మూవీ రివ్యూ: బ్యాండ్ మేళం
నటీనటులు: హర్ష్ రోషన్, శ్రీదేవి ఆపల్ల, సాయికుమార్, యోగిత తదితరులు
సంగీతం: విజయ్ బుల్గానిన్
సినిమాటోగ్రఫీ: సతీష్ ముత్యాల
స్క్రీన్ ప్లే & ఎడిటింగ్: శివ ముప్పరాజు
దర్శకత్వం: సతీష్ జవ్వాజి
నిర్మాతలు: కావ్య, శ్రావ్య
గతేడాది వచ్చిన ‘కోర్ట్’ సినిమాతో ప్రేక్షకులను మెప్పించిన యంగ్ పెయిర్ హర్ష్ రోషన్, శ్రీదేవి ఆపల్ల జంటగా నటించిన తాజా చిత్రం ‘బ్యాండ్ మేళం’. ఆంధ్ర నేపథ్యం నుంచి ఈసారి తెలంగాణ బ్యాక్డ్రాప్కి మారి ఈ జంట చేసిన ఈ మాస్ సినిమా థియేటర్లలో ఏ మేర ఆకట్టుకుందో రివ్యూలో చూద్దాం..
కథ:
తెలంగాణలోని Y పల్లెటూరులో గిరి (హర్ష్ రోషన్) తన మేనమామ కూతురు రాజీ (శ్రీదేవి)ని చిన్నప్పటి నుంచే ప్రాణంగా ప్రేమిస్తుంటాడు. పెద్దలు కూడా వాళ్ళిద్దరికీ పెళ్లి చేయాలనుకుంటారు. కానీ కాలానుగుణంగా వారి పరిస్థితులు తారుమారవుతాయి. గిరి కుటుంబం ఆర్థికంగా చితికిపోయి చిన్న ఇంట్లోకి మారితే, రాజీ తండ్రి (సాయికుమార్) మాత్రం బాగా డబ్బు సంపాదించి రిచ్ అవుతాడు. గిరి కనీసం టెన్త్ క్లాస్ కూడా పాస్ కాలేదు, కానీ రాజీ మాత్రం ఇంజనీరింగ్ చదువుతుంటుంది. అయినా సరే.. రాజీ తనదేనని గిరి అతిగా ప్రవర్తిస్తుంటాడు. ముందు టెన్త్ పాస్ అయి, మ్యూజిక్ మీద ఉన్న ఇష్టాన్ని నిరూపించుకోమని రాజీ చెబుతున్నా వినకుండా.. తన ఫ్రెండ్స్తో కలిసి బ్యాండ్ వాయిస్తూ, తాగుతూ ఊర్లో ఆవారాగా తిరుగుతుంటాడు గిరి. మరి గిరిలో మార్పు వచ్చిందా? తన బ్యాండ్తో యూట్యూబ్లో సక్సెస్ అయ్యాడా? తన క్లాస్మేట్తో సెటిల్ అవ్వకుండా రాజీ.. గిరిని అంగీకరించిందా? అన్నదే మిగతా కథ.
