నర్సీపట్నంలో అసంపూర్తిగా ఉన్న టిడ్కో గృహాలను జూన్ 12 నాటికి పూర్తి చేయాలని ప్రభుత్వం ఆదేశించింది. 2018లో మంజూరైన 2,592 ఇళ్లలో చాలా వరకు పనులు నిలిచిపోయాయి. కూటమి ప్రభుత్వం చొరవతో పనులు వేగవంతమయ్యాయి. తాగునీరు, రోడ్లు, డ్రైనేజీ వంటి మౌలిక సదుపాయాలు పూర్తి చేయాల్సి ఉంది. రుణాల సమస్యతో బాధపడుతున్న లబ్ధిదారులకు ప్రభుత్వం సహాయం చేయనుంది.
తెలుగుదేశం ప్రభుత్వ హయాంలోనే 1,824 ఇళ్ల నిర్మాణం ప్రారంభం కాగా, దాదాపు 80 శాతం పనులు అప్పుడే పూర్తయ్యాయి. అయితే వైకాపా ప్రభుత్వం అధికారంలోకి వచ్చిన తరువాత ఈ ప్రాజెక్టుకు తగిన ప్రాధాన్యం లభించలేదు. మౌలిక సదుపాయాలు కల్పించి.. మిగిలిన పనులను పూర్తి చేసి లబ్ధిదారులకు ఇళ్లను అప్పగించాల్సినప్పటికీ.. పనులు మాత్రం అసంపూర్తిగానే ఉండిపోయాయి. ఆ సమయంలో.. అసెంబ్లీ ఎన్నికలు సమీపిస్తుండటంతో హడావుడిగా 1,156 మంది లబ్ధిదారులకు కేవలం తాళాలు మాత్రమే అందజేశారు. కనీస మౌలిక వసతులు కూడా లేని ఇళ్లకు తాళాలు ఇస్తే ఎలా నివసించగలమని లబ్ధిదారులు తీవ్రంగా ప్రశ్నించారు. కొద్ది రోజుల్లోనే అన్ని పనులు పూర్తి చేస్తామని అప్పటి పాలకులు హామీ ఇచ్చినా అది కార్యరూపం దాల్చలేదు.
తాజాగా రాష్ట్రంలో ఏర్పడిన కూటమి ప్రభుత్వం ఈ విషయంపై ప్రత్యేక దృష్టి సారించింది. లబ్ధిదారుల ఆవేదనను గుర్తించిన ప్రభుత్వం, వెంటనే చర్యలు చేపట్టింది. మూడు రోజుల క్రితం రాష్ట్ర స్థాయి అధికారులు మున్సిపల్ కమిషనర్లతో ఆన్‌లైన్‌లో సమావేశం నిర్వహించి.. పెండింగ్‌లో ఉన్న పనులను త్వరితగతిన పూర్తి చేయడానికి స్పష్టమైన మార్గదర్శకాలు జారీ చేశారు. దీంతో మున్సిపల్ అధికారులు ఇప్పుడు యుద్ధ ప్రాతిపదికన ఇళ్ల నిర్మాణ పనులపై దృష్టి సారించారు.
ఏపీలో ఆ ఇళ్ల పనుల్లో కదలిక.. గృహ ప్రవేశాలకు రెడీ అయిపోవడమే.. జూన్ 12న..
గృహ సముదాయాలను క్షేత్రస్థాయిలో పరిశీలించినప్పుడు అనేక సమస్యలు వెలుగులోకి వచ్చాయి. ముఖ్యంగా.. తాగునీటి సరఫరా వ్యవస్థ పూర్తిగా ఏర్పాటు చేయలేదు. సర్వీసు రిజర్వాయర్ల నిర్మాణం పూర్తి చేసి.. పైపులైన్లు వేసి నీటిని అందించాల్సి ఉంది. సీసీ రోడ్ల నిర్మాణం కేవలం పది శాతం మాత్రమే పూర్తయింది. డ్రైనేజీ వ్యవస్థ పనులు సగం వరకే జరిగాయి. సెప్టిక్ ట్యాంకుల నిర్మాణం 60 శాతం, విద్యుత్ పనులు కేవలం 25 శాతం మాత్రమే పూర్తయ్యాయి. ప్రస్తుతం ఈ పనులన్నింటినీ నూరు శాతం పూర్తి చేయడానికి అధికారులు ఒక సమగ్ర కార్యాచరణ ప్రణాళికను రూపొందిస్తున్నారు.
