IND vs ENG 5th Test : భారత్, ఇంగ్లాండ్ మధ్య జరుగుతున్న ఐదు టెస్టుల సిరీస్ ఇప్పుడు చివరి అంకానికి చేరుకుంది. సిరీస్‌లో ఐదవ టెస్ట్ మ్యాచ్ నేటి నుంచి లండన్‌లోని కెన్నింగ్టన్ ఓవల్‌లో ప్రారంభం కానుంది. ఇప్పటికే 2-1 తేడాతో సిరీస్‌లో ఆధిక్యంలో ఉన్న ఇంగ్లాండ్, ఈ మ్యాచ్ గెలిచి సిరీస్‌ను కైవసం చేసుకోవాలని చూస్తోంది. మరోవైపు, టీమిండియాకు సిరీస్‌ను 2-2తో డ్రాగా ముగించడానికి ఇదే లాస్ట్ ఛాన్స్. ఇరు జట్లు ఈ మ్యాచ్‌ను గెలవడంపై దృష్టి సారించాయి. అయితే, తుది జట్టు సెలక్షన్, ఆటగాళ్ల గాయాలు, అక్కడి వాతావరణం ఈ మ్యాచ్‌ను మరింత ఆసక్తికరంగా మార్చనున్నాయి.
భారత జట్టుకు వికెట్ కీపర్ రిషబ్ పంత్ గాయం రూపంలో పెద్ద దెబ్బ తగిలింది. దీంతో ఈ మ్యాచ్‌లో భారత జట్టులో మార్పులు ఖాయం. పంత్ గాయం కారణంగా, యువ వికెట్ కీపర్ బ్యాట్స్‌మెన్ ధ్రువ్ జురేల్‌కు తుది టెస్ట్‌లో అవకాశం లభించే అవకాశం ఉంది. ఇంగ్లాండ్ జట్టు కూడా తమ కెప్టెన్ బెన్ స్టోక్స్ సేవలను కోల్పోనుంది. అతను ఫిట్‌గా లేకపోవడంతో, అతని గైర్హాజరీలో ఓలీ పోప్‌కు ఇంగ్లాండ్ పగ్గాలు అప్పగించారు.
మ్యాంచెస్టర్ టెస్ట్‌లో ఇంగ్లాండ్ మొదటి ఇన్నింగ్స్‌లో 669 పరుగులు చేసినప్పుడు భారత బౌలింగ్ విభాగం బలహీనంగా కనిపించింది. అరంగేట్రం చేసిన అన్షుల్ కాంబోజ్ తన వేగంతో ఆకట్టుకున్నప్పటికీ, మిగిలిన బౌలర్లు ప్రభావం చూపలేకపోయారు. అయితే, బ్యాట్స్‌మెన్ మాత్రం జట్టును కష్టాల నుండి గట్టెక్కించారు. ముఖ్యంగా రవీంద్ర జడేజా, వాషింగ్టన్ సుందర్ సెంచరీలు చేసి మ్యాచ్‌ను డ్రాగా ముగించడంలో భారత్‌కు సహాయపడ్డారు.
భారత్, ఇంగ్లాండ్ మధ్య ఇప్పటివరకు 140 టెస్ట్ మ్యాచ్‌లు జరిగాయి. ఇందులో భారత్ 36 మ్యాచుల్లో గెలిచింది. ఇంగ్లాండ్ 53 మ్యాచుల్లో గెలిచింది. 51 మ్యాచులు డ్రాగా ముగిశాయి. ఇక పిచ్ విషయానికి వస్తే.. ఓవల్ పిచ్ మొదటి రోజు ఫాస్ట్ బౌలర్లకు అనుకూలంగా ఉంటుంది. రెండో-మూడో రోజు బ్యాట్స్‌మెన్‌లకు అనుకూలంగా ఉంటుంది. నాలుగో-ఐదో రోజు స్పిన్నర్లకు టర్న్ లభిస్తుంది. అయితే, ఈసారి వేసవి ప్రభావం కారణంగా అన్ని పిచ్‌ల స్వభావం ఒకేలా ఉంది. ఓవల్ టెస్ట్‌కు ముందు పిచ్ క్యూరేటర్, కోచ్ గౌతమ్ గంభీర్ మధ్య వివాదం కారణంగా ఈ పిచ్ మరింత చర్చనీయాంశంగా మారింది. మొదటి రెండు రోజులు వర్షం కురిసే అవకాశం ఉంది. ఇది పేస్ బౌలర్లకు సహాయం చేస్తుంది. టాస్ గెలిచిన జట్టు మొదట బౌలింగ్ ఎంచుకోవచ్చు. మూడవ, నాల్గవ రోజులలో వాతావరణం స్పష్టంగా ఉండే అవకాశం ఉంది.. అయితే చివరి రోజు మళ్లీ తేలికపాటి వర్షం కురిసే అవకాశం ఉంది.
మ్యాచ్ లైవ్ ఎక్కడ చూడాలి?
టీవీలో సోనీ స్పోర్ట్స్ నెట్‌వర్క్ లో లైవ్ చూడవచ్చు. మొబైల్/ఆన్‌లైన్‌లో డిస్నీ+ హాట్‌స్టార్ యాప్, వెబ్‌సైట్‌లో లైవ్ స్ట్రీమింగ్ అందుబాటులో ఉంటుంది.
భారత్ ప్లేయింగ్ ఎలెవన్ (అంచనా): యశస్వి జైస్వాల్, కేఎల్ రాహుల్, సాయి సుదర్శన్, శుభమన్ గిల్ (కెప్టెన్), ధ్రువ్ జురేల్ (వికెట్ కీపర్), రవీంద్ర జడేజా, వాషింగ్టన్ సుందర్, శార్దూల్ ఠాకూర్, ఆకాష్ దీప్, మహ్మద్ సిరాజ్, ప్రసిధ్ కృష్ణ.
ఇంగ్లాండ్ (అంచనా): జాక్ క్రాలీ, బెన్ డకెట్, ఓలీ పోప్ (కెప్టెన్), జో రూట్, హ్యారీ బ్రూక్, జాకబ్ బెథెల్, జేమీ స్మిత్ (వికెట్ కీపర్), క్రిస్ వోక్స్, గస్ అట్కిన్సన్, జేమీ ఓవర్టన్, జోష్ టంగ్.
