ఆంధ్రప్రదేశ్ ప్రభుత్వం మరో కీలక నిర్ణయం తీసుకున్నట్లు తెలిసింది. అన్న క్యాంటీన్లను మండలాలకు కూడా విస్తరించే ఆలోచన చేస్తున్నట్లు సమాచారం. ప్రస్తుతం పట్టణాలు, జిల్లా కేంద్రాలలో మాత్రమే అన్న క్యాంటీన్లు నిర్వహిస్తున్నారు. అయితే పేదల ఆకలి తీర్చే అన్న క్యాంటీన్లను మండలాలలోనూ ఏర్పాటు చేయాలనే ఆలోచన చేస్తోంది. ప్రతి మండలంలో అన్న క్యాంటీన్లు ఏర్పాటు చేయాలని మంగళవారం జరిగిన మంత్రివర్గ సమావేశంలో సీఎం నారా చంద్రబాబు నాయుడు సూచించినట్లు సమాచారం.
అలాగే అన్న క్యాంటీన్ల నిర్వహణకు సంబంధించి కూడా మరో కీలక నిర్ణయం తీసుకున్నారు. అన్న క్యాంటీన్ల ఏర్పాటు, దాతల విరాళాలు, నిర్వహణకు ప్రత్యేక కమిటీ ఏర్పాటు చేయాలని చంద్రబాబు సూచించారు. మరోవైపు పేద, మధ్యతరగతి ప్రజలకు, వలస కూలీల ఆకలి తీర్చాలనే ఉద్దేశంతో ఈ అన్న క్యాంటీన్లు ఏర్పాటు చేశారు. సబ్సిడీ రేట్లకే నాణ్యమైన, రుచికరమైన ఆహారం అందించేందుకు 2018లో అప్పటి టీడీపీ ప్రభుత్వం అన్న క్యాంటీన్లు ఏర్పాటు చేసింది. రూ.5లకే నిరుపేదలు, రోజువారీ కూలీలు, ఆటో డ్రైవర్లు, వీధి వ్యాపారులకు ఆహారం అందించింది. అయితే 2019 ఎన్నికల్లో విజయం సాధించి వైసీపీ అధికారంలోకి వచ్చిన తర్వాత ఈ పథకం ఆగిపోయింది. 2024 ఎన్నికల్లో గెలిచి అధికారంలోకి వచ్చిన టీడీపీ కూటమి ప్రభుత్వం అన్న క్యాంటీన్లను తిరిగి ప్రారంభించింది.
ఏపీలోని పేదలకు శుభవార్త.. ఇకపై మండలాల్లోనూ.. ఏపీ ప్రభుత్వం కీలక నిర్ణయం!
అన్న క్యాంటీన్ల ద్వారా ఉదయం అల్పాహారం, మధ్యాహ్నం భోజనం, రాత్రి డిన్నర్ అందిస్తారు. ప్రతి క్యాంటీన్ ద్వారా రోజుకు సగటున 350 నుంచి 500 మందికి ఆహారం అందిస్తున్నారు. అన్న క్యాంటీన్ నిర్వహణకు రోజుకు న రూ.26,256 ఖర్చవుతుంది. ఈ లెక్కన 203 అన్న క్యాంటీన్లకు రోజుకు రూ.53.28 లక్షలు, ఏడాదికి రూ.200 కోట్లు అవసరం. అయితే ప్రభుత్వం సొంత ఖర్చుతో పాటుగా దాతల నుంచి అందే విరాళాల ద్వారా అన్న క్యాంటీన్లను నిర్వహిస్తోంది. మంగళవారం జరిగిన కేబినెట్ భేటీలోనూ మరో 9 అన్న క్యాంటీన్ల ఏర్పాటుకు ఆమోదం తెలిపింది. ఈ క్రమంలోనే త్వరలో మండలాల్లోనూ అన్న క్యాంటీన్లు ఏర్పాటు చేయాలని భావిస్తోంది.
రచయిత గురించివంకం వెంకటరమణవంకం వెంకటరమణ సమయం తెలుగులో డిజిటల్ కంటెంట్ ప్రొడ్యూసర్‌గా పని చేస్తున్నారు. ఇక్కడ క్రీడావార్తలతో పాటు జాతీయ, అంతర్జాతీయ వ్యవహారాలకు సంబంధించిన తాజా వార్తలు, ప్రత్యేక కథనాలు అందిస్తుంటారు. ఆయనకు జర్నలిజంలో 6 సంవత్సరాల అనుభవం ఉంది. గతంలో ప్రముఖ మీడియా సంస్థల్లో స్పోర్ట్స్, పొలిటికల్ న్యూస్, ఇతర రంగాలకు సంబంధించి వార్తలు రాశారు.… ఇంకా చదవండి