గతంలో బ్యాంకుల నుండి రుణాలు పొందిన లబ్ధిదారులు ఇళ్ల నిర్మాణం పూర్తి కాకపోవడంతో రుణ వాయిదాలు సకాలంలో చెల్లించలేక తీవ్ర ఆర్థిక ఇబ్బందులు ఎదుర్కొంటున్నారు. అద్దె ఇళ్లలో నివసిస్తూ, మరోవైపు సిద్ధంకాని ఇళ్లకు బ్యాంకు వాయిదాలు చెల్లించడం వారికి భారంగా మారింది. ఈ సమస్యను నర్సీపట్నం శాసన సభ్యులు, శాసన సభాపతి చింతకాయల అయ్యన్నపాత్రుడు స్వయంగా ప్రభుత్వం దృష్టికి తీసుకువెళ్లారు. బ్యాంకులకు చెల్లించాల్సిన అపరాధ రుసుమును ప్రభుత్వమే భరించి లబ్ధిదారులకు ఆర్థికంగా ఊరట కలిగించాలని ఆయన ముఖ్యమంత్రిని కోరారు. దీనిపై ముఖ్యమంత్రి నుండి సానుకూల స్పందన వస్తుందని లబ్ధిదారులు ఆశగా ఎదురు చూస్తున్నారు.
మరోవైపు.. ఇళ్లు మంజూరైనప్పటికీ వివిధ కారణాల వల్ల 341 మంది లబ్ధిదారులకు బ్యాంకుల నుండి రుణాలు మంజూరు కాలేదు. వారిలో కొందరు రుణ అర్హత కోల్పోవడం, వయో పరిమితి దాటడం లేదా ఇతర ప్రాంతాలకు వలస వెళ్లడం వంటి కారణాలను అధికారులు గుర్తించారు. వీరందరికీ అధికారులు నోటీసులు జారీ చేసి.. 15 రోజుల్లో వివరణ ఇవ్వాలని ఆదేశించారు.
సొంతంగా డబ్బులు వెచ్చించి ఇళ్లు పూర్తి చేసుకుంటారా.. కుటుంబంలో సంపాదన కలిగిన మరొకరిని చేర్చుకుంటారా లేదా ఇల్లు వద్దనుకుంటున్నారా అని అధికారులు ఆ నోటీసుల్లో స్పష్టం చేశారు. వారి సమాధానాల ఆధారంగా తదుపరి చర్యలు తీసుకోనున్నారు. ఒకవేళ ఏమైనా ఇళ్లు మిగిలిపోతే.. అర్హులైన కొత్త లబ్ధిదారులను గుర్తించి వారికి కేటాయించే అవకాశం కూడా ఉంది. ఈ చర్యల ద్వారా ప్రభుత్వం పేదల సొంతింటి కలను త్వరలోనే నిజం చేస్తుందని లబ్ధిదారులు విశ్వసిస్తున్నారు.
రచయిత గురించిబూరుగడ్డ వీరబాబుబూరుగడ్డ వీరబాబు సమయం తెలుగులో కాపీ ఎడిటర్‌గా పని చేస్తున్నారు. ఇక్కడ ఏపీ, తెలంగాణ, జాతీయ, అంతర్జాతీయ విభాగాలకు సంబంధించిన తాజా వార్తలు, రాజకీయ వార్తలు, ప్రత్యేక కథనాలు అందిస్తుంటారు. ఆయనకు జర్నలిజంలో 6 సంవత్సరాలకు పైగా అనుభవం ఉంది. గతంలో ప్రముఖ మీడియా సంస్థల్లో వార్తలు, బిజినెస్, టెక్నాలజీ, విద్య, ఉద్యోగాలకు సంబంధించిన సమాచారాన్ని అందించారు.… ఇంకా చదవండి
