ఏపీలో త్వరలో మరో వందే భారత్ ఎక్స్‌ప్రెస్ రైలు పట్టాలెక్కే అవకాశాలు కనిపిస్తున్నాయి. నరసాపురం – చెన్నై వందే భారత్ ఎక్స్‌ప్రెస్ రైలును త్వరలోనే ప్రారంభిస్తామని కేంద్ర మంత్రి భూపతిరాజు శ్రీనివాసవర్మ బుధవారం వెల్లడించారు. నరసాపురం రైల్వేస్టేషన్‌లో జరిగిన కార్యక్రమంలో నరసాపురం – అరుణాచలం ప్రత్యే రైలును భూపతిరాజు శ్రీనివాసవర్మ జెండా ఊపి ప్రారంభించారు. అనంతరం మీడియాతో మాట్లాడిన ఆయన.. ఈ విషయాన్ని వెల్లడించారు.
ఆంధ్రప్రదేశ్ మీదుగా ప్రస్తుతం నడుస్తున్న వందే భారత్ ఎక్స్‌ప్రెస్ రైళ్లు
మరోవైపు ఏపీ మీదుగా ఇప్పటికే పలు వందే భారత్ ఎక్స్‌ప్రెస్ రైళ్లు నడుస్తున్నాయి. విశాఖపట్నం – సికింద్రాబాద్ వందే భారత్ ఎక్స్‌ప్రెస్ రైలు ఆదివారం మినహా వారంలో ఆరు రోజులు అందుబాటులో ఉంటోంది. విశాఖపట్నం రైల్వేస్టేషన్ నుంచి ఉదయం 5:45 గంటలకు బయలుదేరి.. అదే రోజు మధ్యాహ్నం 2:20 గంటలకు సికింద్రాబాద్ రైల్వేస్టేషన్ చేరుకుంటుంది. 699 కి.మీ. దూరాన్ని 8 గంటల 35 నిమిషాలలో చేరుకోవచ్చు. అలాగే సికింద్రాబాద్ రైల్వేస్టేషన్ నుంచి మధ్యాహ్నం 3:00 గంటలకు బయలుదేరితే.. అదే రోజు రాత్రి 11:35 గంటలకు విశాఖపట్నం రైల్వేస్టేషన్ చేరుకుంటుంది.
వందే భారత్ రైల్లో ఎమ్మెల్యే అనుచరుల వీరంగం.. సీటు ఇవ్వలేదని ప్రయాణికుడ్ని కొట్టి
మరోవైపు సికింద్రాబాద్ – విశాఖపట్నం మధ్య మరోన వందే భారత్ ఎక్స్‌ప్రెస్ రైలు కూడా నడుస్తోంది. ఈ రైలు గురువారం తప్ప వారంలో మిగతా ఆరు రోజులు అందుబాటులో ఉంటుంది. ఈ రైలు సికింద్రబాద్ నుంచి ఉదయం 5:05 గంటలకు బయలుదేరితే.. అదే రోజు మధ్యాహ్నం 1:50 గంటలకు విశాఖపట్నం చేరుకుంటుంది. మధ్యాహ్నం 2:45 గంటలకు విశాఖ నుంచి బయలుదేరితే.. రాత్రి 11:20 గంటలకు సికింద్రాబాద్ చేరుకుంటుంది.మరోవైపు విజయవాడ – చెన్నై వందే భారత్ ఎక్స్‌ప్రెస్ రైలు కూడా నడుస్తోంది. బుధవారం తప్ప వారంలో మిగతా రోజులు ఈ విజయవాడ చెన్నై వందే భారత్ ఎక్స్‌ప్రెస్ రైలు అందుబాటులో ఉంటుంది. 517 కి.మీ. దూరాన్ని 6 గంటల 40 నిమిషాలలో చేరుకోవచ్చు. విజయవాడ నుంచి మధ్యాహ్నం 3:20 గంటలకు బయలుదేరితే.. రాత్రి 10:00 గంటలకు చెన్నై చేరుకుంటుంది. చెన్నై నుంచి ఉదయం 5:30 గంటలకు చెన్నై విజయవాడ వందే భారత్ రైలు బయల్దేరుతుంది. అదే రోజు మధ్యాహ్నం 12:10 గంటలకు విజయవాడ చేరుకుంటుంది.
వీటితో పాటుగా విశాఖపట్నం – భువనేశ్వర్ వందే భారత్ ఎక్స్‌ప్రెస్, దుర్గ్ – విశాఖపట్నం వందే భారత్ ఎక్స్‌ప్రెస్, సికింద్రాబాద్ – తిరుపతి వందే భారత్ ఎక్స్‌ప్రెస్, కాచిగూడ – యశ్వంత్‌పూర్ వందే భారత్ ఎక్స్‌ప్రెస్ రైళ్లు ఏపీ మీదుగా నడుస్తున్నాయి. త్వరలోనే విజయవాడ – బెంగళూరు మధ్య వందే భారత్ ఎక్స్‌ప్రెస్ రైలు పట్టాలెక్కించే ఆలోచనలో రైల్వే అధికారులు ఉన్నారు.
రచయిత గురించివంకం వెంకటరమణవంకం వెంకటరమణ సమయం తెలుగులో డిజిటల్ కంటెంట్ ప్రొడ్యూసర్‌గా పని చేస్తున్నారు. ఇక్కడ క్రీడావార్తలతో పాటు జాతీయ, అంతర్జాతీయ వ్యవహారాలకు సంబంధించిన తాజా వార్తలు, ప్రత్యేక కథనాలు అందిస్తుంటారు. ఆయనకు జర్నలిజంలో 6 సంవత్సరాల అనుభవం ఉంది. గతంలో ప్రముఖ మీడియా సంస్థల్లో స్పోర్ట్స్, పొలిటికల్ న్యూస్, ఇతర రంగాలకు సంబంధించి వార్తలు రాశారు.… ఇంకా చదవండి
