Kurnool Dccb Offers No Interest On Loan Farmers,AP News: రైతులకు అద్భుత అవకాశం.. ఆ రుణంపై వడ్డీ కట్టాల్సిన అవసరం లేదు, వీరికి మాత్రమే – kurnool dccb offers no interest on loan for farmers

కర్నూలు జిల్లా రైతులకు డీసీసీబీ శుభవార్త చెప్పింది.. రుణాలకు సంబంధించి కీలక నిర్ణయం తీసుకుంది. కర్నూలులోని బ్యాంకు కార్యాలయంలో సీఈవో విజయకుమార్‌, జీఎం రామాంజనేయులు రైతుల వడ్డీ ఉపశమన పథకం వివరాలను తెలిపారు. 2019 ఏప్రిల్‌ 1వ తేదీ నాటికి రుణాలు తీసుకొని 2022 డిసెంబరు 14 నాటికి గడువు తీరిన రైతులు.. ఒకేసారి బకాయిలను చెల్లిస్తే వడ్డీ కట్టాల్సిన అవసరం ఉండదని తెలిపారు. అలాగే వాయిదాలో వడ్డీ 75 శాతం, లేదా 50 వేలకు మించకుండా మినహాయింపు జరుగుతుంది అంటున్నారు.అలాగే రుణం మొత్తం చెల్లింపు నాటికి అన్ని బకాయి పూర్తిగా చెల్లించినట్లయితే ఈ పథకం రైతులకు వర్తిస్తుందని తెలియజేశారు. ఈ అవకాశం రైతులకు ఈ ఏడాది డిసెంబరు వరకు ఉంటుందని చెప్పారు. అలాగే కర్షక వృద్ధి డిపాజిట్‌ పథకాన్ని ప్రవేశ పెట్టామని.. ఈ పథకంలో 333 రోజులు డిపాజిట్‌ చేస్తే సీనియర్‌ సిటిజన్లకు 8 శాతం, 50 సంవత్సరాలలోపు వారికి 7.50 శాతం వడ్డీ చెల్లింపు ఉంటుందని తెలిపారు. రైతులు, సీనియర్ సిటిజన్లు.. బ్యాంకుకు సంబంధించిన పథకాలను ఉపయోగించుకోవాలని కోరారు. తక్కువ వడ్డీకి రుణాలు అందిస్తామని చెప్పారు.. తాజాగా డీసీసీబీ తీసుకున్న నిర్ణయంతో రైతులకు భారీ ఊరట లభించింది.

మరోవైపు నంద్యాల జిల్లా శ్రీశైలంలో స్వామిఅమ్మవార్లకు రాష్ట్ర దేవాదాయశాఖ మంత్రి ఆనం రామనారాయణరెడ్డి ప్రభుత్వం తరఫున పట్టు వస్త్రాలు సమర్పించారు. శ్రీశైల దేవస్థానానికి చెందిన దాదాపు 4,500 ఎకరాల భూమిలో ఎక్కువ భాగం అటవీశాఖ ఆధీనంలో ఉందని మంత్రి తెలిపారు. ఆ భూమిని దేవస్థానం వినియోగించుకునే విధంగా డిప్యూటీ సీఎం పవన్ కళ్యాణ్ దృష్టికి తీసుకెళ్లనున్నట్లు తెలియజేశారు. శ్రీశైలం దేవస్థానం ఆధీనంలోకి భూమి వచ్చిన తర్వాత కేంద్రం ప్రసాద్‌ పథకం కింద రూ.100 కోట్లు, పర్యాటకశాఖ ద్వారా రూ.1,000 కోట్లను మంజూరు చేసే విధంగా కృషి చేస్తామన్నారు. ముఖ్యమంత్రి చంద్రబాబు సంకల్పం మేరకు శ్రీశైలాన్ని దివ్య క్షేత్రంగా అభివృద్ధి చేయడానికి చర్యలు తీసుకుంటామన్నారు మంత్రి ఆనం రామనారాయణరెడ్డి.