ఎంప్లాయి ప్రావిడెంట్ ఫండ్ ఆర్గనైజేషన్ (EPFO) తన ఖాతాదారులకు ఒక గుడ్‌ న్యూస్ అందించింది. EPF ఖాతా నుండి డబ్బును విత్‌డ్రా చేసుకోవాలని ఆలోచిస్తుంటే ఈ వార్త మీ కోసమే. ఇప్పుడు మీరు PF ఖాతా నుండి డబ్బును ఉపసంహరించుకోవడానికి ఎటువంటి పత్రాన్ని సమర్పించాల్సిన అవసరం లేదు. ఈ రూల్‌ ఇప్పటికే అమలులో ఉందని కేంద్ర ప్రభుత్వం పార్లమెంటులో స్పష్టం చేసింది. ఎటువంటి పత్రాలు లేకుండా మీ EPF ఖాతా నుండి డబ్బును ఉపసంహరించుకోవచ్చు. పిల్లల చదువులు, వివాహం, ఇల్లు కొనడం, అనారోగ్యం లేదా ఏదైనా అత్యవసర పరిస్థితులకు ఉపయోగించాలనుకునే వారికి ఇది ప్రయోజనకరంగా ఉండనుంది.
EPFO సభ్యులు ఇప్పుడు సెల్ఫ్‌ డిక్లరేషన్ ఆధారంగా డబ్బును ఉపసంహరించుకోవడానికి అనుమతించినట్లు కార్మిక, ఉపాధి మంత్రిత్వ శాఖ పార్లమెంటుకు తెలిపింది. మీకు డబ్బు ఎందుకు అవసరమో మీరు చెప్పాలి, దీని కోసం ఎటువంటి పత్రాలను సమర్పించాల్సిన అవసరం లేదు. ఈ ప్రశ్నను లోక్‌సభ ఎంపీలు విజయ్‌కుమార్ విజయ్ వసంత్, మాణికం ఠాగూర్ బి, సురేష్ కుమార్ షెట్కర్ లేవనెత్తారు. పాక్షిక ఉపసంహరణ కోసం ఖాతాదారుడి డిక్లరేషన్‌పై మాత్రమే EPFO ఎందుకు ఆధారపడటం ప్రారంభించిందని వారు అడిగారు? ఈ ప్రక్రియను సులభతరం చేయడానికి, పారదర్శకంగా, నమ్మదగినదిగా చేయడానికి ఈ చర్య తీసుకున్నామని ప్రభుత్వం సమాధానం ఇచ్చింది.
అయితే ఇది కొత్త రూల్‌ కాదు.. 2017లో EPFO ఒక కాంపోజిట్ క్లెయిమ్ ఫారమ్‌ను ప్రవేశపెట్టింది. ఇది ఉపసంహరణ ప్రక్రియను సులభతరం చేసింది. ఈ ఫారమ్ పాక్షిక, తుది ఉపసంహరణలకు పత్రాల అవసరాన్ని తొలగించింది. ఇప్పుడు ఖాతాదారులు తమ డిక్లరేషన్ ఆధారంగానే డబ్బును ఉపసంహరించుకోగలరు. గతంలో చాలాసార్లు ప్రజలు బ్యాంక్ పాస్‌బుక్ లేదా చెక్కు నాణ్యత లేని ఫోటోలను అప్‌లోడ్ చేసేవారు, దీని కారణంగా వారి క్లెయిమ్‌లు తిరస్కరించబడేవి. ఇప్పుడు ఈ సమస్యను కూడా పరిష్కరించారు. చెక్ లేదా పాస్‌బుక్ చిత్రాన్ని అప్‌లోడ్ చేయవలసిన అవసరం 3 ఏప్రిల్ 2025 నుండి రద్దు అయింది. ఇది KYC, బ్యాంక్ ఖాతా ధృవీకరణలో సమస్యలను చాలా వరకు తగ్గించింది.
ఈ కొత్త ప్రక్రియ ద్వారా ఇప్పటివరకు 1.9 కోట్లకు పైగా EPF ఖాతాదారులు ప్రయోజనం పొందారని ప్రభుత్వం తెలిపింది. EPFO క్లెయిమ్‌లను సులభతరం, నమ్మదగినదిగా చేయడంలో ఈ దశ ఒక పెద్ద అడుగు. ఇప్పుడు ప్రజలు ఎటువంటి పత్రాలు లేకుండా అవసరమైనప్పుడు డబ్బును ఉపసంహరించుకోవచ్చు. అత్యవసర పరిస్థితుల్లో వెంటనే డబ్బు అవసరమైన వారికి ఈ మార్పు చాలా ఉపయోగకరంగా ఉంటుంది.
మరిన్ని బిజినెస్‌ వార్తల కోసం ఇక్కడ క్లిక్‌ చేయండి
