నేటి కాలంలో పెరిగిన బరువును తగ్గించుకోవడానికి ప్రజలు జిమ్ములు, మందులు, కఠినమైన డైట్లు ఇలా రకరకాల పద్ధతులను అనుసరిస్తున్నారు. అయితే వీటన్నింటికంటే భిన్నంగా వైద్య పరిభాషలో టైమ్ రిస్ట్రిక్టెడ్ ఈటింగ్ అని పిలిచే పద్ధతి ప్రస్తుతం ప్రపంచవ్యాప్తంగా ప్రాచుర్యం పొందుతోంది. కేవలం ఆహారం తినే సమయాన్ని క్రమబద్ధీకరించడం ద్వారా బరువు తగ్గడమే కాకుండా అనేక ఆరోగ్య ప్రయోజనాలను పొందవచ్చని నిపుణులు చెబుతున్నారు.
ఏమిటీ టైమ్ రిస్ట్రిక్టెడ్ ఈటింగ్..?
ఢిల్లీలోని GTB హాస్పిటల్ డైటీషియన్ డాక్టర్ అనామిక గౌర్ వివరణ ప్రకారం.. ఇది రోజులో ఏ సమయంలోనైనా తినడానికి బదులుగా, తినే సమయాన్ని ఒక నిర్దిష్ట పరిమితికి కుదించే పద్ధతి. ఉదాహరణకు.. ఒక వ్యక్తి ఉదయం 9 గంటల నుండి సాయంత్రం 5 గంటల మధ్య మాత్రమే ఆహారం తీసుకుని, ఆ తర్వాత మరుసటి రోజు ఉదయం 9 గంటల వరకు ఏమీ తినకుండా ఉండాలి. ఈ 16 గంటల విరామ సమయంలో కేవలం నీరు, కొబ్బరి నీళ్లు లేదా గ్రీన్ టీ మాత్రమే తీసుకోవచ్చు.
శరీరంపై దీని ప్రభావం ఎలా ఉంటుంది?
మనం ఉపవాసం ఉన్న సమయంలో శరీరం తన జీవక్రియ ప్రక్రియకు కొంత విశ్రాంతిని ఇస్తుంది. ఈ సమయంలో ఆహారం అందనప్పుడు, శరీరం తనలో నిల్వ ఉన్న కొవ్వును శక్తిగా మార్చుకుని ఉపయోగించుకుంటుంది. దీనివల్ల సహజంగానే బరువు తగ్గుతారు. జీర్ణ అవయవాలకు 16 గంటల విశ్రాంతి లభించడం వల్ల శరీరం తనను తాను మరమ్మతు చేసుకుంటుంది. కేలరీల వినియోగం తగ్గడం వల్ల బరువు నియంత్రణలో ఉండటమే కాకుండా టైప్-2 డయాబెటిస్ రోగులలో రక్త చక్కెర స్థాయిలు అదుపులో ఉంటాయి. గుండె జబ్బులు, రక్తపోటు సమస్యలు తగ్గడానికి కూడా ఇది దోహదపడుతుంది.
ఎవరు దూరంగా ఉండాలి?
ఈ పద్ధతి ఆరోగ్యకరమైనదే అయినప్పటికీ అందరికీ సరిపోకపోవచ్చు. ముఖ్యంగా గర్భిణీ స్త్రీలు, వృద్ధులు, క్రీడాకారులు, తీవ్రమైన అనారోగ్య సమస్యలతో బాధపడుతున్న వారు వైద్యుల సలహా లేకుండా దీనిని ప్రయత్నించకూడదు. బరువు తగ్గాలని ఆశించే వారు తమ జీవనశైలిలో చిన్న మార్పులు చేసుకోవడం ద్వారా మెరుగైన ఫలితాలు పొందవచ్చు. అయితే, ఏదైనా కొత్త డైట్ ప్రారంభించే ముందు నిపుణులైన వైద్యులను సంప్రదించడం ఎంతో ముఖ్యం.
