క్రికెట్ అంటేనే నమ్మకాలు, సెంటిమెంట్లు. ఒక్కోసారి లాజిక్ కంటే మ్యాజిక్ ఎక్కువ పని చేస్తుంటుంది. సన్రైజర్స్ హైదరాబాద్ టీమ్ విషయంలో ఇప్పుడు సరిగ్గా ఇదే జరుగుతోంది. 2016లో సన్రైజర్స్ హైదరాబాద్ తొలిసారి కప్పు ముద్దాడినప్పుడు పరిస్థితులు ఎలా ఉన్నాయో, సరిగ్గా పదేళ్ల తర్వాత 2026లో కూడా అవే దృశ్యాలు కనిపిస్తున్నాయి. అప్పుడు డేవిడ్ వార్నర్.. ఇప్పుడు పాట్ కమిన్స్. అప్పుడు చిన్నస్వామి స్టేడియం.. ఇప్పుడు కూడా అదే గ్రౌండ్. ఏంటి ఇదంతా యాదృచ్ఛికమా లేక చరిత్ర మళ్ళీ తనను తాను తిరగరాసుకుంటుందా?
ప్రస్తుత సీజన్లో తొమ్మిది మ్యాచ్లలో ఆరు గెలిచి పాయింట్ల పట్టికలో దూసుకుపోతున్న హైదరాబాద్ టీమ్ ఆట చూస్తుంటే ప్రత్యర్థులకు వణుకు పుట్టడం ఖాయం. అభిషేక్ శర్మ సిక్సర్ల వర్షం, ట్రావిస్ హెడ్ విధ్వంసం చూస్తుంటే 300 పరుగులు కూడా పెద్ద లెక్కలా అనిపించడం లేదు. కానీ అసలు కిక్కు ఇచ్చేది ఈ ఆట మాత్రమే కాదు, ఈ సీజన్లో కనిపిస్తున్న ఆ 5 క్రేజీ సెంటిమెంట్లు!
మొదటిగా, 2016లోలాగే ఈ సీజన్లో కూడా హైదరాబాద్ తన మొదటి రెండు మ్యాచ్లలో ఓడిపోయింది. అది కూడా ఆర్సీబీతో తొలి మ్యాచ్ ఓడిపోవడం విశేషం. ఇక రెండోది ఆస్ట్రేలియా కెప్టెన్ లక్. ఐపీఎల్లో ఆస్ట్రేలియా కెప్టెన్లు ఉన్నప్పుడు టీమ్స్ కప్పులు కొట్టడం ఒక హిస్టరీ. అప్పుడు వార్నర్ ఉంటే, ఇప్పుడు వరల్డ్ క్లాస్ కెప్టెన్ పాట్ కమిన్స్ సారథ్యంలో టీమ్ పక్కాగా ఉంది. ఇక మూడో సెంటిమెంట్ పాయింట్స్ టేబుల్. అప్పుడు మూడో స్థానంలో ఉండి ట్రోఫీ కొట్టిన సన్రైజర్స్ హైదరాబాద్, ఇప్పుడు కూడా టాప్ 2 కోసం కాకుండా అదే మూడో స్థానంలో గట్టిగా కనిపిస్తోంది.
అన్నింటికంటే హైలైట్ ఏంటంటే ఫైనల్ వెన్యూ. 2016లో చిన్నస్వామి స్టేడియంలో ఆర్సీబీని వారి హోమ్ గ్రౌండ్లోనే ఓడించి సన్రైజర్స్ హైదరాబాద్ గర్జించింది. ఈ 2026 ఫైనల్ కూడా అదే స్టేడియంలో జరగనుంది. పదేళ్ల గ్యాప్ తర్వాత కేకేఆర్ ఎలాగైతే మళ్ళీ కప్పు కొట్టిందో, సన్రైజర్స్ హైదరాబాద్ కూడా ఆరెంజ్ ఆర్మీ సత్తా చాటడానికి సిద్ధమైపోయింది. ఈ సెంటిమెంట్లు చూస్తుంటే “ఈసారి కప్పు మనదే బ్రదర్” అని ఫ్యాన్స్ ఫిక్స్ అయిపోవడంలో తప్పులేదు!
