గుంటూరు జిల్లా కలెక్టర్ కార్యాలయంలో సోమవారం ఓ ఆసక్తికర ఘటన చోటుచేసుకుంది. యశ్వంత్ అనే నాలుగో తరగతి విద్యార్థి జిల్లా కలెక్టర్ కార్యాలయంలో జరిగిన గ్రీవెన్స్ డే వచ్చాడు. జిల్లా కలెక్టర్‌ను కలిసి వినతి పత్రం అందజేశాడు. అయితే నాలుగో తరగతి పిల్లాడు కలెక్టర్ కార్యాలయానికి ఎందుకు రావాల్సి వచ్చింది. జిల్లా కలెక్టర్‌కు ఏమని వినతి పత్రం అందించాడు. అసలు ఆ కుటుంబానికి వచ్చిన కష్టం ఏంటి అనేది అక్కడున్న వారికి ఆసక్తిని కలిగించింది. పిల్లాడి మాటల ద్వారా అసలు సంగతి తెలుసుకున్న స్థానికులను ఆ విషయం కలచివేసింది.
ఏమంత కష్టం.. ఎందుకా నిర్ణయం.?
యశ్వంత్ వయసు పదేళ్లు.. నాలుగో తరగతి చదువుతున్నాడు. నాన్న లారీలో పనికి వెళ్తుంటాడు. అమ్మ కుటుంబాన్ని పోషించడం కోసం.. గుంటూరు సర్వజన ఆసుపత్రి వద్ద టిఫిన్ బండి నడుపుతోంది. ఆస్పత్రిలో చికిత్స చేయించుకోవడానికి వచ్చే రోగులు, వారి బంధువులు టిఫిన్ బండి వద్దకు వచ్చి నాలుగు మెతుకులు లోపలికి వేసుకుంటేనే.. వీరికి నాలుగు రాళ్లు మిగులతాయి. యశ్వంత్ కూడా సెలవురోజుల్లో టిఫిన్ బండి వద్ద అమ్మకు సాయం చేస్తుంటాడు. కానీ జీవితం ఎప్పుడూ ఒకేలా ఉండదు కదా.. అధికారుల కళ్లు యశ్వంత్ వాళ్ల టిఫిన్ బండి మీద పడ్డాయి. టిఫిన్ బండి పెట్టుకోవడానికి వీల్లేదన్నాయ్. బలవంతంగా టిఫిన్ బండిని అక్కడి నుంచి ఖాళీ చేయించాయ్.టిఫిన్ బండి సాయంతో కుటుంబాన్ని పోషిస్తూ వస్తున్న యశ్వంత్ తల్లి.. ఈ ఘటనతో తల్లడిల్లిపోయింది. తమకు జీవనాధారం ఆ టిఫిన్ బండేనని.. ఆస్పత్రి వద్ద కాస్త స్థలం ఇప్పించండి అయ్యా అంటూ అధికారులను వేడుకుంది. అర్జీలు పెట్టుకుంది. కానీ అధికారుల స్పందన శూన్యం. దీంతో ఏమీ చేయలేని నిస్సహాయ స్థితిలో.. చచ్చిపోదాం బిడ్డా అంటూ ఆ తల్లి తన నిస్సహాయతను కొడుకు వద్ద బయటపెట్టుకుంది. టిఫిన్ బండి వద్ద నలుగురిని నవ్వుతూ పలకరిస్తూ కనిపించే అమ్మ.. అలా బాధతో కన్నీరు పెట్టుకుంటే పాపం ఆ పసివాడు భరించలేకపోయాడు. నాన్నేమో లారీ పని అని చెప్పి పట్టించుకోకుండా తిరుగుతున్నాడు. ఇక అమ్మకోసం తానే ఏదైనా చేయాలని నిర్ణయించుకున్నాడు యశ్వంత్..
వేరే వాళ్లు మా టిఫిన్ బండిని ఖాళీ చేసేశారు. కాలువలో పడేశారు. బండి పెట్టనివ్వడం లేదు. ఆఫీసులకు చాలాసార్లు తిరిగాం. వాళ్లూ పెట్టనీయటం లేదు. అందుకోసమే మా అమ్మ కోసం నేను వచ్చా. అమ్మ చచ్చిపోదాం, చచ్చిపోదాం అంటోంది..మా నాన్న పట్టించుకోవడం లేదు. అందుకోసమే నేను వచ్చా. టిఫిన్ బండి పెట్టుకోవడానికి మాకు స్థలం ఇప్పించండి సారూ – యశ్వంత్
vankam venkata ramana
సోమవారం ఉదయం గుంటూరు కలెక్టర్ కార్యాలయం వద్దకు చేరుకున్నాడు. టిఫిన్ బండి పెట్టుకోవడానికి అనుమతి ఇప్పించండి సారూ.. అంటూ చేతిలో అర్జీతో కలెక్టర్ కార్యాలయానికి వచ్చిన యశ్వంత్.. మీడియాకు కనిపించాడు. దీంతో ఉపాధి కోల్పోయి ఇబ్బందులు పడుతున్న ఓ సగటు మధ్యతరగతి కుటుంబం కష్టాలు బయటి ప్రపంచానికి తెలిశాయి. యశ్వంత్ అభ్యర్థనపై అధికారులు ఎలా స్పందిస్తారో తెలియదు కానీ.. అమ్మ కష్టం చూడలేక నాలుగో తరగతి బాలుడు ఇలా కలెక్టర్ కార్యాలయంలో జరిగిన ప్రజావాణి కార్యక్రమానికి వచ్చి.. తన గోడును వెళ్లబోసుకున్న తీరు అక్కడున్న ప్రతి ఒక్కరి హృదయాలను కలచివేసింది
రచయిత గురించివంకం వెంకటరమణవంకం వెంకటరమణ సమయం తెలుగులో డిజిటల్ కంటెంట్ ప్రొడ్యూసర్‌గా పని చేస్తున్నారు. ఇక్కడ క్రీడావార్తలతో పాటు జాతీయ, అంతర్జాతీయ వ్యవహారాలకు సంబంధించిన తాజా వార్తలు, ప్రత్యేక కథనాలు అందిస్తుంటారు. ఆయనకు జర్నలిజంలో 6 సంవత్సరాల అనుభవం ఉంది. గతంలో ప్రముఖ మీడియా సంస్థల్లో స్పోర్ట్స్, పొలిటికల్ న్యూస్, ఇతర రంగాలకు సంబంధించి వార్తలు రాశారు.… ఇంకా చదవండి
