తిరుపతి జిల్లాలో రోడ్డు ప్రమాదం జరిగింది. ఓ బొలెరో వాహనం, ఆర్టీసీ బస్సు పరస్పరం ఢీకొన్నాయి. ఈ ఘటనలో ప్రాణ నష్టం జరగలేదు కానీ.. బొలెరోలోని మద్యం రోడ్డుపాలైంది. సుమారు 35 లక్షల రూపాయలు విలువజేసే మద్యంతో బొలెరో వాహనం.. రేణిగుంట నుంచి తిరుపతికి బయల్దేరింది. అయితే తిరుపతికి వచ్చే మార్గంలో ఓ యూటర్న్ వద్ద ప్రమాదం జరిగింది. ఆర్టీసీ బస్సు, బొలెరో వాహనం ఢీకొన్నాయి. అనంతరం డివైడర్ను ఢీకొట్టిన బొలెరో వాహనం బోల్తాపడింది. ఈ ఘటనలో బొలెరోలో తరలిస్తున్న మద్యం బాటిళ్లు దెబ్బతిన్నాయి. రోడ్డుపై చెల్లాచెదురుగా పడిపోయాయి. ప్రమాదంలో సుమారు పదిలక్షల వరకూ నష్టం జరిగినట్లు యజమాని చెప్తున్నారు.మరోవైపు ప్రమాదంలో ఓ వ్యక్తికి గాయాలు కాగా.. ఆస్పత్రికి తరలించారు. మరోవైపు ఈ ఘటనపై కేసు నమోదు చేసుకున్న పోలీసులు.. ఘటనాస్థలాన్ని పరిశీలించారు. ప్రమాదానికి ఆర్టీసీ బస్సు డ్రైవర్ కారణమా లేదా బొలెరో వాహనం డ్రైవర్ది తప్పా అనే విషయాన్ని తేల్చే పనిలో పడ్డారు. మరోవైపు ప్రమాదం తర్వాత లిక్కర్ బాటిళ్లన్నీ రోడ్డుపై పడటంతో అటుగా వెళ్తున్న వాహనదారులు కొన్ని తీసుకుపోయినట్లు తెలిసింది. అయితే ఘటనాస్థలికి చేరుకున్న పోలీసులు.. బాటిళ్లను సర్ది మరో వాహనంలో తరలించారు. అయితే ప్రమాదం తర్వాత లిక్కర్ రోడ్డుపాలు కావటంతో ఆ ప్రాంతమంతా మద్యం వాసనతో గుప్పుమంటోంది.
ఎర్రచందనం స్మగ్లర్లు అరెస్ట్
మరోవైపు తిరుపతి, కడప జిల్లాల పరిధిలో టాస్క్ఫోర్స్ బలగాలు జరిపిన దాడుల్లో ఎర్ర చందనం దుంగలు లభ్యమయ్యాయి. ఎర్రచందనం అక్రమ రవాణా నిరోధక టాస్క్ఫోర్స్ బలగాలు వేర్వేరుగా నిర్వహించిన దాడుల్లో పెద్దఎత్తున ఎర్రచందనం దుంగలను స్వాధీనం చేసుకున్నారు. అలాగే ముగ్గురు స్మగ్లర్లను అరెస్ట్ చేశారు. వారివద్ద నుంచి మోటార్ సైకిల్, కారు స్వాధీనం చేసుకున్నారు. తిరుపతి జిల్లా కరకంబాడి పరిధిలోని ఆంజనేయపురం అటవీ తనిఖీ కేంద్రం వద్ద సోదాలు నిర్వహించారు. ఈ సోదాల్లో ఎర్రచందనం అక్రమంగా తరలిస్తున్న కారును అడ్డుకుని ఇద్దరు స్మగ్లర్లను అరెస్ట్ చేశారు. వీరిని తమిళనాడుకు చెందిన వారిగా గుర్తించారు. అలాగే 12 ఎర్రచందనం దుంగలను స్వాధీనం చేసుకున్న పోలీసులు.. కారును సీజ్ చేశారు. ఇక కడప జిల్లా చక్రాయపేట వద్ద 28 ఎర్రచందనం దుంగలను టాస్క్ఫోర్స్ బలగాలు స్వాధీనం చేసుకున్నాయి. చక్రాయపేటకు చెందిన స్మగ్లర్ను అరెస్ట్ చేశారు.
