Bhogapuram Airport 500 Acres Additional Land,ఏపీలో కొత్త ఇంటర్నేషనల్ ఎయిర్‌పోర్ట్‌.. అదనంగా మరో 500 ఎకరాలు, ఉత్తర్వులు జారీ – andhra pradesh government orders on allotted additional 500 acres to bhogapuram international airport

భోగాపురం విమానాశ్రయం నిర్మాణానికి సంబంధించి 2022లో 500 ఎకరాలను వెనక్కి తీసుకున్నారు. ఈ భూమి ఎంతో అవసరమని జీఎంఆర్ సంస్థ గత ప్రభుత్వానికి రిక్వెస్ట్ చేసింది. అయితే 2024లో కూటమి ప్రభుత్వం అధికారంలోకి వచ్చాక.. జీఎంఆర్ సంస్థ ఆ 500 ఎకరాలు ఇవ్వాలని ప్రభుత్వానికి విజ్ఞప్తి చేసింది. విమానాశ్రయ నిర్మాణానికి కేటాయించిన 2,703.32 ఎకరాల్లో కోత విధించిన 500 ఎకరాలను తిరిగి కేటాయించాలని కోరింది. విమానాశ్రయం నిర్మాణ వ్యయం రెట్టింపై రూ.4,600 కోట్లకు చేరిందని జీఎంఆర్ తెలిపింది. ఈ విషయాన్ని పరిశీలించడానికి చంద్రబాబు మంత్రుల కమిటీని నియమించగా.. అనంతరం నివేదికను అందించగా ఆమోదించింది. దీంతో ప్రభుత్వం ఆ 500 ఎకరాలను తిరిగి జీవీఐఏఎల్‌కు అప్పగిస్తూ ఉత్తర్వులు జారీ చేసింది.. రాష్ట్ర మౌలిక సదుపాయల కల్పనా శాఖ కార్యదర్శి యువరాజ్ ఈ మేరకు ఉత్తర్వులు జారీ చేశారు.

ఎయిర్‌పోర్ట్ అథారిటీ ఆఫ్ ఇండియా (AAI) మార్గదర్శకాలు, టెక్నో ఎకనమిక్ ఫీజిబిలిటీ రిపోర్టు ప్రకారం విమానాశ్రయ నిర్మాణానికి 2,703.32 ఎకరాలు అవసరమని తేల్చారు. అయితే అదనంగా మరో 500 ఎకరాలు కేటాయించారు.. అయితే చంద్రబాబు జీఎంఆర్‌తో కుమ్మక్కై రియల్ ఎస్టేట్ వ్యాపారం చేయడానికి కుట్ర పన్నారని గత ప్రభుత్వ హయాంలో ఆరోపించారు. ఎయిర్‌పోర్టుకు కేటాయించి భూములు చాలా ఎక్కువగా ఉన్నాయని.. చంద్రబాబు కుమ్మక్కై రియల్‌ ఎస్టేట్‌ చేసేందుకు కుట్ర పన్నారని ఆరోపించారు. తాజాగా కూటమి ప్రభుత్వం ఈ భూమిని తిరిగి కేటాయించడంతో జీఎంఆర్ సంస్థ హర్షం వ్యక్తం చేసింది.

విమానాశ్రయం అభివృద్ధిలో భాగంగా సిటీ సైడ్ డెవలప్‌మెంట్ చాలా ముఖ్యం. దీని కోసం 500 ఎకరాలను కేటాయించాలని రాష్ట్ర కేబినెట్ ఆమోదం తెలిపింది. మాస్టర్ ప్లాన్ ప్రకారం విమానాశ్రయం అభివృద్ధి కోసం 1,733 ఎకరాలు అవసరం. జాతీయ రహదారి నుండి విమానాశ్రయానికి అనుసంధానం కోసం 92 ఎకరాలను ప్రతిపాదించారు. విమానాశ్రయంలో కార్గో ఏరియా కోసం 83.5 ఎకరాలు కేటాయిస్తారు. నార్త్ టెర్మినల్ భవనం కోసం 98 ఎకరాలు, ఎయిర్ పోర్టు బౌండరీ కోసం 494 ఎకరాలను ప్రతిపాదించారు. నివాస ప్రాంతం, ఇతర అవసరాల కోసం 201 ఎకరాలను కేటాయించాలని నిర్ణయించారు. . ప్రాజెక్టుకు అవసరమైన వయబిలిటీతో పాటు భవిష్యత్తు అవసరాల కోసం ఇప్పుడు 500 ఎకరాలను కేటాయిస్తూ ప్రభుత్వం ఆదేశాలు జారీ చేసింది. సిటీ సైడ్ డెవలప్‌మెంట్ కోసం 500 ఎకరాలు కేటాయించింది.