ఇండియన్ ఎక్స్‌ప్రెస్ నివేదిక ప్రకారం, 2019లో సీనియర్ సిటిజన్ చట్టం కింద ఒక ట్రైబ్యునల్ తల్లిదండ్రులకు పాక్షిక ఊరట కల్పించింది. తమ తల్లిదండ్రుల అనుమతి లేకుండా ఇంటి ఏ భాగాన్నీ ఆక్రమించవద్దని కొడుకుకు ఆదేశాలు జారీ చేసింది. అతడు అదే భవనంలో పాత్రల దుకాణం నడుపుతూ, తన భార్య పిల్లలతో నివసించే గదికి పరిమితమయ్యాడు. కొడుకు తన తల్లిదండ్రులను మరింత దుర్భాషలాడిన సందర్భంలో, వేధించిన సందర్భంలో మాత్రమే తొలగింపు చర్యలు తిరిగి ప్రారంభించవచ్చని ట్రైబ్యునల్ పేర్కొంది.
కేసు ఎందుకు కొట్టివేసింది?
సుప్రీంకోర్టు ఈ కేసును కొట్టివేయడానికి ప్రధాన కారణం తల్లిదండ్రులు, సీనియర్ సిటిజన్ల పోషణ సంక్షేమ చట్టం, 2007 (సీనియర్ సిటిజన్ చట్టం). ఈ చట్టం సీనియర్ తల్లిదండ్రులు తమ పిల్లల నుంచి భరణం కోరుతూ వ్యాజ్యాలు దాఖలు చేయడానికి అనుమతిస్తుంది. అయితే, ఈ చట్టం తల్లిదండ్రులకు తమ పిల్లలను గానీ, బంధువులను గానీ తమ ఇంటి నుంచి స్పష్టంగా తొలగించే అధికారం ఇవ్వదు.
అయినప్పటికీ, ఆస్తి బదిలీకి సంబంధించిన నిబంధనలను కొన్ని పరిస్థితులలో అటువంటి తొలగింపు ఆదేశాలను అనుమతించేలా సుప్రీంకోర్టు వ్యాఖ్యానించింది.
సీనియర్ సిటిజన్ల హక్కులు
సీనియర్ సిటిజన్ల చట్టం, తమ సంపాదనతో గానీ, తమ ఆస్తితో గానీ తమను తాము పోషించుకోలేని తల్లిదండ్రులకు (60 ఏళ్లు ఆపైబడిన వారు) తమ పిల్లల లేదా చట్టబద్ధమైన వారసుల నుంచి భరణం కోరుతూ దావా వేసేందుకు అనుమతిస్తుంది.
ఈ చట్టం పిల్లలు లేదా బంధువులపై తల్లిదండ్రుల అవసరాలను తీర్చాల్సిన బాధ్యతను ఉంచుతుంది. తద్వారా వృద్ధ తల్లిదండ్రులు సాధారణంగా జీవించగలరు. ఈ వ్యాజ్యాలను విచారించడానికి ట్రైబ్యునళ్లను ఏర్పాటు చేయడానికి, ఏవైనా ఆదేశాలను సవాలు చేయడానికి అప్పీలేట్ ట్రైబ్యునళ్లను ఏర్పాటు చేయడానికి చట్టం అధికారం ఇస్తుంది.
ఆస్తి బదిలీకి, బహుమతికి షరతులు
ముఖ్యంగా, చట్టంలోని సెక్షన్ 23 తల్లిదండ్రులకు తమ ఆస్తిని బహుమతిగా ఇచ్చిన లేదా బదిలీ చేసిన తర్వాత కూడా భరణం పొందే అవకాశాన్ని కల్పిస్తుంది. సెక్షన్ 23(1) కింద, సీనియర్ సిటిజన్ తన ఆస్తిని సంరక్షణ భరణం అందించాలనే షరతుతో బహుమతిగా ఇవ్వవచ్చు లేదా బదిలీ చేయవచ్చు.
ఈ షరతు నెరవేరకపోతే, బదిలీ మోసపూరితంగా, బలవంతంగా లేదా అనుచిత ప్రభావంతో జరిగిందని నిబంధన చెబుతుంది. సీనియర్ సిటిజన్ ట్రైబ్యునల్‌ను ఆశ్రయిస్తే, ఆ బదిలీని రద్దు చేయవచ్చు. సెక్షన్ 23(2) సీనియర్ సిటిజన్‌కు ఆస్తి నుంచి భరణం పొందే హక్కును ఇస్తుంది.
