ఏపీలో చంద్రగ్రహణం వేళ తెరిచి ఉండే శ్రీకాళహస్తి ఆలయం.. ప్రత్యేకత ఇదే

చంద్రగ్రహణం కారణంగా తిరుమల సహా సహా ప్రముఖ ఆలయాలన్నింటినీ మూసివేశారు. అయితే దేశంలో ఎక్కడా లేనివిధంగా శ్రీకాళహస్తి ఆలయం మాత్రం గ్రహణ కాలంలోనూ తెరిచే ఉంటుంది. అంతేకాదు.. ఏ ఆలయంలో లేనివిధంగా గ్రహణ కాలంలో ఇక్కడి స్వామి, అమ్మవార్లకు అభిషేకాలు నిర్వహిస్తారు. భక్తులకు యథావిధిగా దర్శనాలను కల్పిస్తారు. ఇంకో మాటలో చెప్పాలంటే.. మామూలు రోజుల కంటే, చంద్రగ్రహణం రోజున భక్తులు కాస్త ఎక్కువగానే దర్శనానికి వస్తుంటారు. రాహు, కేతు పూజలకు ప్రసిద్ధమైన శ్రీకాళహస్తి ఆలయంలో చంద్రగ్రహణం రోజును మరింత పెద్ద సంఖ్యలో పూజలు జరుగుతాయి. శ్రీకాళహస్తీశ్వరుడికి, అమ్మవారికి గ్రహణ కాలంలో గ్రహణ కాల శాంతి అభిషేకాలు నిర్వహిస్తారు. కేతు గ్రహస్థ చంద్రగ్రహణాన్ని పురస్కరించుకొని శ్రీకాళహస్తి ఆలయంలో సాయంత్రం 6:47 గంటలకు గ్రహణ కాల శాంతి అభిషేకాలు నిర్వహించనున్నారు. చంద్రగ్రహణం మధ్యాహ్నం 3:20 నిమిషాలకు ప్రారంభమై, సాయంత్రం 6 గంటల 47 నిమిషాలకు ముగియనుంది. శ్రీకాళహస్తీశ్వర స్వామి ‘వాయులింగం’ స్వరూపంగా భక్తులకు దర్శనమిస్తారు. ఇక్కడ స్వామికి 24 నక్షత్రాలతో అలంకార కవచము, మూడు తలల నాగ సర్పాకార ఆభరణము అలంకారంగా ఉంటుంది. దీంతో ఇక్కడి వాయులింగం గ్రహణాలకు అతీతమని, గ్రహాలేవీ ఇక్కడ పనిచేయవని పండితులు తెలిపారు. అందుకే, గ్రహణ కాలంలో స్వామి అమ్మవార్లకు పూజలు కొనసాగుతాయని, భక్తులను దర్శనానికి అనుమతిస్తామని చెప్పారు.



Source link