ఏపీలో పర్యాటక రంగాన్ని అభివృద్ధి చేసే దిశగా ప్రభుత్వం చర్యలు చేపడుతోంది. ఈ క్రమంలోనే సీప్లేన్ సర్వీసుల ద్వారా సందర్శకులను ఆకర్షించాలని పర్యాటకశాఖ అధికారులు భావిస్తున్నారు. ఇప్పటికే విజయవాడ శ్రీశైలం సీప్లేన్ సర్వీసును కూడా లాంఛనంగా ప్రారంభించారు. ఇప్పుడు మరోచోట సీప్లేన్ సర్వీస్ ఏర్పాటు చేసేందుకు చర్యలు మొదలెట్టారు. అందులో భాగంగానే అల్లూరి సీతారామరాజు జిల్లాలో ఏపీ పర్యాటక శాఖ, స్పైస్ జెట్ ఎయిర్లైన్స్, ఏపీ జెన్కో అధికారులు ఇటీవల సర్వే నిర్వహించారు. రుషికొండ- జోలాపుట్ సీప్లేన్ సర్వీసుపై అధ్యయనం జరిపారు.
రుషికొండ- జోలాపుట్ మార్గంలో అరకును కలుపుతూ త్వరలో సీప్లేన్ టూరిజం సౌకర్యాలు అందుబాటులోకి తేవాలని అధికారులు ఆలోచిస్తున్నారు. ఈ నేపథ్యంలోనే ఎయిర్లైన్స్ అధికారులు ఆంధ్రా ఒడిశా సరిహద్దుల్లో ఉండే జోలాపుట్ రిజర్వాయర్ పరివాహక ప్రాంతంలో డ్రోన్తో సర్వే నిర్వహించారు. జిల్లా కలెక్టర్ దినేష్కుమార్ కూడా ఇటీవల సుజనకోట, డుడుమ వాటర్ఫాల్స్, జోలాపుట్ రిజర్వాయర్లను పరిశీలించారు. ఈ ప్రాంతాలన్నీ పర్యాటకానికి అనువుగా ఉన్నాయనే కారణంతో సీప్లేన్ టూరిజం కోసం ఏర్పాట్లు జరుగుతున్నాయి. ఇప్పటికే రుషికొండ బీచ్ స్ట్రెచ్ను ఎయిర్లైన్స్ ప్రతినిధులు పరిశీలించారు. జోలాపుట్ నుంచి అరకుకు రెండు గంటల ప్రయాణ సమయం పడుతుందని అధికారుల అంచనా.
సీప్లేన్ సర్వీసుల ద్వారా పర్యాటక ప్రాంతాలకు సందర్శకులను ఆకర్షించాలని ఆంధ్రప్రదేశ్ ప్రభుత్వం భావిస్తోంది. ఈ క్రమంలోనే ఇప్పటికే విజయవాడ శ్రీశైలం సీప్లేన్ సర్వీస్ ప్రారంభించారు. ఇప్పుడు రుషికొండ జోలాపుట్ సీప్లేన్ సర్వీస్ ప్రారంభించేందుకు చర్యలు ప్రారంభించారు. ఈ సీప్లేన్ సర్వీసుల ద్వారా దేశంలోని పర్యాటకులతో పాటు విదేశీయులను కూడా ఆకర్షించాలని లక్ష్యంగా పెట్టుకున్నారు. సుదీర్ఘ తీర ప్రాంతం, ప్రకృతి అందాలు ఏపీ సొంతం. అయితే ఈ పర్యాటక ప్రాంతాలతో అనుసంధానం తక్కువగా ఉండటం.. వీటిలో కొన్ని మారుమూల ప్రాంతాల్లో ఉండటంతో సీప్లేన్ ద్వారా పర్యాటకులను అక్కడకు చేర్చవచ్చనేది అధికారుల ఆలోచన.
అందులో భాగంగానే రుషికొండ – జోలాపుట్ సీప్లేన్ సర్వీసు గురించి అధ్యయనం జరుగుతోంది. ఈ అధ్యయనం పూర్తి అయిన తర్వాత ఉన్నతాధికారులకు నివేదిక సమర్పిస్తారు. సఖినేటిపల్లి, పసర్లపూడి, దిండి, అంతర్వేది, సీలేరు వంటి చోట్ల కూడా ఎయిర్లైన్స్ ప్రతినిధులు, రాష్ట్ర పర్యాటకశాఖ అధికారులు అధ్యయనం జరుపుతున్నారు.
రచయిత గురించివంకం వెంకటరమణవంకం వెంకటరమణ సమయం తెలుగులో డిజిటల్ కంటెంట్ ప్రొడ్యూసర్గా పని చేస్తున్నారు. ఇక్కడ క్రీడావార్తలతో పాటు జాతీయ, అంతర్జాతీయ వ్యవహారాలకు సంబంధించిన తాజా వార్తలు, ప్రత్యేక కథనాలు అందిస్తుంటారు. ఆయనకు జర్నలిజంలో 6 సంవత్సరాల అనుభవం ఉంది. గతంలో ప్రముఖ మీడియా సంస్థల్లో స్పోర్ట్స్, పొలిటికల్ న్యూస్, ఇతర రంగాలకు సంబంధించి వార్తలు రాశారు.… ఇంకా చదవండి
