బీజేపీలో బీఆర్ఎస్ విలీనంపై సీఎం రేవంత్ రెడ్డి కీలక వాఖ్యలు చేశారు. త్వరలో బీఆర్ఎస్ పార్టీ బీజేపీలో విలీనం అవుతుందని తెలిపారు. దీంతో పాటూ ఆ పార్టీ అధినేత కేసీఆర్, వర్కింగ్ ప్రెసిడెంట్ కేటీఆర్, మాజీ మంత్రి హరీష్ రావులకు ఎలాంటి పదవులు వరిస్తాయోకూడా చెప్పేశారు. దీంతో ఈ అంశం తెలంగాణ వ్యాప్తంగా తీవ్ర చర్చనీయాంశమైంది. తెలంగాణ మాజీ ముఖ్యమంత్రి కేసీఆర్ గవర్నర్ అవుతారని, అలాగే కేటీఆర్కు కేంద్రమంత్రి పదవి వరిస్తుందని చెప్పారు. ఇక మాజీ మంత్రి హరీష్ రావు తెలంగాణ అసెంబ్లీలో అపోజిషన్ లీడర్గా ఉంటారన్నారు.
ప్రస్తుతం బీఆర్ఎస్కు రాజ్యసభలో నలుగురు సభ్యులు ఉన్నారని రేవంత్ రెడ్డి గుర్తుచేశారు. బీఆర్ఎస్, బీజేపీలో విలీనం అయ్యాక ఆ నలుగురి మద్దతు కూడా బీజేపీకి వస్తుందన్నారు. ఆ తరువాత కవితకు బెయిల్ వస్తుందని కీలక వ్యాఖ్యలు చేశారు. కవితకు బెయిల్ అనంతరం.. బీఆర్ఎస్ నాలుగు రాజ్యసభ సీట్లకుగానూ కవితకు కూడా రాజ్యసభ సభ్యురాలిగా పదవి కేటాయించే అవకాశం ఉందని తెలిపారు. అందుకే బీఆర్ఎస్ పార్టీ బీజేపీలో విలీనం అవ్వడం తధ్యం అని జోస్యం చెప్పారు. దీనిపై బీర్ఎస్ నేతలు ఇప్పుడు ఖండించినా ఎప్పటికైనా అది జరగకమానదని చెప్పుకొచ్చారు సీఎం రేవంత్ రెడ్డి.
ఈ సందర్భంగా కాంగ్రెస్ పార్టీ చేపట్టిన విధి విధానాలను గురించా వివరించారు. ఫాక్స్ కాన్ సంస్థ ప్రతినిధులు హైదరాబాద్ రానున్నారని తెలిపారు. తెలంగాణకు పెట్టుబడుల వెల్లువ కొనసాగుతుందని చెప్పారు. అలాగే రైతు రుణమాఫీకి 5 వేల కోట్ల నిధులు రిజర్వ్లో ఉంచామన్నారు. ఇప్పటికీ రుణమాఫీ కాని వారు ఎవరైనా ఉంటే జిల్లా కలెక్టరేట్కు ఫిర్యాదు చేయవచ్చు అన్నారు. ఒకే కుటుంబంలో వారికి రూ. 2 లక్షలకు పైగా రుణం ఉంటే వారిని ఒక యూనిట్గా పరిగణించి రూ. 2 లక్షల వరకు రుణమాఫీ చేస్తామన్నారు. తన మార్క్ ఉండాలనే ఆగస్టు 15 వరకు రుణమాఫీని ప్రకటించానన్నారు. బీజేపీ తెలంగాణకు చేసిందేమీ లేదని, కేంద్ర బడ్జెట్లో తెలంగాణకు ఎలాంటి నిధులు మంజూరు చేయలేదన్నారు.
ఎంపీ ఈటల రాజేందర్ కామెంట్స్..
బీజేపీలో బీఆర్ఎస్ విలీనం అనేది ఊహాజనితమని మల్కాజ్ గిరి ఎంపి ఈటల రాజేందర్ అన్నారు. విలీనం అనే ప్రశ్న అసలు ఉత్పన్నం కాదన్నారు. తెలంగాణ సీఎం రేవంత్ రెడ్డి, కాంగ్రెస్ పార్టీ కావాలనే తప్పుడు ప్రచారం చేస్తోందన్నారు. రుణమాఫీపై రాష్ట్ర ప్రభుత్వం అల్లికి అల్లి సున్నకి సున్న అన్నట్లు చేసిందని విమర్శించారు. ఎన్నికల ప్రచారంలో రూ.31 వేల కోట్ల రూపాయల రుణాలు మాఫీ చేస్తామని కేవలం రూ.18 వేల కోట్లతో మమ అనిపించారన్నారు. అర్హత ఉన్నవారికి రుణమాఫీ కాలేదని చెప్పారు. రుణమాఫీ కానివారు బిజెపి రచ్చబండ కార్యక్రమంలో ఫిర్యాదు చేశారని చెప్పారు. సుమారు లక్షా 30వేల మంది రైతులు ఫిర్యాదు చేశారన్నారు.
హైడ్రాతో ప్రభుత్వం చేస్తున్న హైడ్రామాను ముందు ఆపాలన్నారు. FTL లో ఉన్న భూములు ప్రభుత్వ భూములు కాదని, అందులో పట్టా కలిగిన వారు కూడా ఉన్నారన్నారు. ఇప్పటికే కట్టిన నిర్మాణాలను కూల్చవద్దని, వారికి ప్రత్యామ్నాయ భూములు ఇవ్వాలని తెలిపారు. ప్రస్తుతం బిజెపిలో స్తబ్దత లేదని, ఏ పార్టీ లో అయిన ఎత్తుపల్లాలు ఉంటాయని వివరించారు. తెలంగాణలో ఎమ్మెల్యే, ఎంపి ఎన్నికలే కాదు.. స్థానిక సంస్థల ఎన్నికల బరిలో కూడా గట్టిపోటీ ఇచ్చేందుకు సిద్దమవుతున్నామన్నారు. ఏ ఎన్నికలైనా బిజెపి సమానంగా పోరాడుతుందన్నారు. ఇక ఎప్పటి నుంచో ఉత్కంఠ కొనసాగుతున్న తెలంగాణ రాష్ట్ర అధ్యక్ష పదవిపై కూడా కీలక వ్యాఖ్యలు చేశారు. రాష్ట్ర బిజెపి అధ్యక్షుని ఎంపికపై బీజేపీ అధిష్టానం నిర్ణయం తీసుకుంటుందన్నారు.
మరిన్ని తెలంగాణ వార్తల కోసం ఇక్కడ క్లిక్ చేయండి..
