IND vs ENG : ప్రస్తుతం భారత్, ఇంగ్లాండ్ మధ్య జరుగుతున్న టెస్ట్ సిరీస్‌లో ఐదవ టెస్ట్ మ్యాచ్ కీలకంగా మారింది. ఓవల్ మైదానంలో జరుగుతున్న ఈ మ్యాచ్ మూడో రోజు చాలా కీలకమైంది. తొలి రెండు రోజులు వర్షం కారణంగా ఆటలో అంతరాయాలు ఏర్పడినా, మూడో రోజు వాతావరణం చాలా స్పష్టంగా ఉంటుందని వాతావరణ శాఖ తెలిపింది. దీనితో భారత జట్టు మూడో రోజు ఆటలో పై చేయి సాధించాలని చూస్తోంది. ఓవల్ టెస్ట్ మొదటి, రెండవ రోజు వర్షం కారణంగా మ్యాచ్ చాలాసార్లు నిలిచిపోయింది. కానీ, Accuweather నివేదిక ప్రకారం.. మూడో రోజు వాతావరణం చాలా అనుకూలంగా ఉంటుంది. పగలు ఎండ, ఆకాశం నిర్మలంగా ఉంటుందని, వర్షం పడే అవకాశాలు 10% కంటే తక్కువగా ఉన్నాయని తెలిపింది. దీంతో మూడో రోజు మ్యాచ్ ఎలాంటి అంతరాయం లేకుండా సాగుతుందని అభిమానులు ఆశిస్తున్నారు.
భారత్ రెండవ ఇన్నింగ్స్లో, ఓపెనర్ యశస్వి జైస్వాల్ దూకుడుగా ఆడుతూ హాఫ్ సెంచరీ సాధించాడు. జైస్వాల్ 44 బంతుల్లో 51 పరుగులు చేసి నాటౌట్‌గా ఉన్నాడు. అయితే, కేఎల్ రాహుల్ (7), సాయి సుదర్శన్ (11) తక్కువ పరుగులకే ఔటయ్యారు. రెండవ రోజు ఆట ముగిసేసరికి భారత్ 2 వికెట్ల నష్టానికి 75 పరుగులు చేసి, 52 పరుగుల ఆధిక్యంలో ఉంది. కరుణ్ నాయర్ తొలి ఇన్నింగ్స్లో 57 పరుగులు చేసి జట్టుకు మంచి స్కోరు అందించాడు.
తొలి ఇన్నింగ్స్లో ఇంగ్లాండ్ బ్యాట్స్‌మెన్ బెన్ డకెట్, జాక్ క్రాలీ 92 పరుగుల భాగస్వామ్యం నెలకొల్పారు. కానీ, భారత బౌలర్లు తర్వాత పుంజుకుని, ఇంగ్లాండ్‌ను 247 పరుగులకే ఆలౌట్ చేశారు. ఇంగ్లాండ్‌కు 23 పరుగుల స్వల్ప ఆధిక్యం లభించింది. ఇంగ్లాండ్ ఇన్నింగ్స్లో గుస్ అట్కిన్సన్ ఐదు వికెట్లు పడగొట్టాడు. ఫీల్డింగ్‌లో భారత్ బలహీనంగా కనిపించినా, బౌలర్లు మంచి ప్రదర్శన చేశారు.
మూడో రోజు ఆటలో భారత్ మంచి స్కోరు సాధించి, ఇంగ్లాండ్‌కు భారీ లక్ష్యాన్ని నిర్దేశించాలని చూస్తోంది. జైస్వాల్ క్రీజ్‌లో ఉండటం జట్టుకు మంచి అవకాశం. నైట్‌వాచ్‌మెన్‌గా వచ్చిన ఆకాష్ దీప్ కూడా మంచి సహకారం అందిస్తే భారత్ పట్టు సాధించవచ్చు.
మరిన్ని క్రీడా వార్తల కోసం ఇక్కడ క్లిక్ చేయండి..
