అన్నదాత సుఖీభవ పథకం నిధులు విడుదలపై సీఎం నారా చంద్రబాబు నాయుడు క్లారిటీ ఇచ్చారు. మంగళగిరిలోని పార్టీ ఆఫీసులో టీడీపీ విస్తృత స్థాయి సమావేశం జరిగింది. ఈ సమావేశంలో పాల్గొన్న చంద్రబాబు.. వివిధ అంశాలపై పార్టీ శ్రేణులకు దిశానిర్దేశం చేశారు. అలాగే అన్నదాత సుఖీభవ పథకం తొలి విడత నిధుల విడుదలపై క్లారిటీ ఇచ్చారు. జులై నెలలో పీఎం కిసాన్ యోజనతో నిధులు విడుదల చేసిన రోజే.. అన్నదాత సుఖీభవ పథకం డబ్బులు రైతుల బ్యాంక్ అకౌంట్లలో జమచేస్తామని చంద్రబాబు వెల్లడించాుర.
పీఎం కిసాన్ యోజన సాయాన్ని కేంద్రం మూడు విడతల్లో అందిస్తుందని.. అప్పుడే అన్నదాత సుఖీభవ పథకం డబ్బులు కూడా జమచేస్తామని చంద్రబాబు క్లారిటీ ఇచ్చారు. మరోవైపు పీఎం కిసాన్ యోజన కింద కేంద్ర ప్రభుత్వం ఏటా మూడు విడతల్లో రూ.6000 అందించనుంది. ఈ సాయానికి రాష్ట్ర ప్రభుత్వం రూ.14000 జతచేసి ఏటా అర్హులైన రైతులకు రూ.20000 మూడు విడతల్లో అందించనుంది. తొలి విడత నిధులు జూన్ నెలాఖరులో విడుదల చేస్తారని వార్తలు రాగా.. కేంద్రం పీఎం కిసాన్ యోజన నిధులు విడుదల చేయలేదు. దీంతో ఏపీ ప్రభుత్వం అన్నదాత సుఖీభవ డబ్బులు విడుదల కూడా వాయిదా పడింది. జులై నెలలో విడుదల చేస్తామని చంద్రబాబు తాజాగా వెల్లడించారు.
మరోవైపు ఆగస్ట్ 15 నుంచి ఏపీలో మహిళలకు ఉచిత బస్సు ప్రయాణం అమలు చేయనున్న సంగతి తెలిసిందే. దీనితో పాటుగా మరో కార్యక్రమం కూడా చేపట్టనున్నారు. మనమిత్ర వాట్సాప్ గవర్నెన్స్ ద్వారా 500 పౌరసేవలను ఆన్ లైన్ ద్వారా అందిస్తున్న ఏపీ ప్రభుత్వం.. ఈ సేవలను మరింత పెంచాలని నిర్ణయించింది. ఆగస్ట్ 15 నుంచి 703 పౌర సేవలు వాట్సాప్ గవర్నెన్స్ ద్వారా అందిస్తామని సీఎం చంద్రబాబు వెల్లడించారు.
ఎన్నికల సమయంలో ఇచ్చిన హామీ ప్రకారం ఎన్టీఆర్ భరోసా పింఛన్లను పెంచి ఇస్తున్నామని చంద్రబాబు గుర్తు చేశారు. అమరావతి రాజధాని నిర్మాణాన్ని తిరిగి పట్టాలెక్కించామని.. పోలవరం ప్రాజెక్టు పనులను కూడా మొదలుపెట్టినట్లు వివరించారు. 2027 నాటికి పోలవరం ప్రాజెక్టును పూర్తి చేసి జాతికి అంకితం చేస్తామని టీడీపీ విస్తృత స్థాయి సమావేశంలో నారా చంద్రబాబు నాయుడు మరోసారి స్పష్టం చేశారు.
రచయిత గురించివంకం వెంకటరమణవంకం వెంకటరమణ సమయం తెలుగులో డిజిటల్ కంటెంట్ ప్రొడ్యూసర్‌గా పని చేస్తున్నారు. ఇక్కడ క్రీడావార్తలతో పాటు జాతీయ, అంతర్జాతీయ వ్యవహారాలకు సంబంధించిన తాజా వార్తలు, ప్రత్యేక కథనాలు అందిస్తుంటారు. ఆయనకు జర్నలిజంలో 6 సంవత్సరాల అనుభవం ఉంది. గతంలో ప్రముఖ మీడియా సంస్థల్లో స్పోర్ట్స్, పొలిటికల్ న్యూస్, ఇతర రంగాలకు సంబంధించి వార్తలు రాశారు.… ఇంకా చదవండి
