ఆంధ్రప్రదేశ్‌లో మరో రైల్వే లైన్ ఏర్పాటుకు అడుగులు పడుతున్నాయి. చిత్తూరు జిల్లాలోని పుత్తూరు, తమిళనాడులోని అత్తిపట్టు మధ్య రైల్వే లైన్ ఏర్పాటు ప్రక్రియ వేగం పుంజుకుంది. అత్తిపట్టు – పుత్తూరు రైల్వే లైన్ రూట్ మ్యాప్‌ను అధికారులు సిద్ధం చేశారు. ఈ రూట్లో మొత్తం ఎనిమిది స్టేషన్లు ప్రతిపాదించారు. అందులో నాలుగు స్టేషన్లు ఏపీలో ఉండగా.. మరో నాలుగు స్టేషన్లు తమిళనాడులో ఉంటాయి. 88.30 కిలోమీటర్ల మేర పుత్తూరు – అత్తిపట్టు రైల్వే లైన్ ఏర్పాటుకు రూట్ మ్యాప్ సిద్ధం చేశారు. ఈ రైల్వే లైన్ ఏర్పాటు పూర్తి అయితే తిరవల్లూరు – పుత్తూరు రూట్లో రద్దీ తగ్గుతుందని రైల్వేశాఖ భావిస్తోంది.
చిత్తూరు జిల్లాకు సంబంధించి నారాయణవనం, కృష్ణమరాజు కండ్రిగ, పిచ్చాటూరు, నాగలాపురంలలో రైల్వే స్టేషన్లను ప్రతిపాదించారు. పుత్తూరు నుంచి నారాయణవనం రైల్వే స్టేషన్ 3 కిలోమీటర్లు దూరంలో ఉంటుంది. ఆ తర్వాత కృష్ణమరాజు కండ్రిగ, పిచ్చాటూరు, నాగలాపురం రైల్వే స్టేషన్లు పది కిలోమీటర్ల దూరం చొప్పున ఉండనున్నాయి. వాస్తవానికి చిత్తూరు జిల్లాలో మూడు స్టేషన్లను ఏర్పాటు చేయాలని భావించారు. అయితే కైలసనాథకోనకు వచ్చే పర్యాటకులను దృష్టిలో ఉంచుకుని కృష్ణమరాజుకండ్రిగ వద్ద రైల్వే స్టేషన్ ప్రతిపాదించారు. అలాగే తమిళనాడులోని ఊత్తుకోట, పాలవ్కాకం, పెరియపాలెం, గంగయాదికుప్పంలో స్టేషన్లు ఏర్పాటు చేయాలని రూట్ మ్యాప్‌లో ప్రతిపాదించారు. ఇక పుత్తురు- అత్తిపట్టు రైల్వే మార్గంలో 15 పెద్ద, 159 చిన్న వంతెనలు ప్రతిపాదించారు. అలాగే ప్రయాణికుల కోసం ప్రతిరోజూ ఆరు బోగీలు వుండే నాలుగు ఈఎంయులు 4 ట్రిప్పులు తిరగనున్నాయి.
పుత్తూరు- అత్తిపట్టు రైల్వే లైన్ నిర్మాణం పూర్తి అయితే తిరువల్లూరు- పుత్తూరు మార్గంలో రద్దీ తగ్గుతుందని రైల్వే అధికారులు భావిస్తున్నారు. అలాగే తమిళనాడులోని ఎన్నూరు పోర్టుకు ఇనుప ఖనిజం తరలింపు వేగంగా జరుగుతుంది. బళ్లారి నుంచి ఎన్నూరు పోర్టుకు ఇనుప ఖనిజం వేగంగా తరలించాలంటే అత్తిపట్టు – పుత్తూరు రైల్వే లైన్ కీలకం కానుంది. ఎగుమతులు, దిగుమతుల విషయంలో చెన్నై పోర్టుపై ఒత్తిడిని పెరుగుతోంది. ఈ నేపథ్యంలోనే అత్తిపట్టు పోర్టును కేంద్ర ప్రభుత్వం అభివృద్ధి చేస్తోంది. అందులో భాగంగానే అత్తిపట్టు పోర్టుకు అనుసంధానం పెంచేలా ఈ పుత్తూరు- అత్తిపట్టు రైల్వే లైన్ నిర్మాణం చేపడుతోంది.
రచయిత గురించివంకం వెంకటరమణవంకం వెంకటరమణ సమయం తెలుగులో డిజిటల్ కంటెంట్ ప్రొడ్యూసర్‌గా పని చేస్తున్నారు. ఇక్కడ క్రీడావార్తలతో పాటు జాతీయ, అంతర్జాతీయ వ్యవహారాలకు సంబంధించిన తాజా వార్తలు, ప్రత్యేక కథనాలు అందిస్తుంటారు. ఆయనకు జర్నలిజంలో 6 సంవత్సరాల అనుభవం ఉంది. గతంలో ప్రముఖ మీడియా సంస్థల్లో స్పోర్ట్స్, పొలిటికల్ న్యూస్, ఇతర రంగాలకు సంబంధించి వార్తలు రాశారు.… ఇంకా చదవండి
