IPL 2026 : ఈ వేసవిలో అసలైన క్రికెట్ పండగ మొదలవుతోంది! ఐపీఎల్ సీజన్ 19 (IPL 2026) అట్టహాసంగా ప్రారంభం కానుంది. మార్చి 28న బెంగళూరులోని చిన్నస్వామి స్టేడియం వేదికగా రాయల్ ఛాలెంజర్స్ బెంగళూరు (RCB), సన్రైజర్స్ హైదరాబాద్ (SRH) జట్లు తలపడనున్నాయి. చాలా కాలం తర్వాత చిన్నస్వామి స్టేడియంపై ఉన్న నిషేధం తొలగిపోవడంతో, ఈసారి సొంత గడ్డపై ఆర్సీబీ గర్జించనుంది. ఈ ఉత్కంఠభరిత పోరు కోసం క్రికెట్ అభిమానులు కళ్లు కాయలు కాచేలా ఎదురుచూస్తున్నారు.
ఐపీఎల్ 2026 సీజన్ ప్రారంభానికి ముందే చిన్నస్వామి స్టేడియం విషయంలో ఒక కీలక పరిణామం చోటుచేసుకుంది. గత కొంతకాలంగా ఈ స్టేడియంపై ఉన్న నిషేధాన్ని అధికారులు ఎత్తివేయడంతో, బీసీసీఐ ఇక్కడ 5 మ్యాచ్లకు అనుమతి ఇచ్చింది. ఇందులో భాగంగానే ఈ సీజన్ తొలి మ్యాచ్ ఆర్సీబీ మరియు ఎస్ఆర్హెచ్ మధ్య జరగనుంది. గతేడాది ఈ మైదానంలో ఆడిన 5 మ్యాచ్ల్లో ఆర్సీబీ 2 గెలిచి, 3 ఓడిపోయింది. ఇక ఇక్కడ విరాట్ కోహ్లీకి తిరుగులేని రికార్డు ఉంది. 106 ఇన్నింగ్స్ల్లో కోహ్లీ ఏకంగా 3618 పరుగులు చేసి రికార్డు సృష్టించాడు.
వరుణుడి అడ్డంకి ఉంటుందా?
శనివారం జరగబోయే ఈ మ్యాచ్పై వర్షం ప్రభావం ఉండే అవకాశం ఉంది. బెంగళూరు వాతావరణ శాఖ తెలిపిన వివరాల ప్రకారం.. మధ్యాహ్నం సమయంలో భారీ వర్షం కురిసే ఛాన్స్ ఉంది. అయితే, మ్యాచ్ ప్రారంభమయ్యే సాయంత్రం సమయంలో వర్షం కురిసే అవకాశం కేవలం 5 శాతం మాత్రమే అని నిపుణులు చెబుతున్నారు. ఒకవేళ వర్షం వచ్చినా మ్యాచ్ పూర్తిగా రద్దు అయ్యే అవకాశం తక్కువని, ఓవర్లు తగ్గించే ఛాన్స్ ఉండవచ్చని సమాచారం.
కొత్త సారథుల మధ్య పోరు
ఈ సీజన్లో ఇరు జట్లు కొత్త కెప్టెన్లతో బరిలోకి దిగుతున్నాయి. ఆర్సీబీ పగ్గాలను రజత్ పాటిదార్ అందుకున్నాడు. విరాట్ కోహ్లీ మార్గదర్శకత్వంలో ఆర్సీబీని విజయపథంలో నడిపించాలని రజత్ ఉవ్విళ్లూరుతున్నాడు. మరోవైపు, సన్రైజర్స్ హైదరాబాద్ జట్టుకు ఇషాన్ కిషన్ కెప్టెన్సీ వహిస్తున్నాడు. ట్రావిస్ హెడ్, క్లాసెన్ వంటి పవర్ఫుల్ ప్లేయర్లతో ఎస్ఆర్హెచ్ జట్టు కూడా చాలా బలంగా కనిపిస్తోంది. పాత శత్రుత్వం, కొత్త కెప్టెన్లు వెరసి ఈ మ్యాచ్ నరాలు తెగే ఉత్కంఠను రేపడం ఖాయం.
లైవ్ టెలికాస్ట్, సమయాలు
మార్చి 28న సాయంత్రం 7:30 గంటలకు మ్యాచ్ ప్రారంభం కానుంది. అంతకుముందు 7:00 గంటలకు టాస్ వేస్తారు. ఈసారి చిన్నస్వామి స్టేడియంలో ఎటువంటి ఓపెనింగ్ సెరెమనీ ఉండదని నిర్వహకులు స్పష్టం చేశారు. ఈ మ్యాచ్ లైవ్ టెలికాస్ట్ను స్టార్ స్పోర్ట్స్ నెట్వర్క్ ఛానెళ్లలో చూడవచ్చు. మొబైల్ వినియోగదారులు జియో హాట్స్టార్ యాప్, వెబ్సైట్లో ఉచితంగా లైవ్ స్ట్రీమింగ్ను వీక్షించవచ్చు.
మరిన్ని క్రీడా వార్తల కోసం ఇక్కడ క్లిక్ చేయండి..
