ముఖ్యంగా అన్నంలోకి, రోటీల్లోకి ఈ కూర ఎంతో అద్భుతంగా ఉంటుంది. ఆ నోరూరించే ‘దోసకాయ మటన్’ తయారీ విధానం వివరంగా తెలుసుకుందాం. దోసకాయ మటన్ పేరు వినగానే నోటిలో నీళ్లూరుతాయి. మటన్ ముక్క సాఫ్ట్గా ఉడుకుతూ, దోసకాయ ముక్కలోని పులుపు గ్రేవీకి పడితే వచ్చే ఆ ఘుమఘుమలు ఇల్లంతా నిండిపోతాయి. సాధారణంగా చేసే మటన్ కర్రీ కంటే ఇది భిన్నంగా ఉండటమే కాకుండా, ఇందులో వాడే కొన్ని ప్రత్యేక మసాలాలు ఈ కూరకు హోటల్ స్టైల్ రుచిని ఇస్తాయి. ఇంటిల్లిపాది లొట్టలేసుకుంటూ తినే ఆ వినూత్న మాంసాహార వంటకం తయారీ విధానం ఇదే.
కావలసిన పదార్థాలు
ముందుగా అర కిలో మటన్, ఒక పెద్ద కూర దోసకాయ సిద్ధం చేసుకోవాలి. మసాలా కోసం అరకప్పు పచ్చికొబ్బరి తురుము, ఒక ఉల్లిగడ్డ, నాలుగు పచ్చిమిర్చి, ఒక టేబుల్ స్పూన్ గసగసాలు, పది జీడిపప్పులు తీసుకోవాలి. ఇక పోపు కోసం అరకప్పు నూనె, కరివేపాకు, ఒక టీస్పూన్ గరం మసాలా, రెండు టీస్పూన్ల కారం, ఒక టేబుల్ స్పూన్ అల్లం వెల్లుల్లి పేస్ట్, ఒక టీస్పూన్ పసుపు, తగినంత ఉప్పు, కొత్తిమీర తురుము సిద్ధం చేసుకోవాలి.
తయారీ విధానం
- మటన్ను బాగా కడిగి అరగంట పాటు ఉప్పు నీళ్లలో నానబెట్టాలి. ఇలా చేయడం వల్ల ముక్క మెత్తగా ఉడుకుతుంది. కుక్కర్లో మటన్, ఒక లీటరు నీళ్లు పోసి ఏడు విజిల్స్ వచ్చే వరకు ఉడికించి పక్కన పెట్టుకోవాలి.
- మిక్సీ గిన్నెలో పచ్చికొబ్బరి తురుము, జీడిపప్పు, గసగసాలు వేసి కొద్దిగా నీళ్లు పోసి మెత్తగా పేస్ట్ చేసుకోవాలి. ఉల్లిపాయ, పచ్చిమిర్చిని కూడా విడిగా పేస్ట్ చేసి పెట్టుకోవాలి.
- స్టవ్ మీద కడాయి పెట్టి నూనె వేడి చేయాలి. నూనె కాగాక కరివేపాకు, ఉల్లిగడ్డ-పచ్చిమిర్చి పేస్ట్ వేసి పచ్చి వాసన పోయే వరకు వేయించాలి. ఆ తర్వాత తొక్క తీసి ముక్కలుగా కోసిన దోసకాయలను వేయాలి. ఇందులో కారం, అల్లం వెల్లుల్లి పేస్ట్, పసుపు, గరం మసాలా, పచ్చికొబ్బరి మిశ్రమం కూడా చేర్చి బాగా వేయించాలి.
- అన్నీ బాగా వేగాక మటన్ ఉడికించిన నీళ్లు పోసి, మూతపెట్టి సన్నటి మంటపై పది నిమిషాలు ఉడికించాలి. గ్రేవీ మరుగుతున్నప్పుడు ఉడికించిన మటన్ ముక్కలు, తగినంత ఉప్పు, కొత్తిమీర తురుము వేసి మరో రెండు నిమిషాలు ఉంచి దించేయాలి.
ఈ కూరలో జీడిపప్పు, గసగసాల పేస్ట్ వాడటం వల్ల గ్రేవీ చిక్కగా, కమ్మగా వస్తుంది. దోసకాయ ముక్కలు మరీ మెత్తగా అవ్వకుండా చూసుకుంటే తినేటప్పుడు రుచి బాగుంటుంది. దోసకాయ మటన్ అంటే కేవలం ఒక కూర మాత్రమే కాదు, అది ఒక ఎమోషన్. వేడి వేడి అన్నంలో ఈ కూర వేసుకుని తింటే ఆ తృప్తే వేరు.
