కడప నగరపాలక సంస్థ సర్వసభ్య సమావేశం మరోసారి కుర్చీ వివాదంతో వాయిదా పడింది. తనకు చెప్పకుండా ఎమ్మెల్యేలకు కుర్చీలు కేటాయించడంపై మేయర్ అభ్యంతరం తెలపడంతో గందరగోళం నెలకొంది. మేయర్ సురేశ్ బాబుతో పాటు కొందరు కార్పొరేటర్లు సమావేశానికి హాజరు కాలేదు. దీనిపై స్పందించిన కమిషనర్ మనోజ్ రెడ్డి.. మేయర్ సురేశ్ బాబుకు నోటీసులు జారీ చేశారు. సిబ్బంది వచ్చి చాంబర్‌కు నోటీసులు అంటించి వెళ్లారు. దీంతో ఈ వివాదం మరింత ముదిరింది.
హైలైట్:
- కడప నగరపాలక సంస్థ సమావేశంలో మరోసారి కుర్చీ కొట్లాట
- మీటింగ్‌కు రాని మేయర్, కొందరు కార్పొరేటర్లు
- మేయర్‌కు నోటీసులు జారీ చేసిన కమిషనర్
ఏం జరిగిందంటే..
ఈరోజు (జూన్ 20) నగరపాలక సంస్థ సర్వసభ్య సమావేశం నిర్వహించాలని నిర్ణయించారు. అందుకు తగ్గట్టుగానే ఏర్పాట్లు చేశారు. అందులో భాగంగా ఇద్దరు ఎమ్మెల్యేలు, ఎమ్మెల్సీలకు కుర్చీలను ఏర్పాటు చేశారు అధికారులు. కడప ఎమ్మెల్యే మాధవీరెడ్డి, కమలాపురం ఎమ్మెల్యే పుత్తా చైతన్యరెడ్డి, ఎమ్మెల్సీలు రాంగోపాల్‌రెడ్డి, రామచంద్రారెడ్డిలకు కుర్చీలు ఏర్పాటు వేశారు. మధ్యలో మేయర్ కుర్చీ ఏర్పాటు చేయగా.. దానికి ఇరువైపులా ఎమ్మెల్యేలు, ఎమ్మెల్సీలు కూర్చీలు వేశారు. ఉదయం 11గంటలకే మీటింగ్ ప్రారంభం కావాల్సి ఉండగా. .ఆ సమయానికి సమావేశం జరిగే హాలు లోకి వైఎస్సార్‌సీపీకి చెందిన మేయర్ సురేష్ బాబు, కొందరు కార్పొరేటర్లు రాలేదు. టీడీపీ ఎమ్మెల్యే మాధవీరెడ్డి మాత్రమే ఆమెకు కేటాయించిన స్థానంలో వచ్చి కూర్చున్నారు.
మరోవైపు, మేయర్ సురేశ్‌బాబు.. 38 మంది వైసీపీ కార్పొరేటర్లతో తన ఛాంబర్‌లో మీటింగ్ నిర్వహించారు. ఈ క్రమంలో తనకు తెలియకుండా ఎమ్మెల్యేలు, ఎమ్మెల్సీలకు కుర్చీలు కేటాయించడంపై మేయర్ సురేష్ బాబు అభ్యంతరాలు తెలిపారు. అంతేకాకుండా మీటింగ్ హాలులో కాకుండా తన ఛాంబర్‌లోనే సమావేశం ఏర్పాటు చేస్తామని కడప కమిషనర్‌కు ఆయన లెటర్ రాశారు.
ఈ ఘటనపై తెదేపా ఎమ్మెల్యే మాధవీరెడ్డి, తెదేపా కార్పొరేటర్లు తీవ్రంగా స్పందించారు. మేయర్ తీరుపై అభ్యంతరం వ్యక్తం చేశారు. నిబంధనలకు విరుద్ధంగా మేయర్ సురేష్ బాబు తన ఛాంబర్‌లో సమావేశం ఎలా నిర్వహిస్తారని ప్రశ్నించారు. ఈ గందరగోళం, వాగ్వాదాల మధ్య సర్వసభ్య సమావేశం వాయిదా పడింది. ఇది కడప నగరపాలక సంస్థ పరిపాలనలో కొనసాగుతున్న ప్రతిష్టంభనకు మరో నిదర్శనంగా మారింది.
సర్వసభ్య సభ వాయిదా పడడంతో కమిషనర్ మనోజ్ రెడ్డి స్పందించారు. ఈ మేరకు ఆయన పేరుతో మేయర్ సురేశ్ బాబు ఛాంబర్‌కు నోటుసులు అంటించారు. ఈరోజు మధ్యాహ్నం రెండు గంటలకు సిబ్బంది నోటీసులు అంటించి వెళ్లిపోయారు. ఉదయం 11 గంటల సమయంలో మేయర్, కార్పొరేటర్లు అందుబాటులోనే ఉన్నా.. సమావేశానకి ఎందుకు రాలేదని కమిషనర్ నోటీసులో ప్రశ్నించారు. సమావేశాన్ని మండలి హాలులోనే నిర్వహించాలని ఈ నెల సభ్యులకు తెలిపామన్నారు. ఈరోజు ఉదయం మీటింగ్‌కు హాలు సిద్ధమైనా మేయర్‌తో పాటు కొందరు కార్పొరేటర్లు రాలేదని చెప్పారు. దీంతో సభ వాయిదా పడినట్లు భావించాలని కమిషర్ మనోజ్ రెడ్డి నోటీసుల్లో తెలిపారు. అయితే ఈ నోటీసులపై మేయర్ సురేశ్ బాబు ఇంకా స్పందించలేదు.
రచయిత గురించిభూపతి రాజుభూపతి రాజు సమయం తెలుగులో కాపీ ఎడిటర్‌గా పని చేస్తున్నారు. ఇక్కడ జాతీయం, ఏపీ, తెలంగాణ, స్పోర్ట్స్‌కు సంబంధించిన తాజా వార్తలు, ప్రత్యేక కథనాలు రాస్తారు. ఆయనకు జర్నలిజంలో 3 సంవత్సరాలకు పైగా అనుభవం ఉంది. గతంలో ప్రముఖ మీడియా సంస్థలో జాతీయ, అంతర్జాతీయ, బిజినెస్, సినిమా, స్పోర్ట్స్ రంగాలకు సంబంధించి వార్తలు రాశారు.… ఇంకా చదవండి
