ఆధునిక సాంకేతిక పరికరాల వినియోగం పెరుగుతున్న కొద్దీ వ్యక్తిగత గోప్యతపై కొత్త ఆందోళనలు వ్యక్తమవుతున్నాయి. మెటా రూపొందించిన స్మార్ట్ కళ్లద్దాల ద్వారా రికార్డు అయ్యే దృశ్యాలను వేల కిలోమీటర్ల దూరంలో ఉన్న ఉద్యోగులు పరిశీలిస్తున్నారనే విషయం తాజాగా వెలుగులోకి వచ్చింది. కెన్యా రాజధాని నైరోబీలో పనిచేస్తున్న సాంకేతిక ఉద్యోగులు ఈ దృశ్యాలను పరిశీలించి కృత్రిమ మేధస్సు వ్యవస్థలకు అవసరమైన సమాచారంగా వర్గీకరిస్తున్నట్లు రిపోర్టులు వెల్లడించాయి.
రే-బాన్ మెటా స్మార్ట్ కళ్లద్దాలలో చిన్న కెమెరాలు, శబ్దాన్ని నమోదు చేసే పరికరాలు అమర్చబడి ఉంటాయి. వీటితో వినియోగదారులు ఫోటోలు తీయడం, దృశ్యాలను నమోదు చేయడం చేయవచ్చు. ఈ కళ్లద్దాల ద్వారా నమోదు అయిన దృశ్యాలను కెన్యాలోని సాంకేతిక సేవల సంస్థ సామాలో పనిచేస్తున్న ఉద్యోగులు పరిశీలించి వాటికి గుర్తులు పెడుతున్నారు. ఈ ప్రక్రియ కృత్రిమ మేధస్సు వ్యవస్థలను అభివృద్ధి చేయడంలో భాగంగా ఉపయోగపడుతుంది. అయితే ఈ దృశ్యాల్లో వ్యక్తిగత జీవితానికి సంబంధించిన ఘటనలు కూడా కనిపిస్తున్నాయని కొందరు ఉద్యోగులు తెలిపారు. ఇంట్లో జరిగే వ్యక్తిగత సందర్భాలు, దుస్తులు మార్చుకునే దృశ్యాలు, మరికొన్ని గోప్యమైన పరిస్థితులు కూడా నమోదైనట్లు వారు పేర్కొన్నారు. ఈ దృశ్యాలను పరిశీలించే సమయంలో తమకు అసౌకర్యంగా అనిపిస్తోందని చెప్పారు. కొన్ని దృశ్యాల్లో వ్యక్తుల బ్యాంకు కార్డులు లేదా ఇతర వ్యక్తిగత వివరాలు కూడా అనుకోకుండా కనిపిస్తున్నాయని వారు వెల్లడించారు. ఇలాంటి దృశ్యాలు బయటకు వస్తే పెద్ద వివాదాలకు దారి తీసే అవకాశం ఉందని కూడా అభిప్రాయపడ్డారు. అయితే తమ పనిలో భాగంగా వీటిని పరిశీలించాల్సి వస్తోందని, ప్రశ్నలు అడిగితే ఉద్యోగం కోల్పోయే ప్రమాదం ఉందని కొందరు తెలిపారు.
గోప్యత పరిరక్షణ విషయంలో వినియోగదారుల నియంత్రణే ముఖ్యమని మెటా పేర్కొంటోంది. సంస్థ గోప్యత విధానంలో వినియోగదారులు ఏఐతో చేసే సంభాషణలు లేదా పరస్పర చర్యలను కొన్ని సందర్భాల్లో మెషీన్స్ ద్వారా లేదా మనుషుల ద్వారా పరిశీలించవచ్చని తెలిపింది. అందువల్ల సున్నితమైన వివరాలను పంచుకోవద్దని వినియోగదారులకు సూచించింది. ఈ కళ్లద్దాలను ఉపయోగించే వ్యక్తి “హే మెటా” అని పలికితే ఏఐ అసిస్టెంట్ స్పందిస్తాడు. అప్పుడు కెమెరాను ప్రారంభించి ఫోటోలు తీయడం, వీడియోలను రికార్డు చేయడం లేదా ప్రత్యక్షంగా ఇతరులతో మాట్లాడడం వంటి అవకాశాలు అందుబాటులో ఉంటాయి.
కంటి అద్దాల తయారీ సంస్థ ఎస్సిలోర్ లక్సోటికాతో కలిసి ఈ పరికరాలను తయారు చేశారు. 2025లో సుమారు 70 లక్షల స్మార్ట్ కళ్లద్దాలను విక్రయించినట్లు సంస్థ తెలిపింది. అంతకుముందు 2023–2024 సంవత్సరాల్లో కలిపి సుమారు 20 లక్షల పరికరాలు అమ్ముడైనట్లు సమాచారం. సాంకేతిక పరికరాలు సౌలభ్యాన్ని అందిస్తున్నప్పటికీ, వినియోగదారుల వ్యక్తిగత గోప్యత రక్షణపై మరింత జాగ్రత్త అవసరమని నిపుణులు సూచిస్తున్నారు.
