Andhra Pradesh E Passport Details: ఆంధ్రప్రదేశ్‌లో ఈ-పాస్‌పోర్టుల జారీ ప్రారంభమైంది. విశాఖపట్నం, విజయవాడ ప్రాంతీయ కార్యాలయాల్లో ఈ సదుపాయం అందుబాటులో ఉంది. ఈ పాస్‌పోర్టుల్లో రేడియో ఫ్రీక్వెన్సీ ఐడెంటిఫికేషన్ చిప్ ఉంటుంది, దీని ద్వారా వ్యక్తిగత సమాచారం భద్రంగా ఉంటుంది. అంతేకాకుండా, పాస్‌పోర్టుల తనిఖీల్లో ఏపీ పోలీసులు మూడు రోజుల్లోనే పూర్తి చేసి అరుదైన ఘనత సాధించారు. ఈ సందర్భంగా పోలీసు శాఖకు విదేశీ వ్యవహారాల మంత్రిత్వ శాఖ ప్రత్యేక ధ్రువపత్రాన్ని అందజేసింది.
హైలైట్:
- ఏపీలో ఈ-పాస్‌పోర్టులు జారీ చేస్తున్నారు
- విశాఖపట్నం, విజయవాడలో ప్రారంభం
- ఇమిగ్రేషన్ ప్రక్రియను మరింత సులువు
కొత్తగా జారీ చేస్తున్న ఈ-పాస్‌పోర్టులో ఒక చిప్ ఉంటుంది. పాస్‌పోర్ట్ మొదటి పేజీలో ఒక కోడ్ ఉంటుంది.. దానిని స్కాన్ చేస్తే అన్ని వివరాలు తెలుస్తాయి. ఈ పాస్‌పోర్టులతో నకిలీవి తయారు చేయకుండా అడ్డుకట్ట వేయొచ్చంటున్నారు. కొత్తగా జారీ చేస్తున్న ఈ-పాస్‌పోర్ట్‌పై గోల్డ్ కలర్ చిప్ గుర్తు ఉంటుంది. విశాఖపట్నం ప్రాంతీయ పాస్‌పోర్ట్ కార్యాలయంలో ఇప్పటికే ఈ సేవలు అందుబాటులోకి రాగా.. విజయవాడ ప్రాంతీయ పాస్‌పోర్ట్ కార్యాలయం గత నెల 4 నుంచి ఈ-పాస్‌పోర్టులను జారీ చేస్తున్నారు. ఇప్పటివరకు 25,000 ఈ-పాస్‌పోర్టుల్ని జారీ చేశారు. ప్రస్తుతం పాస్‌పోర్ట్‌లు ఉన్నవారికి ఆ గడువు ఉన్నంత వరకు చెల్లుబాటు అవుతాయి. ఆ పాస్‌పోర్టుల్ని రెన్యువల్ చేసేప్పుడు ఈ-పాస్‌పోర్టు ఇస్తారు. అయినా సరే ఒకవేళ ఎవరికైనా కొత్త ఈ-పాస్‌పోర్ట్ కావాలంటే.. రీ-ఇష్యూ కోసం దరఖాస్తు చేసుకోవాల్సి ఉంటుందని అధికారులు తెలిపారు. వారు స్లాట్ బుక్ చేసుకుని, వెరిఫికేషన్ పూర్తయితే ఈ-పాస్‌పోర్ట్ జారీ అవుతుంది. ప్రజలు ఈ విషయాన్ని గమనించాలని సూచించారు.
ఏపీ ప్రజలకు సూపర్ న్యూస్.. ఈ-పాస్‌పోర్ట్‌లు వచ్చేశాయి, ఇకపై ఇమిగ్రేషన్ ఈజీగా!
మరోవైపు ఏపీ పోలీసు శాఖ పాస్‌పోర్టుల దరఖాస్తుల తనిఖీల్లో అరుదైన ఘనత సాధించింది. కేవలం మూడు రోజుల్లోనే పాస్‌పోర్ట్ తనిఖీలను పూర్తి చేస్తోంది.. అందుకు గుర్తింపుగా విదేశీ వ్యవహారాల మంత్రిత్వ శాఖ సహాయ మంత్రి పబిత్ర మార్గరీటా.. ఏపీ నిఘా విభాగం ఎస్పీ ఎ.రమాదేవికి ప్రత్యేక ధ్రువపత్రాన్ని అందజేశారు. 2024-25లో ఏపీ పోలీసు శాఖ అత్యంత వేగంగా పాస్‌పోర్టు దరఖాస్తుల తనిఖీ ప్రక్రియను పూర్తిచేసి.. అత్యుత్తమ సేవలందించినందుకు గుర్తింపుగా ఈ అవార్డును అందజేశారు. 2018-2019లో కూడా ఈ అవార్డు వచ్చింది అంతేకాదు గుంటూరు పోస్టాఫీస్ కార్యాలయంలోని పాస్‌పోర్టు సేవా కేంద్రానికి సంస్థాగత పనితీరు పురస్కారం దక్కింది. అలాగే విజయవాడ రీజినల్‌ పాస్‌పోర్టు అధికారికి వ్యక్తిగత అవార్డు వచ్చింది. ఈ గుర్తింపుతో మరింత అత్యుత్తమ పౌరసేవలు అందించేందుకు స్ఫూర్తిగా ఉంటుందన్నారు డీజీపీ హరీష్‌కుమార్‌ గుప్తా. ఇంటిలిజెన్స్ చీఫ్ మహేష్‌ చంద్ర లడ్డాతో పాటుగా ఇంటిలిజెన్స్ ఎస్పీ రమాదేవి, అన్ని జిల్లాల ఎస్పీలు, నగర పోలీసు కమిషనర్లను డీజీపీ అభినందించారు.
రచయిత గురించితిరుమల బాబుతిరుమల బాబు సమయం తెలుగులో సీనియర్ డిజిటల్ కంటెంట్ ప్రొడ్యూసర్‌గా పని చేస్తున్నారు. ఇక్కడ ఏపీ, తెలంగాణకు సంబంధించిన తాజా వార్తలు, రాజకీయ వార్తలు, ప్రత్యేక కథనాలు అందిస్తుంటారు. ఆయనకు జర్నలిజంలో 11 సంవత్సరాలకు పైగా అనుభవం ఉంది. గతంలో ప్రముఖ మీడియా సంస్థల్లో పొలిటికల్ న్యూస్, ఇతర రంగాలకు సంబంధించి వార్తలు రాశారు.… ఇంకా చదవండి
