India vs England 2nd Test: ఇంగ్లండ్ ఫాస్ట్ బౌలర్ జోఫ్రా ఆర్చర్ తిరిగి రెడ్-బాల్ క్రికెట్‌లోకి అడుగుపెట్టాడు..! సుదీర్ఘ కాలం పాటు గాయాలతో బాధపడి, 1501 రోజుల తర్వాత కౌంటీ ఛాంపియన్‌షిప్‌లో ససెక్స్ తరపున బరిలోకి దిగాడు. అతని ఈ పునరాగమనం, ముఖ్యంగా రాబోయే ఇంగ్లండ్-భారత్ టెస్ట్ సిరీస్ నేపథ్యంలో, క్రికెట్ ప్రపంచంలో చర్చనీయాంశమైంది.
గాయాల బెడదతో సుదీర్ఘ విరామం..
2021 ఫిబ్రవరిలో భారత్‌తో జరిగిన టెస్ట్ మ్యాచ్ తర్వాత ఆర్చర్ రెడ్-బాల్ క్రికెట్‌కు దూరమయ్యాడు. మోచేతి గాయాలు, వెన్నునొప్పి వంటి వరుస సమస్యలు అతని కెరీర్‌కు అడ్డుకట్ట వేశాయి. 2019లో ఇంగ్లండ్‌కు ప్రపంచ కప్ అందించడంలో కీలక పాత్ర పోషించిన ఆర్చర్, ఆ తర్వాత టెస్టుల్లో అరంగేట్రం చేసి సంచలనం సృష్టించాడు. అయితే, అతని కెరీర్ గాయాల కారణంగా నిలిచిపోయింది. ఐపీఎల్‌లో కూడా ఆడుతూ గాయాల బారిన పడటం అతని అభిమానులను నిరాశపరిచింది.
కౌంటీ ఛాంపియన్‌షిప్‌లో పునరాగమనం..
తాజాగా, డర్హామ్‌తో జరిగిన కౌంటీ ఛాంపియన్‌షిప్ మ్యాచ్‌లో ససెక్స్ తరపున జోఫ్రా ఆర్చర్ బరిలోకి దిగాడు. ఈ మ్యాచ్‌లో అతను బ్యాట్‌తో కూడా రాణించాడు. 34 బంతుల్లో 31 పరుగులు చేశాడు. బౌలింగ్‌లో కూడా అద్భుతమైన మెయిడెన్ ఓవర్‌తో తన పునరాగమనాన్ని ఘనంగా చాటాడు. అతని ఖచ్చితమైన లైన్ అండ్ లెంగ్త్, వేగం చూసి క్రికెట్ విశ్లేషకులు ఆశ్చర్యపోయారు. ఈ ప్రదర్శన ఇంగ్లండ్ జట్టుకు, ముఖ్యంగా రాబోయే భారత్‌తో టెస్ట్ సిరీస్‌కు ముందు ఒక శుభవార్త అని చెప్పాలి.
ఇవి కూడా చదవండి
భారత్‌కు హెచ్చరిక?
జోఫ్రా ఆర్చర్ తిరిగి ఫామ్‌లోకి రావడంతో ఇంగ్లండ్ జట్టు బౌలింగ్ విభాగానికి బలం చేకూరింది. ఇంగ్లండ్ సెలెక్టర్ ల్యూక్ రైట్ కూడా ఆర్చర్ జులై 2 నుంచి బర్మింగ్‌హామ్‌లో ప్రారంభమయ్యే భారత్‌తో రెండో టెస్టులో ఆడే అవకాశం ఉందని సూచించాడు. గాయాలతో పేలవంగా ఉన్న ఇంగ్లండ్ పేస్ అటాక్‌కు ఆర్చర్ రాక పెద్ద ఊరటనిస్తుంది. భారత బ్యాట్స్‌మెన్‌కు ఆర్చర్ ఒక సవాలుగా మారడం ఖాయం. అతని పేస్, బౌన్స్, స్వింగ్ భారత జట్టుకు ఇబ్బందులు సృష్టించే అవకాశం ఉంది.
గతంలో టీమిండియాతో ఆర్చర్ ఆడిన టెస్టుల్లో కూడా మంచి ప్రదర్శన చేశాడు. ప్రస్తుతం అతను ఫిట్‌గా ఉండి, పూర్తి మ్యాచ్ ఆడితే, అది ఇంగ్లండ్ టెస్ట్ జట్టులోకి తిరిగి రావడానికి బలమైన అవకాశం కల్పిస్తుంది. ఎందుకంటే, ప్రస్తుతం ఇంగ్లండ్ పేస్ దళం అంత బలంగా లేదు. కాబట్టి, జోఫ్రా ఆర్చర్ పునరాగమనం భారత్‌కు ఒక రకమైన “హెచ్చరిక” అనే చెప్పాలి. అతని రాకతో ఇంగ్లండ్ బౌలింగ్ మరింత పదును తేలుతుంది అనడంలో సందేహం లేదు.
మరిన్ని క్రీడా వార్తల కోసం ఇక్కడ క్లిక్ చేయండి..
