Muppavarapu Veeraiah Chowdary Murder Case,టీడీపీ నేత వీరయ్య చౌదరి హత్య కేసు మిస్టరీ వీడింది.. సంచలన విషయాలు చెప్పిన పోలీసులు – prakasam district police arrested 9 accused in tdp leader muppavarapu veeraiah chowdary murder case

‘వీరయ్య చౌదరి హత్యకు ప్రధాన సూత్రధారి ఆళ్ల సాంబయ్య అలియాస్‌ సిద్ధాంతి. అమ్మనబ్రోలు గ్రామంలో అధిపత్యపోరే హత్యకు ప్రధాన కారణం. రాజకీయ కక్షలతో పాటు ఇసుక వ్యవహారంలోనూ సాంబయ్యతో వీరయ్య చౌదరికి విభేదాలున్నాయి. ఈ నేపథ్యంలో కిరాయి వ్యక్తుల సాయంతో వీరయ్యచౌదరిని హతమార్చారు’ అని ఎస్పీ తెలిపారు. ‘అలాగే ఒంగోలుకు చెందిన బోర్లగుంట వినోద్ కుమార్‌కు ఒంగోలులో మూడు సెలూన్లు ఉన్నాయి. టిప్పర్లతో నెల్లూరుతో పాటు నాగులుప్పలపాడులోని కనపర్తి ప్రాంతం నుంచి ఇసుక రవాణా చేసేవాడు. అతనికి నెల్లూరులోని రౌడీలతో పరిచయాలు ఉన్నాయి. అమ్మనబ్రోలులో ఎరువుల దుకాణం నిర్వహించే తోట శ్రీనివాసరావుతో కలిసి చిన్న చిన్న వ్యాపారాలు చేసేవాడు. శ్రీనివాసరావు ద్వారా ఆళ్ల సాంబయ్య అలియాస్ సిద్ధాంతి వినోద్‌ను కలిశాడు’ అని ఎస్పీ వివరించారు.

‘వినోద్ నేర చరిత్ర గురించి తెలుసుకున్న సిద్ధాంతి అతన్ని హైదరాబాద్ తీసుకెళ్లి తన మేనల్లుడు ముప్పా సురేష్‌కు పరిచయం చేశాడు. ఆ తర్వాత వీరయ్య హత్యకు పథకం వేశారు. వినోద్‌కు వీరయ్యతో నేరుగా పరిచయం లేదు. ఇసుక అక్రమ రవాణాపై వీరయ్య ఫిర్యాదు చేయడంతో అధికారులు వినోద్ వాహనాలు పట్టుకుని రూ.25 వేలు జరిమానా విధించారు. ఆ డబ్బును సిద్ధాంతి చెల్లించాడు. నెల్లూరుకు చెందిన గోళ్ల రుత్యేంద్రబాబు అలియాస్‌ నాని ద్వారా కిరాయి హంతకులను ఏర్పాటు చేసి వీరయ్యను హత్య చేయించడంలో వినోద్ కీలక పాత్ర పోషించాడు’ అన్నారు. ‘ఈ కేసులో అరెస్టైన షేక్ సమీర్ ఈ కేసులో నిందితుడు.. వినోద్ సెలూన్‌లో పని చేసేవాడు. హత్యకు ప్రణాళిక రచించడానికి నిందితులకు భోజనం, వసతి ఏర్పాటు చేశాడు. తన స్నేహితుడి ద్వారా వారికి ఒక ద్విచక్ర వాహనాన్ని ఏర్పాటు చేశాడు’ అన్నారు.

