ఇప్పుడు అప్పు అనేది చాలామందిని వేధిస్తున్న సమస్య. అప్పును “నిప్పు”తో పోలుస్తూ, దానిని సమర్థవంతంగా ఎలా నిర్వహించాలో, అప్పుల ఊబి నుంచి ఎలా బయటపడవచ్చోనని బిజినెస్ నిపుణులు పలు సలహాలు ఇస్తున్నారు. అప్పులన్నీ చెడ్డవి కావు, కానీ ఒక అప్పు తీర్చడానికి మరో అప్పు చేస్తున్నారంటే మీరు ప్రమాదకరమైన “రెడ్ జోన్”లో ఉన్నారని అర్థం. ఆదాయం పెరగకుండా అప్పులు, వడ్డీలు పెరుగుతుంటే అది ఆర్థికంగానే కాకుండా ఆరోగ్యపరంగా కూడా తీవ్ర నష్టాన్ని కలిగిస్తుంది.
మీకున్న అప్పులన్నింటినీ జాబితా చేసి, ఏ అప్పుకు ఎక్కువ వడ్డీ కడుతున్నారో దాన్ని ముందుగా తీర్చాలి. తక్కువ వడ్డీకి దొరికే బ్యాంక్ లోన్లతో అధిక వడ్డీ ఉన్న ప్రైవేట్ అప్పులను తీర్చివేయడం మంచిది. అప్పులు తలకి మించినప్పుడు, ఆస్తులపై మక్కువతో వాటిని అంటిపెట్టుకుని ఉండటం తెలివైన పని కాదు. ఆస్తులను అమ్మయినా సరే అప్పులన్నీ తీర్చి “జీరో” స్థాయికి రావాలి. అప్పులు లేని ప్రశాంత జీవితం ఉంటే, ఆస్తులను మళ్ళీ సంపాదించుకోవచ్చు.
అప్పులు ఉన్నప్పుడు కొత్తగా పెట్టుబడులు పెట్టడం వల్ల ప్రయోజనం ఉండదు. ఎందుకంటే పెట్టుబడులపై వచ్చే లాభం కంటే, అప్పులపై మీరు కట్టే వడ్డీయే చాలా ఎక్కువగా ఉంటుంది. బయట వ్యక్తుల వద్ద అధిక వడ్డీకి అప్పులు తీసుకోవడం కంటే బ్యాంకుల నుంచి రుణాలు పొందడం సురక్షితం. బ్యాంకులు మీ ఆదాయ సామర్థ్యాన్ని బట్టే అప్పు ఇస్తాయి కాబట్టి అది ఒక రకమైన ఆర్థిక క్రమశిక్షణను అలవరుస్తుంది.
అప్పులు ఉన్నా లేకపోయినా హెల్త్ ఇన్సూరెన్స్, టర్మ్ ఇన్సూరెన్స్ ఉండాలి. ఇవి కష్టకాలంలో కుటుంబాన్ని ఆర్థిక సంక్షోభం నుంచి రక్షిస్తాయి. అప్పుల నుంచి పారిపోవడం పరిష్కారం కాదు. అప్పు ఇచ్చిన వారితో మాట్లాడి, సమయం కోరి, క్రమంగా చెల్లించే ప్రయత్నం చేయాలి.
అప్పు తీర్చడానికి మళ్ళీ కొత్త అప్పు చేయడం అనేది మంటలో పెట్రోల్ పోయడం వంటిదని.. అది సమస్యను మరింత పెద్దది చేస్తుందని హెచ్చరించారు. కఠినమైన నిర్ణయాలు తీసుకుని అప్పుల నుంచి బయటపడటమే సుఖవంతమైన భవిష్యత్తుకు పునాది.
