Pawan Kalyan Donation To Panchayats,ఏపీలో గ్రామ పంచాయతీలకు నిధులు.. రేపే పంపిణీ.. వాటికి మాత్రమే! – pawan kalyan janasena distributes one lakh per panchayat on monday evening

వరద ప్రభావిత ప్రాంతాలకు.. ఏపీ డిప్యూటీ సీఎం పవన్ కళ్యాణ్ ప్రకటించిన వరద సాయం రేపు (సోమవారం) అందనుంది. సోమవారం సాయంత్రం 400 గ్రామ పంచాయతీలకు లక్ష రూపాయల చొప్పున విరాళం అందించనున్నారు. ఈ విషయాన్ని ఏపీ పౌరసరఫరాలశాఖ మంత్రి, జనసేన నేత నాదెండ్ల మనోహర్ వెల్లడించారు. జనసేన పార్టీ ఎంపీలు, ఎమ్మెల్యేలు, నాయకుల టెలీ కాన్ఫరెన్స్‌లో నాదెండ్ల మనోహర్ ఈ విషయాన్ని వెల్లడించారు. దేశంలో ఇప్పటి వరకూ ఏ నాయకుడూ చేయని విధంగా వరద విలయం ఎదుర్కొన్న పంచాయతీలకు పవన్ కళ్యాణ్ సాయం ప్రకటించారని నాదెండ్ల మనోహర్ గుర్తుచేశారు. 400 గ్రామ పంచాయతీల్లో.. ఒక్కో పంచాయతీకి రూ.లక్ష చొప్పున రూ.4 కోట్ల వ్యక్తిగత సాయం అందించడం చరిత్రలో నిలిచిపోయే దాతృత్వమని చెప్పారు.

మరోవైపు పవన్ కళ్యాణ్ ప్రకటించిన వరద సాయాన్ని ప్రతి పంచాయతీకి నేరుగా అందించే కార్యక్రమాన్ని ప్రభుత్వం తరుఫున, జనసేన తరుఫున 9వ తేదీ సాయంత్రం అందరి సమక్షంలో నిర్వహించాలని నేతలకు సూచించారు. విరాళం సొమ్మును నేరుగా పంచాయతీలకు అందించే కార్యక్రమాన్ని రాష్ట్రవ్యాప్తంగా 20 కేంద్రాల్లో నిర్వహించనున్నారు. వరదలతో నష్టపోయిన గ్రామ పంచాయతీల సర్పంచులు, పంచాయతీ కార్యదర్శులు ఆయా కేంద్రాలకు వచ్చి విరాళం సొమ్మును స్వీకరించాలని నాదెండ్ల మనోహర్ సూచించారు. పవన్ కళ్యాణ్ అందించే విరాళం గ్రామాల అభివృద్ధికి, గ్రామ ఆస్తుల పరిరక్షణకు, ఆరోగ్యశిబిరాల నిర్వహణ, పారిశుద్ధ్యం నిర్వహణకు ఉపయోగించాలని సూచించారు.

సోమవారం సాయంత్రం నాలుగు గంటలకు ఆరు జిల్లాలలోని 400 గ్రామ పంచాయతీలకు నిధులు అందిస్తామన్న నాదెండ్ల మనోహర్ .. 20 కేంద్రాల్లో జరిగే ఈ కార్యక్రమంలో కూటమి నేతలు పాల్గొనాలని కోరారు. ప్రభుత్వ అధికారులు కూడా ఈ కార్యక్రమానికి హాజరు అవుతారని.. అందరినీ కలుపుకుని సమష్టిగా కార్యక్రమాన్ని నిర్వహించాలని సూచించారు. సాయాన్ని నేరుగా అందించే కార్యక్రమంలో పంచాయతీల సర్పంచులకు ప్రాధాన్యం ఇవ్వాలని నాదెండ్ల మనోహర్ జనసేన ఎంపీలు, ఎమ్మెల్యేలకు సూచించారు. మరోవైపు ఈ సాయంతో పాటుగా ఏపీ, తెలంగాణ రాష్ట్రాలకు చెరో కోటి చొప్పున పవన్ కళ్యాణ్ వరద సాయం ప్రకటించారు.