టీటీడీకి మరో భారీ విరాళం అందింది. చెన్నైకు చెందిన ఓ సంస్థ కోటి రూపాయలు విరాళంగా అదించింది. సుబ్బరావు అపారల్స్ అనే సంస్థ శ్రీ బాలాజీ ఆరోగ్య వరప్రసాదిని ట్రస్టుకు కోటి రూపాయలు విరాళంగా అందించింది. విరాళానికి సంబంధించిన చెక్కును టీటీడీ ఏఈవో వెంకయ్య చౌదరి చేతికి దాత రాజా రమేష్ ఆదివారం అందించారు. ఈ సందర్భంగా దాతను టీటీడీ ఏఈవో వెంకయ్య చౌదరి అభినందించారు
తిరుమల శ్రీవారి సాలకట్ల వసంతోత్సవాలు
తిరుమలలో మార్చి 30వ తేదీ నుంచి ఏప్రిల్ 01 తేదీ వరకు శ్రీవారి సాలకట్ల వసంతోత్సవాలు ఘనంగా జరుగనున్నాయి. ఏటా చైత్రశుద్ధ పౌర్ణమి సందర్భంగా సాలకట్ల వసంతోత్సవాలు నిర్వహించడం ఆనవాయితీ. ఈ క్రమంలోనే మార్చి 30వ తేదీ నుంచి మూడు రోజులపాటు ఈ ఉత్సవాలు జరగనున్నాయి. మార్చి 30వ తేదీ ఉదయం ఆరున్నర గంటలకు స్వామివారు నాలుగు మాడవీధులలో ఊరేగుతారు. ఆ తర్వాత వసంతోత్సవ మండపానికి వేంచేస్తారు. వసంతోత్సవ అభిషేక నివేదనలు పూర్తైన తర్వాత తిరిగి ఆలయానికి చేరుకుంటారు.
మార్చి 31వ తేదీ ఉదయం 8 గంటల నుండి 10 గంటల వరకు బంగారు రథాన్ని అధిరోహించి స్వామివారు మాడ వీధులలో ఊరేగుతారు. ఆ తర్వాత వసంత మండపంలో వసంతోత్సవాన్ని నిర్వహిస్తారు. చివరిరోజైన ఏప్రిల్ ఒకటో తేదీ మలయప్పస్వామితో పాటుగా శ్రీ సీతారామలక్ష్మణ ఆంజనేయస్వామి ఉత్సవర్లు, రుక్మిణి సమేత శ్రీకృష్ణస్వామి ఉత్సవమూర్తులు వసంతోత్సవంలో పాల్గొంటారు.
వసంతోత్సవాల నేపథ్యంలో ఈ మూడు రోజులు మధ్యాహ్నం 2 నుండి 4 గంటల వరకు స్నపన తిరుమంజనం నిర్వహిస్తారు. సాయంత్రం 6 నుండి 6.30 గంటల వరకు ఆస్థానం నిర్వహిస్తారు. వసంతోత్సవం సందర్భంగా తిరుమల శ్రీవారి ఆలయంలో మూడురోజుల పాటు కల్యాణోత్సవం, ఆర్జిత బ్రహ్మోత్సవం, ఊంజల్సేవ, సహస్రదీపాలంకార సేవలను టీటీడీ రద్దు చేసింది. మార్చి 31న అష్టదళ పాద పద్మారాధన సేవ రద్దు చేసినట్లు టీటీడీ తెలిపింది.
రచయిత గురించివంకం వెంకటరమణవంకం వెంకటరమణ సమయం తెలుగులో డిజిటల్ కంటెంట్ ప్రొడ్యూసర్గా పని చేస్తున్నారు. ఆయన ఆంధ్రప్రదేశ్కు సంబంధించిన తాజా వార్తలు, ప్రభుత్వ పథకాల సమాచారం, మౌలిక సదుపాయాల కల్పనకు సంబంధించిన కథనాలు, రాజకీయ వార్తలతోపాటు ప్రత్యేక కథనాలు అందిస్తుంటారు. ఏపీ అసెంబ్లీ ఎన్నికలకు సంబంధించి ఆయన ఆసక్తికర కథనాలు, స్పెషల్ ఆర్టికల్స్ రాశారు. గతంలో వీడియో టీమ్లో పని చేసిన వెంకటరమణకు స్పోర్ట్స్ న్యూస్ రాసిన అనుభవం కూడా ఉంది. జర్నలిజంలో 8 ఏళ్ల అనుభవం ఉన్న వెంకటరమణ గతంలో ప్రముఖ మీడియా సంస్థల్లో నేషనల్. ఇంటర్నేషనల్, స్పోర్ట్స్, పొలిటికల్ న్యూస్, ఇతర రంగాలకు సంబంధించి వార్తలు రాశారు. ఉత్తమ పనితీరు కనబర్చినందుకు గానూ 2025, ఫిబ్రవరిలో వెంకటరమణ టైమ్స్ ఇంటర్నెట్ నుంచి వావ్ అవార్డును అందుకున్నారు.… ఇంకా చదవండి