కథనం:
‘కోర్ట్’ సినిమాలో ఆకట్టుకున్న హర్ష్ రోషన్, శ్రీదేవి జంట మ్యాజిక్ ఈసారి మాత్రం పెద్దగా వర్కవుట్ అవ్వలేదు. అసలు ఈ సినిమాకు ప్రధాన మైనస్ పాయింట్.. అవుట్ డేటెడ్, ఓల్డ్ స్క్రిప్ట్..! విషయం లేని కథ, స్క్రీన్ ప్లేతో సినిమా చేయాలనుకోవడమే దర్శక నిర్మాతలు చేసిన సాహసం. సిల్లీగా ఉండే ప్లాట్.. ఏ మాత్రం ఆకట్టుకోని పాటలు, సీన్స్ సినిమాకు మైనస్ అయ్యాయి. కోన వెంకట్ లాంటి సీనియర్ రైటర్ ఉన్నా కూడా కథలో ఎలాంటి కొత్తదనం లేదు, ప్రేక్షకుడిని కట్టిపడేసే ఎమోషనల్ కనెక్ట్ అసలే లేదు. సీరియస్ సన్నివేశాల్లోనూ కామెడీ చేయాలనుకోవడం ఏంటనేది అర్థం కాని విషయం. మేనకోడలిపై విపరీతమైన ప్రేమ పెంచుకుని, ఆమె తనకే సొంతం అనుకునే కుర్రాడి కాన్సెప్ట్ తెలుగు తెరకు కొత్తేమీ కాదు. ఎన్నో ఏళ్ల క్రితమే ఇలాంటి కథలు చాలా వచ్చాయి. కనీసం ఆ పాత కథనైనా కొత్తగా తీశారా అంటే అదీ లేదు. కథ, దర్శకత్వ బాధ్యతలు తీసుకున్న సతీష్ జవ్వాజి మేకింగ్ చాలా ఔత్సాహికంగా అనిపిస్తుంది. సినిమా నిడివి కేవలం 2.20 గంటలే అయినా, థియేటర్లో కూర్చున్న ప్రేక్షకుల సహనానికి పరీక్ష పెడుతుంది. ‘బ్యాండ్ మేళం’ అనే టైటిల్ జస్టిఫికేషన్ కోసం ప్రతీ 10 నిమిషాలకు ఓసారి హీరో అండ్ గ్యాంగ్ బ్యాండ్ వాయిస్తూ ఉంటారు. వీక్ స్క్రిప్ట్ ఏ దశలోనూ ఆకట్టుకోదు. క్లైమాక్స్ కూడా ఏమంత ఆకట్టుకోలేదు. ఫస్టాఫ్ సెకండాఫ్ అని తేడా లేదు.. విషయం లేని కథ, కథనాలతో బ్యాండ్ మేళం ఎక్కడా ఆకట్టుకునే ప్రయత్నం అయితే చేయలేదు.
నటీనటులు:
హర్ష్ రోషన్ క్యారెక్టరైజేషన్ కాస్త హైపర్గా అనిపిస్తుంది. కోర్టులో చాలా సెటిల్డ్గా కనిపించిన ఈ కుర్రాడు ఈసారి మాస్ హీరోగా రెచ్చిపోయాడు. లౌడ్గా, అసహజంగా అనిపించాడు. శ్రీదేవి ఆపల్ల ఉన్నంతలో తన పరిమితమైన పాత్రలో పర్వాలేదనిపించింది కానీ, ఆమెకు పెర్ఫార్మ్ చేయడానికి పెద్దగా స్కోప్ దక్కలేదు. సాయి కుమార్, యోగిత, గోపరాజు లాంటి నటులు పర్లేదు.. హీరో ఫ్రెండ్స్ గ్యాంగ్ కూడా ఓకే.
టెక్నికల్ టీం:
ఒక ‘మ్యూజిక్ బ్యాండ్’ బ్యాక్డ్రాప్లో వస్తున్న సినిమా అంటే ఆల్బమ్ చాలా స్ట్రాంగ్గా ఉండాలి. కానీ విజయ్ బుల్గానిన్ సంగీతం ఏమంత ఆకట్టుకోలేదు. డీఓపీ సతీష్ ముత్యాల కెమెరా వర్క్ పర్లేదు. ఎడిటింగ్ అయితే వీక్.. కానీ దర్శకుడి ఛాయిస్ కాబట్టి ఎడిటర్ను తప్పుబట్టలేం. నిర్మాణ విలువలు బాగున్నాయి.. దర్శకుడు సతీష్ జువ్వాజీ రాసుకున్న కథే మైనస్.. చాలా ఓల్డ్ స్టోరీ ఇది.. దాంతో ఎక్కడా మనోడి దర్శకత్వ ప్రతిభ చూపించేంత సన్నివేశాలు కూడా లేవు.
పంచ్ లైన్:
ఓవరాల్గా బ్యాండ్ మేళం.. సౌండ్ లేదు..!
