జనసేన పార్టీకి చెందిన మరో నేత వివాదంలో చిక్కుకున్నారు. హోంగార్డుపై దాడి చేశారనే ఆరోపణలు రావటంతో జనసేన అతన్ని పార్టీ నుంచి సస్పెండ్ చేసింది. మచిలీపట్నం నియోజకవర్గానికి చెందిన కర్రి మహేష్ అనే వ్యక్తి.. హోంగార్డు మీద దాడి చేశారనే ఆరోపణలు వచ్చాయి. ఈ ఘటనలో పోలీసులు కర్రి మహేష్ మీద కేసు నమోదు చేశారు. ఈ నేపథ్యంలో కర్రి మహేష్‌ను పార్టీ నుంచి సస్పెండ్ చేస్తూ జనసేన అధిష్టానం నిర్ణయం తీసుకుంది.
పోలీసులు వెల్లడించిన వివరాల ప్రకారం.. మోహన్ రావు అనే వ్యక్తి మచిలీ పట్నం పోలీస్ స్టేషన్‌లో హోంగార్డుగా పని చేస్తున్నారు. అయితే గత ఆదివారం రోజు రాత్రి మోహనరావు మరో కానిస్టేబుల్‌తో కలిసి నైట్ బీట్ నిర్వహించారు. రాత్రి వేళ గస్తీలో భాగంగా ఇద్దరూ కలిసి బందరువిశ్వబ్రాహ్మణుల కాలనీకి వెళ్లారు. అయితే అర్ధరాత్రి 12 గంటల సమయంలో అదే ప్రాంతంలో ఉంటున్న కర్రి మహేష్ అనే జనసేన నేత అక్కడకు వచ్చి హోంగార్డుతో గొడవకు దిగారు. హోంగార్డు మోహనరావును దుర్భాషలాడుతూ అతనిపై దాడి చేశారు. ఈ ఘటనలో మోహనరావుకు తీవ్ర గాయాలు కాగా.. పక్కనున్న కానిస్టేబుల్‌ వెంటనే అతన్ని మచిలీపట్నం ఆస్పత్రికి తరలించారు. ఈ నేపథ్యంలో బాధితుడు మోహనరావు ఫిర్యాదు మేరకు పోలీసులు కర్రి మహేష్ మీద121(1), 351(2) బీఎన్‌ఎస్‌ సెక్షన్ల కింద కేసు పెట్టారు.
మరోవైపు హోంగార్డుపై దాడి చేశారంటూ కర్రి మహేష్‌పై ఆరోపణలు రావటంతో జనసేన పార్టీ అధిష్టానం స్పందించింది. పార్టీ క్రమశిక్షణా నియమావళిని ఉల్లంఘించారంటూ కర్రి మహేష్‌ను పార్టీ నుంచి సస్పెండ్ చేసింది. పార్టీ అధిష్టానం నుంచి వచ్చిన ఆదేశాలతో కర్రి మహేష్‌ను పార్టీ నుంచి సస్పెండ్ చేసినట్లు జనసేన మచిలీపట్నం నియోజకవర్గ ఇన్‌ఛార్జి బండి రామకృష్ణ వెల్లడించారు. కర్రి మహేష్ జనసేన క్రియాశీలక సభ్యత్వాన్ని రద్దు చేశామని.. జనసేన పార్టీ కార్యక్రమాలకు ఆయనను దూరంగా ఉంచుతామని సోమవారం వెల్లడించారు.ఈ ఘటనలో పోలీసుల విచారణ తర్వాత.. ఆ వివరాలను అధిష్టానానికి నివేదిస్తామని.. ఆ తర్వాత అధిష్టానం నిర్ణయం ఆధారంగా కర్రి మహేష్ సభ్యత్వంపై పునరాలోచన చేస్తామని బండి రామకృష్ణ తెలిపారు.
రచయిత గురించివంకం వెంకటరమణవంకం వెంకటరమణ సమయం తెలుగులో డిజిటల్ కంటెంట్ ప్రొడ్యూసర్‌గా పని చేస్తున్నారు. ఆయన ఆంధ్రప్రదేశ్‌కు సంబంధించిన తాజా వార్తలు, ప్రభుత్వ పథకాల సమాచారం, మౌలిక సదుపాయాల కల్పనకు సంబంధించిన కథనాలు, రాజకీయ వార్తలతోపాటు ప్రత్యేక కథనాలు అందిస్తుంటారు. ఏపీ అసెంబ్లీ ఎన్నికలకు సంబంధించి ఆయన ఆసక్తికర కథనాలు, స్పెషల్ ఆర్టికల్స్ రాశారు. గతంలో వీడియో టీమ్‌లో పని చేసిన వెంకటరమణకు స్పోర్ట్స్ న్యూస్ రాసిన అనుభవం కూడా ఉంది. జర్నలిజంలో 8 ఏళ్ల అనుభవం ఉన్న వెంకటరమణ గతంలో ప్రముఖ మీడియా సంస్థల్లో నేషనల్. ఇంటర్నేషనల్, స్పోర్ట్స్, పొలిటికల్ న్యూస్, ఇతర రంగాలకు సంబంధించి వార్తలు రాశారు. ఉత్తమ పనితీరు కనబర్చినందుకు గానూ 2025, ఫిబ్రవరిలో వెంకటరమణ టైమ్స్ ఇంటర్నెట్ నుంచి వావ్ అవార్డును అందుకున్నారు.… ఇంకా చదవండి
