నెల్లూరు జిల్లాలో దారుణం జరిగింది. సెల్‌ఫోన్ దొంగతనం చేసిందనే అనుమానంతో పదేళ్ల బాలిక ముఖంపై అట్లకాడతో వాతలు పెట్టారు. ఇందుకూరుపేట మండలం కుడితిపాళెం గ్రామంలో ఈ అమానుష ఘటన జరిగింది. జ్యోతిష్యుడు చెప్పాడని నాగరాజు అనే వ్యక్తి, అతని కుటుంబ సభ్యులు ఈ దారుణానికి ఒడిగట్టారు. పోలీసులు కేసు నమోదు చేసి నిందితులను అదుపులోకి తీసుకున్నారు. ఎమ్మెల్యే వేమిరెడ్డి ప్రశాంతిరెడ్డి బాలికకు మెరుగైన వైద్యం అందించాలని, ఆమె చదువు బాధ్యత తీసుకుంటామని తెలిపారు.
జ్యోతిష్యుడు చెప్పాడనే ఇలా..
పదేళ్ల చిన్నారికి తల్లిదండ్రులు లేరు. కుడితిపాళెంలోని గ్రామంలోని మేనత్త మన్నారి వద్ద ఉంటోంది. అయితే బాలిక పక్కింట్లో ఉండే నాగరాజు అనే వ్యక్తి మొబైల్ ఫోన్ శనివారం పోయింది. దీంతో నాగరాజు జ్యోతిష్యుడు వద్దకు వెళ్లారు. ఆ జ్యోతిష్కుడు పక్కింట్లో ఉండే చిన్నారి తీసిందని చెప్పారు. దీంతో నాగరాజు, అతని భార్య సుబ్బమ్మ, పక్కింట్లో ఉండే శ్రీనివాసులు, సార్ముడమ్మ, మన్నారి బాలిక మీద అనుమానంతో పొయ్యి వద్దకు లాక్కెళ్లారు. అట్లకాడ కాల్చి చిన్నారి మూతి మీద, నాలుక, చేతులపై వాతలు పెట్టారు. బాధతో ఆ చిన్నారి విలవిల్లాడిపోయింది. ఈ విషయాన్ని స్థానికులు గమనించి పోలీసులకు సమాచారం అందించారు. పోలీసులు ఘటనా స్థలికి చేరుకుని చిన్నారిని ఆస్పత్రికి తరలించారు. ఐదుగురి మీద హత్యాయత్నం కేసు నమోదు చేసి.. వారిని అదుపులోకి తీసుకున్నారు.
మరోవైపు ఈ ఘటనపై తెలుగుదేశం పార్టీ ఎమ్మెల్యే వేమిరెడ్డి ప్రశాంతిరెడ్డి స్పందించారు. ప్రభుత్వ ఆసుపత్రిలో చికిత్స పొందుతున్న చిన్నారిని.. మెరుగైన వైద్యం కోసం అపోలో ఆసుపత్రికి తరలించాలని స్థానిక నేతలకు సూచించారు. దీంతో స్థానిక నేతలు.. బాలికను నెల్లూరు అపోలోలో చేర్పించారు. మరోవైపు వేమిరెడ్డి ట్రస్ట్‌ ద్వారా బాలిక బాధ్యతలు తీసుకుంటామని.. చదువు, ఇతర బాధ్యతలు తీసుకుంటామని వేమిరెడ్డి ప్రశాంతి తెలిపారు. బాలికపై అమానుషంగా వ్యవహరించిన వారిపై కఠిన చర్యలు తీసుకోవాలని పోలీసులను ఎమ్మెల్యే వేమిరెడ్డి ప్రశాంతి రెడ్డి ఆదేశించారు.
రచయిత గురించివంకం వెంకటరమణవంకం వెంకటరమణ సమయం తెలుగులో డిజిటల్ కంటెంట్ ప్రొడ్యూసర్‌గా పని చేస్తున్నారు. ఇక్కడ క్రీడావార్తలతో పాటు జాతీయ, అంతర్జాతీయ వ్యవహారాలకు సంబంధించిన తాజా వార్తలు, ప్రత్యేక కథనాలు అందిస్తుంటారు. ఆయనకు జర్నలిజంలో 6 సంవత్సరాల అనుభవం ఉంది. గతంలో ప్రముఖ మీడియా సంస్థల్లో స్పోర్ట్స్, పొలిటికల్ న్యూస్, ఇతర రంగాలకు సంబంధించి వార్తలు రాశారు.… ఇంకా చదవండి
