపురం, విశాఖపట్నం, రంపచోడవరం, చెన్నైలో ఉండే శ్రీవారి ఆలయాలలో తిరుమల లడ్డూలు దొరుకుతాయని టీటీడీ తెలిపింది. అలాగే బెంగుళూరు, వేలూరులలోని టీటీడీ సమాచార కేంద్రాలలో కూడా లడ్డూలు అందుబాటులో ఉంచినట్లు తెలిపింది. శ్రీవారి భక్తులు టీటీడీ స్థానిక ఆలయాలు, సమాచార కేంద్రాలలో కూడా శ్రీవారి లడ్డూ ప్రసాదాలు పొందవచ్చని వెల్లడించింది.
మరోవైపు శ్రీవారి భక్తులకు మరింత రుచికరమైన లడ్డూ ప్రసాదాలు అందించేందుకు నాణ్యమైన ఆవు నెయ్యి కొనుగోలు చేస్తున్నట్లు టీటీడీ ఈవో శ్యామలరావు తెలిపారు. గతంలో నాణ్యత, రుచి, వాసనలేని ఆవు నెయ్యిని సరఫరా చేసేవారిని ఫలితంగా.. లడ్డూ నాణ్యత తగ్గిందన్నారు. అయితే తాము లడ్డూ నాణ్యతపై ప్రత్యేక దృష్టి పెట్టామని.. నాణ్యమైన నెయ్యి ద్వారా లడ్డూలు తయారుచేయిస్తున్నట్లు వెల్లడించారు. టీటీడీలో నూతనంగా అత్యాధునిక ల్యాబరెటరీ ఏర్పాటు చేస్తున్నామని.. సిబందికి మైసూర్ లో శిక్షణ ఇస్తున్నామన్నారు. అలాగే నాణ్యమైన నెయ్యి కొనుగోలు కోసం నలుగురు ప్రముఖ డైరీ నిపుణులతో కమిటీ ఏర్పాటు చేసినట్లు వెల్లడించారు. అలాగే కర్నాటక కోపరేటివ్ మిల్క్ ప్రాడెక్ట్ కంపెనీ నుంచి నేరుగా నెయ్యిని కొనుగోలు చేస్తున్నట్లు ఈవో వివరించారు.
