Nara Lokesh,నా పదవిని మరొకరికి ఇవ్వాలనుకుంటున్నా.. మంత్రి లోకేష్ ఆసక్తికర వ్యాఖ్యలు – andhra pradesh minister nara lokesh press meet in visakhapatnam

డిప్యూటీ సీఎం పదవి అంశంపైనా స్పందించిన నారా లోకేష్ స్పందించారు. తాను కార్యకర్తగానే పనిచేస్తానని.. ఒక వ్యక్తి ఒక పదవిలో మూడు టర్మ్‌లకు మించి ఉండకూడదు అనేది తన అభిప్రాయం అన్నారు. జాతీయ ప్రధాన కార్యదర్శి బాధ్యతలు మరొకరికి అప్పగించాలని ఆలోచనలో ఉన్నామన్నారు. ఒక వ్యక్తి ఒక పదవిలో మూడు పర్యాయాలకు మించి ఉండకూడదని.. పార్టీలో అందరికీ అన్ని అవకాశాలు రావాలనేది తన అభిప్రాయం అన్నారు. గత ప్రభుత్వం దాదాపు సుమారు రూ.3 వేల కోట్ల బకాయి పెట్టిందని పేర్కొన్నారు. తమ ప్రభుత్వం ఆ బకాయిలు వరుసగా కట్టుకుంటూ వస్తున్నామన్నారు.

తాను మంత్రి హోదాలో విశాఖపట్నం వచ్చానని.. కానీ పార్టీ ఆఫీసులో బస్సులో పడుకొని సొంత భోజనం తిన్నానన్నారు నారా లోకేష్. తాను ప్రభుత్వం నుంచి ఒక్క వాటర్‌ బాటిల్‌ కూడా తీసుకోలేదని.. తాను కోర్టుకు వచ్చిన వాహనం కూడా తనదే, డీజిల్ కూడా సొంత డబ్బులతో కొట్టించుకున్నాను అన్నారు. తన తల్లి భువనేశ్వరి ఎక్కడా ప్రభుత్వంపై ఆధారపడకూడదని చిన్నప్పటి నుంచి నేర్పించారన్నారు. ముఖ్యమంత్రి చంద్రబాబు తనకు ఎలాంటి బాధ్యతలు అప్పగించినా స్వీకరిస్తానని.. కష్టపడి పనిచేస్తానన్నారు. తన వల్ల పార్టీకి ఏరోజూ చెడ్డపేరు రాకుండా చూసుకుంటానన్నారు.

రాజకీయాలలో పాదయాత్ర చేయడమంటే ఎంబీఏ లాంటిది అన్నారు లోకేష్. పాదయాత్రలో ఇచ్చిన హామీలను నెరవేరుస్తున్నామని.. గత ప్రభుత్వం హయాంలో జరిగిన అక్రమాలు పై విచారణ జరుగుతుందన్నారు. విశాఖపట్నంలో జరిగిన అక్రమాలు పై విచారణ జరుగుతుందని.. అన్ని వ్యవహారాలపై విచారణ ఒకేసారి జరిగితే ఉన్న పోలీసులు సరిపోరు.. కాకపోతే ఆలస్యమైనా కచ్చితంగా అన్నిటిపైనా విచారణ జరుగుతుందన్నారు. ఏడు నెలల్లో ఆరు లక్షల కోట్లకుపైగా పెట్టుబడులు తీసుకొచ్చామని..
ఆరు లక్షల మందికి ఉపాధి కల్పించే విధంగా పరిశ్రమలు రాష్ట్రానికి తీసుకొచ్చామన్నారు.

ముఖ్యమంత్రి హోదాలో చంద్రబాబు 1997 నుంచి దావోస్‌కి వెళ్తున్నారన్నారు లోకేష్. గత ప్రభుత్వంలో ఒప్పందాలు జరిగితే ఎందుకు పరిశ్రమలు స్థాపించలేకపోయారని.. మహారాష్ట్రకు ఎక్కువ పెట్టుబడుల రావడానికి కారణం ఒకే ప్రభుత్వం కొనసాగడం కారణం అన్నారు. తెలుగుదేశం ప్రభుత్వ హయాంలో పెట్టుబడులు పెట్టిన సంస్థల ప్రతినిధులను గతంలో జగన్మోహన్ రెడ్డి కలవలేదని.. గుజరాత్‌లో 5వ సారి బీజేపీ ప్రభుత్వం రావడం వలన అభివృద్ధి పరుగులు పెడుతుందన్నారు. ఏపీలో 2014 నుంచి 2019 వరకు అభివృద్ధిని పరుగులు పెట్టించామన్నారు. విశాఖపట్నంలో 90 రోజులలో టీసీఎస్‌ను ఏర్పాటు చేస్తామన్నారు.

వచ్చే ఎన్నికలలో ఎన్డీఏ కూటమి గెలవాల్సి ఉందని.. చంద్రబాబుపై తమకు నమ్మకం ఉందన్నారు మంత్రి లోకేష్.రానున్న ఎన్నికల్లో జగన్మోహన్ రెడ్డికి గెలవలేరని హామీ ఇవ్వగలరా అని దావోస్ ప్రతినిధులు అడుగుతున్నారని.. ప్రజలు ఈ విషయాన్ని గమనించాలి అన్నారు. పారిశ్రామికవేత్తలను రాష్ట్రానికి తీసుకురావడానికి చాలా కష్టపడుతున్నామని.. రోజాకు దావోస్‌కు జ్యూరీచ్ కు తేడా తెలియదన్నారు. రెడ్ బుక్ కోసం వైఎస్సార్‌సీపీ నేతలు ఎందుకు భయపడుతున్నారన్నారు.