‘అమ్మనబ్రోలుకు చెందిన ఆళ్ల సాంబశివరావు అలియాస్‌ సాంబయ్య అలియాస్ సిద్ధాంతి.. తన మేనల్లుడు ముప్పా సురేష్‌తో కలిసి 2011-12 నుంచి వీరయ్య వర్గంలో ఉండేవాడు. 2021లో అమ్మనబ్రోలు సర్పంచ్ ఎన్నికల్లో వీరయ్య ప్యానెల్‌కు పోటీగా వేరొకరిని సర్పంచి అభ్యర్థిగా నిలిపి డబ్బులతో గెలిపించుకున్నాడు. ముప్పవరపు వీరయ్య చౌదరి రాజకీయంగా ఎదుగుతుండటంతో తనకు, తన మేనల్లుడికి భవిష్యత్తు ఉండదని భావించాడు. ఈ క్రమంలోనే ఎరువుల షాపు నిర్వహించే తోట శ్రీనివాసరావు ద్వారా ఒంగోలుకు చెందిన వినోద్ కుమార్‌తో పరిచయం ఏర్పడింది. వీరయ్య హత్య కోసం రెండు దఫాలుగా రూ.10 లక్షలు చొప్పున రూ.20 లక్షలు చెల్లించాడు. ఈ హత్య చేసిన తర్వాత అన్ని నేను చూసుకుంటామని నమ్మబలికి కిరాతకానికి ఒప్పించాడు.. ఇలా రోజూ వినోద్‌పై సాంబయ్య ఒత్తిడి చేస్తూ హత్య చేయించాడు’ అని ఎస్పీ వివరించారు.

‘ఎరువుల వ్యాపారం చేసే తోట శ్రీనివాసరావు ద్వారా వినోద్‌కు, ఆళ్ల సాంబయ్యకు మధ్య పరిచయం జరిగింది. ఆ తర్వాత ముప్పా సురేష్‌ను కూడా కలిశారు.. వీరు కొన్ని సెటిల్‌మెంట్లు నిర్వహించాడు. తోట శ్రీనివాసరావు వీరయ్య చౌదరి హత్య కేసులో కీలకంగా ఉన్నాడు. ఏప్రిల్ 22న వీరయ్య తన కార్యాలయానికి వచ్చిన విషయాన్ని హంతకులకు సమాచారం అందించాడు. ఈ కేసులో హంతకుల కోసం ఏర్పాటు చేసిన స్కూటీలో డబ్బులు పెట్టి బుల్లెట్ షోరూం దగ్గర నిలిపి ఉంచాడు. అలాగే ఈ కేసులో ఆరోపణలు ఎదుర్కొంటున్న వీరగంధం దేవేంద్రనాథ్ చౌదరికి వీరయ్య చౌదరితో రొయ్యల చెరువులు, ఇతర వ్యాపార విషయాల్లో విభేదాలు ఉన్నాయి. అయితే వీరయ్యను హత్య చేయబోతున్నట్లు తెలిసి కూడా చెప్పలేదు. హత్యలో అతనికి ప్రమేయం లేకపోయినా గోప్యంగా ఉంచినందున నిందితుడయ్యాడు’ అన్నారు.

‘ఈ హత్యకేసులో నిందితుడు మార్టూరి కిరణ్ కుమార్‌ది హైదరాబాద్‌కు చెందిన వ్యక్తి.. వినోద్‌కు బంధువు. వీరయ్య హత్య ప్లాన్‌లో భాగం ఉంది.. ఈ హత్య తర్వాత వినోద్‌కు షెల్టర్, నిందితులకు బెయిల్ కోసం లాయర్లను ఏర్పాటు చేస్తానని హామీ ఇచ్చాడు. మరో ముద్దాయి ముప్పా సురేష్ ఆళ్ల సాంబయ్యకు మేనల్లుడు. సాంబయ్య, తోట శ్రీనివాసరావు ద్వారానే అతడికి వినోద్ పరిచయమయ్యాడు. వీరయ్య హత్య విషయం సురేష్‌కు తెలుసు. ఈ హత్యకేసులో నిందితులు తువ్వర వంశీకృష్ణ అలియాస్‌ జల్సా వంశీ, బెల్లంకొండ వెంకట గౌతమ్, మన్నెం తేజ, నాగరాజు వీరంతా నేర చరిత్ర కలిగిన వ్యక్తులు. వీరు నెల్లూరుకు చెందిన కిరాయి హంతకులు. ఒకరికొకరు పరిచయం లేని వ్యక్తులు. నెల్లూరుకు చెందిన గోళ్ల రుత్రేంద్రబాబు అలియాస్‌ నాని వీరిని వినోద్‌కు పరిచయం చేశాడు’ అని ఎస్పీ వివరించారు. ఈ కేసులో పరారీలో ఉన్నవారిని పట్టుకుంటామన్నారు ప్రకాశం జిల్లా ఎస్పీ దామోదర్.