ప్రపంచవ్యాప్తంగా అత్యధిక మరణాలకు ప్రధాన కారణం గుండెపోటు. ప్రతి రోజు వందల మంది గుండె సమస్యలతో మరణిస్తున్నారు. ముఖ్యంగా చలికాలంలో ఈ సంఖ్య చాలా రెట్లు పెరుగుతుందని నిపుణులు అంటున్నారు. అయితే ఇది ఎందుకు జరుగుతుందో చాలా మందికి తెలియదు. నిపుణుల అభిప్రాయం ప్రకారం, ముఖ్యంగా అధిక రక్తపోటు ఉన్నవారిలో ప్రమాదం ఎక్కువగా ఉంటుంది. శీతాకాలంలో, శరీరంలోని రక్త నాళాలు కుచించుకు పోతాయి. దీనిని వాసోకాన్స్ట్రిక్షన్ అంటారు. ఈ ప్రక్రియ వల్ల శరీరంలో రక్తపోటు పెరుగుతుంది. దీంతో గుండె పోటు సంభవిస్తుంది.
కాబట్టి శీతాకాలంలో జాగ్రత్తగా ఉండాలి. కానీ అన్ని ఛాతీ నొప్పులు గుండెపోటు లక్షణాలు కాదని గుర్తుంచుకోవాలి. గుండెపోటు వచ్చే ముందు దవడ, ఎడమ లేదా కుడి భుజం నొప్పి, క్రమంగా వీపు వంటి శరీరంలోని ఇతర భాగాలకు కూడా ఇది వ్యాపిస్తుంది. అందుకే ఈ కాలంలో చెమటలు పట్టడం, ఆత్రుతగా అనిపించడం, దడ, అసౌకర్యం వంటి ఇతర లక్షణాల పట్ల అప్రమత్తంగా ఉండాలి.
చలికాలంలో తెల్లవారుజామున గుండెపోటు ఎక్కువగా వస్తుందని వైద్యులు చెబుతున్నారు. కాబట్టి ఉదయం వేళల్లో చాలా జాగ్రత్తగా ఉండాలి. గుండెపోటు మాత్రమే కాదు, చలికాలంలో బ్రెయిన్ స్ట్రోక్ కూడా పెరుగుతుందని వైద్యులు చెబుతున్నారు. మెదడుకు రక్త ప్రసరణ ఆగిపోయినప్పుడు, మెదడులోని రక్తనాళాలు పగిలిపోయినప్పుడు స్ట్రోక్ వస్తుంది. ఫలితంగా మెదడు కణాలు కూడా అకస్మాత్తుగా దెబ్బతింటాయి. బ్రెయిన్ స్ట్రోక్ రాకుండా ఉండాలంటే అధిక రక్తపోటును అదుపులో ఉంచుకోవాలి.
ఈ వ్యాధులన్నింటికీ ప్రధాన కారణం చలికాలంలో తక్కువ శారీరక శ్రమ. తక్కువ ఉష్ణోగ్రతల కారణంగా చాలా మంది ఎక్కువ సమయం ఇంట్లోనే ఉంటారు. అధిక కేలరీలు గుండెపోటు, స్ట్రోక్ ప్రమాదాన్ని పెంచుతాయి.
తేలికపాటి శారీరక శ్రమ చేయడం, ఆరుబయట ఉన్నప్పుడు వెచ్చని దుస్తులు ధరించడం, కూరగాయలు, పండ్లు, అధిక ఫైబర్ కంటెంట్, తగినంత ప్రోటీన్తో కూడిన ఆరోగ్యకరమైన ఆహారాన్ని తీసుకోవాలని నిపుణులు చెబుతున్నారు.
